Lewiler 27 - Мукаддес Китап

27‑нҗи бап Реббе айдылан садакалар хакында

¹ Реб Муса шейле дийди:

² «Ысрайыл халкына айт: „Эгер кимдир бири Реббе берлен ваданы берҗай этмек үчин Реббе багыш эдилен болса, ол адам шу мөчбердәки бахалар билен азат эдилип билнер.

³ Йигрими яшдан алтмыш яша ченли болан эркек адамың бахасы мукаддес өйүң кесгитлән өлчегине гөрә бир йүз мысгал күмүш болсун.

⁴ Эгер аял машгала болса, етмиш мысгал күмүш болсун.

⁵ Бәш яшдан йигрими яша ченли болан огланларың бахасы кырк бәш мысгал күмүш, гызларыңкы йигрими ики мысгал күмүш болсун.

⁶ Бир айлыкдан бәш яша ченли болан огланың бахасы он бир мысгал күмүш, гызың бахасы еди мысгал күмүш болсун.

⁷ Яшы алтмыш я-да ондан ёкары болан эркек кишиниң бахасы отуз бәш мысгал күмүш, аялыңкы йигрими ики мысгал күмүш болсун.

⁸ Эгер кимдир бири Реббе адам бермеги вада эдип, соңам онуң бошадылмагы үчин төленмели баханы төләп билмесе, онда оны руханының янына гетирсинлер. Руханы онуң ягдайына гөрә баха кессин.

⁹ Эгер Реббе вада берлен мал садака хөкмүнде кабул эдилсе, онда хөдүр эдилен хер бир садака малы мукаддесдир.

¹⁰ Малың эеси малы башга оңат мал билен чалышмалы дәлдир. Эгер бир мал башга мал билен чалшылаян ягдайында, оларың икиси-де Реббе дегишлидир.

¹¹ Эгер вада берлен мал Реббе хөдүр эдилмейән харам маллардан болса, ол мал руханының янына гетирилсин.

¹² Оңатдыгына я-да эрбетдигине гарамаздан, руханы мала баха кессин. Руханының кесен бахасы гутарныклы баха болсун.

¹³ Эгер малың эеси оны ызына сатын алмакчы болса, ол руханының кесен бахасының үстүне ене бәшден бирини гошсун.

¹⁴ Эгер кимдир бири өйүни Реббе багыш этсе, оңатмы я-да эрбет – пархы ёк, руханы оңа баха кессин. Руханы оны нәче бахаласа, шол баха гутарныклы баха болсун.

¹⁵ Эгер-де өйүни багыш эден адам оны ызына сатын алмакчы болса, ол кесилен баханың үстүне ене бәшден бирини гошсун. Шондан соң өй өз эесине гайтарылып берлер.

¹⁶ Эгер кимдир бири өз мүлкүнден бир бөлек ери Реббе багыш этсе, ериң бахасы оңа экилҗек тохумың мукдарына гөрә кесилсин: бир эшек йүки арпа тохумының гымматы бир йүз мысгал күмүш болсун.

¹⁷ Эгер кимдир бири ери байрам йылы гечен бадына Реббе багыш этсе, ериң бахасы руханының кесен нырхында галсын.

¹⁸ Эгер эеси ери байрам йылындан хас соңрак Реббе багыш этсе, онда руханы индики байрам йылына ченли галан вагты хасаплап, баханы өңкүден кемелтсин.

¹⁹ Эгер ери Реббе багыш эден адам оны ызына сатын алмакчы болса, онда ол руханының кесен бахасының үстүне бәшден бирини гошсун. Шондан соң ер өз эесине гайтарылып берлер.

²⁰ Эмма ери илки ызына сатын алман, оны башга бирине сатса, ер эесиниң оны ызына сатын алмага хакы ёкдур.

²¹ Эмма байрам йылы геленде, ер багыш эдилен мүлк хөкмүнде Реббиңки болар. Ол ер руханының эечилигине гечер.

^22-23 Эгер бири өз мүлкүнден дашары сатын алан ерини Реббе багыш этсе, руханы ериң бахасыны байрам йылына ченли галан вагта гөрә хасаплап чыкарсын. Реббе мукаддес садака хөкмүнде ериң бахасы шол гүнүң өзүнде төленсин.

²⁴ Байрам йылында болса ер мүлк эесине, ягны сатын алнан адамына гечер.

²⁵ Әхли бахалар, мукаддес өйүң ресми өлчегине гөрә кесилсин, ягны ики мысгал болсун.

²⁶ Мал-гараның илкинҗи догланы Реббиңкидир. Оны хич ким Реббе багыш эдип билмез. Өкүз болсун, овлак-гузы болсун – пархы ёк, олар Реббиңкидир.

²⁷ Эгер ол мал харам болса, онда малың эеси руханының кесен бахасының үстүне бәшден бирини гошуп, оны ызына сатын алсын. Эгер мал ызына сатын алынмаса, кесилен баха гөрә сатылсын.

²⁸ Реббе багыш эдилен ислендик зат: адам болсун, хайван болсун я-да мүлк берлен ер болсун – пархы ёк, ол сатылып я-да ызына сатын алнып билинмез. Багыш эдилен хер бир зат эбедилик Реббе дегишлидир.

²⁹ Бүтинлей ёк эдилмели ынсанлар хем ызына сатын алнып билинмез. Олар хөкман өлүме хөкүм эдилсин.

³⁰ Ерден өнйән өнүмлериң ондан бири: дәнеми я-да миве – пархы ёк, оларың бары Реббиңкидир. Олар Реббе багыш эдилендир.

³¹ Эгер кимдир бири өз ондан бирини ызына сатын алмак ислесе, ондан бириниң нырхының үстүне бәшден бирини гошсун.

³² Ири малларың ве доварларың ондан бирини, ягны чопаның санаян хер онунҗы малы Реббе багыш эдилсин.

³³ Хич ким шикесли малы садака бермесин. Шейле хем мал чалшылмасын. Эгер ол чалшылайса, оларың икисем Реббе дегишли болар. Сиз олары ызына сатын алмалы дәлсиңиз“».

³⁴ Реббиң Синай дагында ысрайыл халкы үчин Муса берен буйруклары шулардан ыбаратдыр.