Lewiler 23 - Мукаддес Китап

23‑нҗи бап

¹ Реб Муса шейле дийди:

² «Ысрайыл халкына айт: „Реббиң дини байрамлары, ягны сиз тарапындан мукаддес йыгнанышыклар хөкмүнде ыглан эдилмели Мениң байрамларым, ине, шулардыр.

Сабат гүни, Песах байрамы, Петир байрамы

³ Алты гүнләп ишләң, единҗи гүн Сабатдыр, ол долы дынчлык ве мукаддес йыгнанышык гүнүдир. Шол гүн сиз хич хили иш этмәң. Ниреде яшаяндыгыңыза гарамаздан, шол Сабат гүни Реббе дегишлидир.

⁴ Ине, Реббиң шу байрамларыны сиз кесгитленен вагтларында беллемелисиңиз.

⁵ Биринҗи айың он дөрдүне Гүн яшандан соң, Реббе Песах гурбанлыгы хөдүр эдилсин.

⁶ Шу айың он бәши Реббиң Петир байрамыдыр. Сиз еди гүнләп петир иймелисиңиз.

⁷ Шу гүнлериң илкинҗи гүни сиз халкы мукаддес йыгнанышыга чагырың. Шол гүн сиз ишлемәң.

⁸ Еди гүнләп Реббе от үсти билен берилйән садака пайларыңызы хөдүрләп, единҗи гүни сиз халкы мукаддес йыгнанышыга чагырың. Шол гүн сиз ишлемәң“».

Илкинҗи мивелерден берилмели садака

⁹ Реб Муса шейле дийди:

¹⁰ «Ысрайыл халкына айт: „Сизе берҗек юрдума барып, онуң хасылыны йыгнан махалыңыз, илкинҗи хасыл десселерини рухана гетирип бериң.

¹¹ Ол сизиң үчин кабул болсун дийип, дессәни Реббе садака хөкмүнде ёкары галдырсын. Руханы оны Сабат гүнүниң эртеси хөдүр этсин.

¹² Дессәни садака хөкмүнде ёкары галдыран гүнүңиз, сиз Реббе якма гурбанлык хөкмүнде шикессиз токлыны хөдүрләң.

¹³ Онуң билен бирликде зейтун ягына гарылан ондан ики батман мөчбериндәки сайлама бугдай унуны галла садакасы хөкмүнде бериң. Реббе от үсти билен берилйән бу галла садаканың ысы Оңа якымлыдыр. Хөдүр эдилен ичги хөкмүнде бир күйзе шерап бериң.

¹⁴ Худайыңыза бу садаканы хөдүр эдйән гүнүңизе ченли чөрек, говрулан бугдай я-да тәзе бугдай дәнесини иймәң. Бу сизиң ниреде яшаяндыгыңыза гарамаздан, бүтин несиллериңиз үчин эбедилик дүзгүн болсун.

Галла байрамы

¹⁵ Сабат гүнүниң эртеси сиз Реббе гөтерме садакасы хөкмүнде хөдүр эден дессәңизи гетирен гүнүңизден санап, долы еди хепдәни гечириң.

¹⁶ Единҗи Сабадың эртеси, эллинҗи гүн Реббе тәзе галла садакасыны хөдүрләң.

¹⁷ Сиз яшаян ерлериңизден ики чөреги Реббе гөтерме садакасы хөкмүнде хөдүр эдиң. Оларың хер бири ондан ики батмана барабар сайлама бугдай унуна югрулып, илкинҗи миве хөкмүнде хамырмаялы биширилен болсун.

¹⁸ Чөрек билен бирликде шикессиз токлулардан едисини, бир өкүзчәни ве ики гочы хөдүр эдиң. Булар Реббе якма гурбанлык болсун. Олар Реббе от үсти билен берилйән галла садакасы ве хөдүр эдилен ичги билен бирликде Реббе хөдүр эдилсин. Онуң ысы Реббе якымлыдыр.

¹⁹ Шейле хем сиз гүнә гурбанлыгы үчин бир эркеҗи ве саламатлык гурбанлыгы үчин ики саны гочы хөдүрләң.

²⁰ Руханы булары ики гузы ве илкинҗи хасыл чөреги билен бирликде Реббе гөтерме садакасы хөкмүнде ёкары галдырсын. Булар Реббе багыш эдилип, руханыныңкы болмалыдыр.

²¹ Шол гүн сиз халкы мукаддес йыгнанышыга чагырың. Шол гүн сиз ишлемәң. Бу ниреде яшаяндыгыңыза гарамаздан, сизиң бүтин несиллериңиз үчин эбедилик дүзгүн болсун.

²² Ериңизиң хасылыны йыгнаныңызда, атызларыңызың гыра четлериндәкилери ормаң, хасылыңызың хошасыны чөплемәң. Олары гарып-гасара ве гелмишеге гоюң. Худайыңыз Реб Мендирин“».

Сурнай байрамы

²³ Реб Муса шейле дийди:

²⁴ «Ысрайыл халкына айт: „Единҗи айың биринҗи гүни сизиң үчин долы дынчлык гүнүдир. Шол гүн сурнайлар чалнып ятланян мукаддес йыгнанышык гүнүдир.

²⁵ Шол гүн сиз ишлемәң. Сиз Реббе от үсти билен берилйән гурбанлыгы хөдүрләң“».

Гүнәден сапланма гүни

²⁶ Реб Муса шейле дийди:

²⁷ «Единҗи айың онунҗы гүни гүнәден сапланма гүнүдир. Шол гүн сизиң үчин мукаддес йыгнанышык гүни болсун. Сиз гиҗе-гүндиз агыз бекләп, Реббе от үсти билен берилйән гурбанлыгы хөдүрләң.

²⁸ Шол гүн сиз хич ишлемәң, чүнки бу сизиң Худайыңыз Реббиң хузурында гүнәлериңизден сапланмагыңыз үчин, гүнәден сапланма гүнүдир.

²⁹ Кимде-ким шол гүн гиҗе-гүндиз агыз беклемесе, ол өз халкының арасындан ковлуп чыкарылсын.

³⁰ Шол гүн хайсыдыр бир иш эден адамы, Мен өлдүрерин.

³¹ Сиз шол гүн ишлемәң, бу сизиң бүтин несиллериңиз үчин ниреде яшаяндыкларына гарамаздан, эбедилик дүзгүн болсун.

³² Ол гүн сизиң үчин Сабат, долы дынчлык гүнүдир. Сиз агыз бекләң. Айың докузы гүнүниң агшамындан эртеси агшама ченли Сабат гүнүниң канунларыны ерине етириң».

Чатма байрамы

³³ Реб Муса шейле дийди:

³⁴ «Ысрайыл халкына айт: „Шу единҗи айың он бәшинден башлап, еди гүнүң довамында Реббиң хорматына Чатма байрамы гечирилсин.

³⁵ Онуң биринҗи гүни сиз халкы мукаддес йыгнанышыга чагырың. Шол гүн сиз ишлемәң.

³⁶ Еди гүнләп, Реббе от үсти билен берилйән гурбанлык пайларыны хөдүрләң. Секизинҗи гүн халкы мукаддес йыгнанышыга чагырың. Реббе от үсти билен берилйән гурбанлык пайларыны хөдүрләң. Шол гүн сиз халкы мукаддес йыгнанышыга чагырың ве ишлемәң.

³⁷ Мукаддес йыгнанышыкларда Реббиң беллемеги буйран байрамлары шулардыр: Реббе от үсти билен берилйән садака пайлары: якма гурбанлыклары, галла садакалары, башга гурбанлыклары ве хөдүр эдилен ичгилериң хеммесини өз белленмели гүнлеринде бериң.

³⁸ Бу байрамлар Реббиң Сабат гүнлеринден, айратын садакаларыңыздан, Худая айдан садакаларыңыздан ве Реббе хөдүр эден әхли мейлетин садакаларыңыздан дашарыдыр.

³⁹ Единҗи айың он бәшинҗи гүни, сиз ерлериңизиң хасылыны йыгнаныңызда, еди гүнләп Реббиң хорматына байрам эдиң. Биринҗи ве секизинҗи гүнлери долы дынч алың, ишлемәң.

⁴⁰ Биринҗи гүн оңат мивели агачларың мивесини, палма шахаларыны, гүр япраклы агачларың ве сув боюнда өсйән сөвүтлериң шахаларыны алып, Худайыңыз Реббиң хузурында еди гүнләп шады-хоррамлыкда болуң.

⁴¹ Хер йыл единҗи айда еди гүнләп Реббиң шанына байрам белләң. Бу сизиң бүтин несиллериңиз үчин эбедилик дүзгүндир.

⁴² Еди гүнләп чатмаларда яшаң, Ысрайылың әхли ерли халкы чатмаларда яшасын.

⁴³ Эгер шейле этсеңиз, Мениң ысрайыл халкыны Мүсүрден алып чыканымдан соң, олары чатмаларда яшадандыгымы сизиң несиллериңиз билерлер. Худайыңыз Реб Мендирин“».

⁴⁴ Шейдип, Муса ысрайыл халкына Реббиң белленмели байрамларыны ыглан этди.