Lewiler 2 - Мукаддес Китап

2‑нҗи бап Галла садакасы

¹ Кимде-ким Реббе галла садакасыны бермекчи болса, ол садака сайлама бугдай унундан берилсин. Садака берйән адам унуң үстүне зейтун ягыны гуюп, якымлы ыслы түтетгини онуң үстүнде гойсун.

² Онсоң галла садакасы Харуның огулларына – руханылара гетирилип берилсин. Руханы зейтун ягына гарылан сайлама бугдай унундан бир гошавуҗыны, якымлы ыслы түтетгиниң барыны алып, олары гурбанлык сыпасында яксын. Реббиң ёлуна от үсти билен берлен бу садака пайының ысы Оңа якымлыдыр.

³ Галла садакасының галаны Харун билен онуң огулларыныңкы болсун. Реббе от үсти билен берилйән бу садака өрән мукаддес садакадыр.

⁴ Эгер сиз тамдырда япылан петири садака бермекчи болсаңыз, онда ол сайлама бугдай унундан биширилен, зейтун ягына югрулан, хамырмаясыз күлчелер я-да оҗакда биширилен, йүзүне зейтун ягы чалнан челпеклер болсун.

⁵ Эгер табада биширилен галла садакасыны бермекчи болсаңыз, онда ол сайлама бугдай унундан, зейтун ягына югрулып биширилен петир болсун.

⁶ Садака берйән петири дограп, үстүне зейтун ягыны гуйсун – бу галла садакасыдыр.

⁷ Эгер сизиң берйән галла садакаңыз сачда биширилен петир чөрек болса, онда ол сайлама бугдай унундан эдилен хем-де зейтун ягына югрулан болсун.

⁸ Реббе шейле биширилен галла садакасыны хөдүр эдиң. Чөрек рухана гетирилип берленден соң, ол оны гурбанлык сыпасының янына алып барсын.

⁹ Руханы Реббиң ёлуна берилйән бу садака пайыны галла садакасындан бөлүп айрып, оны гурбанлык сыпасында яксын. Реббе от үсти билен берилйән бу садаканың ысы Оңа якымлыдыр.

¹⁰ Галла садакасының галан бөлеги Харун билен онуң огулларыныңкы болсун. Реббе от үсти билен берилйән бу садака пайы өрән мукаддесдир.

¹¹ Реббе садака берҗек чөрегиңиз хич вагт хамырмаялы болмасын. Чүнки Реббе от үсти билен берилйән бу садака хамырмаялы болмалы дәлдир я-да бал гошулмалы дәлдир.

¹² Сиз бу затлары Реббе экиниңизиң илкинҗи хасыл садакасы хөкмүнде берип билерсиңиз. Эмма олар гурбанлык сыпасында якымлы ыс чыкармак үчин якылмасын.

¹³ Сиз берйән галла садакаларыңыза дуз сепиң. Чүнки дуз Худайыңыз билен баглашан әхтиңизиң нышаныдыр. Берйән садакаларыңызың хеммесине дуз сепиң.

¹⁴ Эгер сиз экиниңизиң илкинҗи хасылыны Реббе галла садакасы хөкмүнде хөдүр этмекчи болсаңыз, ол дөвлен тәзе бугдай сүммүлинден алнан ве отда говрулан болсун.

¹⁵ Оңа зейтун ягыны гошуп, якымлы ыслы түтетгини-де онуң үстүне гоюң. Бу галла садакасыдыр.

¹⁶ Онсоң руханы дөвлен бугдайың белли бир мукдарыны ве якымлы ыслы түтетгили зейтун ягыны алып, олары гурбанлык сыпасында яксын. Бу Реббиң ёлуна от үсти билен берлен садака пайыдыр.