Lewiler 20 - Мукаддес Китап

20‑нҗи бап Реббиң канунларына боюн эгмедиклер үчин җезалар

¹ Реб Муса шейле дийди:

² «Ысрайыл халкына айт: „Ысрайыл халкындан я-да оларың арасында яшаян гелмишеклерден кимдир бири өз перзентлеринден бирини, Молек бута багыш этсе, ол адам өлдүрилсин. Юрдуң халкы оны дашлап өлдүрсин.

³ Мен хем ол адамдан йүз өврерин ве оны өз халкым хөкмүнде гөрмерин. Чүнки ол халк Мениң мукаддес өйүми харама чыкарып, Мениң мукаддес адыма ыснат гетирип, өз перзендини Молеге багыш этди.

^4-5 Эгер юрдуң халкы перзендини Молеге берйән адамы гөрмезлиге салып өлдүрмесе, Мениң Өзүм ол адамдан ве онуң машгаласындан йүз өврерин. Оны Молегиң ызына эерип, зынахорлыга йүз уранларың бары билен биле Өз халкымдан четлешдирерин.

⁶ Эгер кимде-ким бивепалык эдип, җадыгөйлериң ве палчыларың ызына эерсе, Мен ондан йүз өврерин ве оны Өз халкымдан четлешдирерин.

⁷ Шонуң үчин сиз иниңизи тәмизләп, мукаддес болуң, чүнки Худайыңыз Реб Мендирин.

⁸ Мениң парзларымы саклап, олары берҗай эдиң. Сизи мукаддес эдйән Реб Мендирин.

⁹ Какасыны я-да эҗесини нәлетлән адам өлдүрилсин. Өз какасыны ве эҗесини нәлетләндиги үчин, онуң ганы өз бойнунадыр.

¹⁰ Эгер бир адам башга бир адамың аялы билен җынс гатнашыгыны этсе, ол азгын эркек-де, аял-да өлдүрилсин.

¹¹ Ким какасының аялы билен җынс гатнашыгыны этсе, ол өз какасыны намыса гойяндыр. Оларың икиси-де өлдүрилсин. Оларың ганлары өз боюнларынадыр.

¹² Бир эркек өз гелни билен җынс гатнашыгыны этсе, оларың икиси-де өлдүрилсин, чүнки булар азгынлык этдилер. Оларың ганлары өз боюнларынадыр.

¹³ Бир эркек аял билен җынс гатнашыгыны эдиши ялы, эркек билен җынс гатнашыгыны этсе, оларың икиси-де неҗис иш эдендиклери үчин өлдүрилсин. Оларың ганлары өз боюнларынадыр.

¹⁴ Эгер бир эркек бир аяла хем-де онуң эҗесине-де өйленсе, бу азгынлыкдыр. Араңызда азгынлык болмаз ялы, ол адам аялы ве онуң эҗеси билен биле ода якылсын.

¹⁵ Эгер бир эркек бир хайван билен җынс гатнашыгыны этсе, ол адам-да, хайван-да өлдүрилсин.

¹⁶ Эгер бир аял бир хайван билен җынс гатнашыгыны этсе, ол аял-да, хайван-да өлдүрилсин. Олар өлдүрилсин, оларың ганлары өз боюнларынадыр.

¹⁷ Эгер бир адам өз гыз доганына, какасының я эҗесиниң гызына өйленсе, олар көпчүлигиң өңүнде масгараланып, өз халкының арасындан чыкарылсын. Ол адам өз гыз доганы билен җынс гатнашыгыны эденлиги үчин җезаландырылмалыдыр.

¹⁸ Эгер бир адам айбашы гөрйән аял билен җынс гатнашыгыны этсе, оларың икиси-де өз халкындан четлешдирилсин, чүнки олар тәмизлик барадакы кадалары боздулар.

¹⁹ Өз дайзаң я-да эҗекең билен җынс гатнашыгыны этме, чүнки бейле этмек билен сен өзүңи намыса гойянсың. Оларың икисине-де җеза берилмелидир.

²⁰ Гелнеҗеси билен җынс гатнашыгыны эден адам агасыны намыса гойяндыр. Булар өз җезаларыны чекип, дүнйәден перзентсиз өтерлер.

²¹ Кимде-ким өз гелнеҗесине өйленсе, бу харамлыкдыр. Ол өз доганыны намыса гойяндыр, олар перзентсиз өтерлер.

²² Месген тутмагыңыз үчин алып барян юрдумың сизден йүз дөндермези ялы, сиз Мениң парзларымы ве хөкүмлерими саклап, олары берҗай эдиң.

²³ Өңүңизден ковуп чыкарян миллетиң адатларына эермәң, чүнки шейле ишлер эдендиклери үчин Мен олары йигрендим.

²⁴ Эмма Мен сизе шейле дийдим: ‘Оларың юрдуны сиз мирас аларсыңыз, Мен сүйт ве бал акян, мес топраклы юрды сизе мүлк эдип берерин’. Сизи бейлеки миллетлерден сайлап алан Худайыңыз Реб Мендирин.

²⁵ Шонуң үчин хем сиз халал хайваны харам хайвандан, халал гушы хем харам гушдан сайгарың. Сизиң үчин харам дийип айрыбашгалан хайванларым, гушларым я-да гурыер сүйрениҗилери билен өзүңизи харам этмәң.

²⁶ Мениң үчин мукаддес болуң, чүнки Мен – Реб мукаддесдирин ве Мен сизи бейлеки халклардан Өзүмиңки болмагыңыз үчин сайлап алдым.

²⁷ Җадыгөй, палчы болан эркегу-аял дашланып өлдүрилсин. Оларың ганы өз боюнларынадыр“».