Lewiler 24 - Мукаддес Китап

24‑нҗи бап Мукаддес ердәки чыралар

¹ Реб Муса шейле дийди:

² «Ысрайыл халкына буюр: хер гүн ышык болар ялы, саңа чыра үчин енҗилен зейтуның сап арасса ягыны гетирсинлер.

³ Харун чыраны Реббе йүз тутулян чадырда, Әхт сандыгының өңүндәки тутының дашында, Реббиң хузурында хер гүн агшамдан эртире ченли янып дурар ялы эдип гойсун. Бу сизиң бүтин несиллериңиз үчин эбедилик дүзгүн болсун.

⁴ Ол чыралары сап алтындан болан чыраданың үстүнде Реббиң хузурында хер гүн агшамдан эртире ченли янып дурар ялы эдип гойсун».

Реббе хөдүр эдилен чөрек

⁵ Реб Муса шейле дийди: «Сайлама бугдай унундан он ики саны чөрек биширт, оларың хер бириниң аграмы ондан ики батмана барабар болсун.

⁶ Олары Реббиң хузурында сап алтындан болан хантагтаның үстүнде алты-алтыдан ики хатар эдип гой.

⁷ Хер хатар чөрегиң янында Реббиң ёлуна хөдүр эдилен пай хөкмүнде сап арасса, якымлы ыслы түтетгиден гой. Бу Реббе от үсти билен берилйән садака болуп, ол чөрегиң орнуны тутар.

⁸ Харун булары адат боюнча хер Сабат гүни Реббиң хузурында гойсун. Бу ысрайыл халкының эбедилик борҗудыр.

⁹ Бу чөреклер Харун ве онуң огулларыныңкыдыр. Олар мукаддес ерде ийилсин. Чүнки Реббе от үсти билен берилйән садака пайларының ичинде руханылар үчин өрән мукаддеси шудур. Бу сизиң үчин эбеди парздыр».

Худая дил етирмек ве онуң җезасы

¹⁰ Ысрайылларың арасында эҗеси ысрайыллы, какасы болса мүсүрли болан бир адам барды. Дүшелгеде бир ысрайыллы аялың оглы билен башга бир ысрайыллы урушмага башладылар.

¹¹ Ысрайыллы аялың оглы күпүр гепләп, Реббиң адына дил етирди. Онсоң оны Мусаның янына алып гелдилер. Онуң эҗесиниң ады Шеломытды, ол дан тиресинден болан Дибриниң гызыды.

¹² Реб өзлерине нәме этмелидигини аян эдйәнчә, олар яңкы адамы габап гойдулар.

¹³ Реб Муса шейле дийди:

¹⁴ «Худая дил етирени дүшелгәниң дашына чыкар, оны эшиденлериң бары эллерини онуң келлесине гойсунлар ве бүтин халк оны дашласын.

¹⁵ Онсоң ысрайыл халкына айт: „Ким өз Худайына дил етирсе, онуң гүнәси өз бойнунадыр.

¹⁶ Кимде-ким Реббиң адына дил етирсе, ол өлүме хөкүм эдилсин, оны бүтин халк дашласын. Гелмишекми я-да ерли халк – пархы ёк, Реббиң адына дил етирен өлдүрилмелидир.

¹⁷ Адам өлдүрениң өзи-де өлүме хөкүм эдилсин.

¹⁸ Мал өлдүрен онуң өвезини мал билен төлесин.

¹⁹ Ким-де ким бириниң беденине шикес етирсе, онуң өзүне-де эдил шонуң ялы шикес етирилсин.

²⁰ Дөвүк орнуна дөвүк, гөз орнуна гөз, диш орнуна диш, киме нәхили шикес етирен болса, онуң өзүне-де шонуң ялы шикес етирилсин.

²¹ Мал өлдүрен онуң өвезини мал билен төлесин, адам өлдүрен өлүме хөкүм эдилсин.

²² Гелмишек үчин хем, ерли адам үчин хем канун бирдир, чүнки Худайыңыз Реб Мендирин“».

²³ Муса бу табшырыклары ысрайыл халкына беренинден соң, олар Реббе дил етирен адамы дүшелгәниң дашына чыкарып дашладылар. Шейле этмек билен ысрайыл халкы Реббиң Муса берен табшырыгыны ерине етирди.