Lewiler 19 - Мукаддес Китап

19-нҗы бап Мукаддеслик ве адалатлылык

¹ Реб Муса шейле дийди:

² «Бүтин ысрайыл халкына шейле дий: „Мукаддес болуң, чүнки Мен, сизиң Худайыңыз Реб, мукаддесдирин.

³ Хер бириңиз өз эне-атаңызы сылаң, Сабат гүнүмиң канунларыны ерине етириң. Худайыңыз Реб Мендирин.

⁴ Гуйма бутлары ве башга хили бутлары ясап, олара сежде этмәң. Худайыңыз Реб Мендирин.

⁵ Реббе саламатлык гурбанлыгыны хөдүр эдениңизде, гурбанлыгыңызың кабул болары ялы, оны када лайыклыкда бериң.

⁶ Гурбанлык малының эти хөдүр эдилен гүни я-да эртеси ийилсин. Үчүнҗи гүне галан эт ода якылсын.

⁷ Эгер эт үчүнҗи гүн ийилсе, ол харамдыр ве сизиң гурбанлыгыңыз кабул болмаз.

⁸ Ол гурбанлыкдан иен өз җезасыны чекер, чүнки ол Реббе багыш эдилен зады харландыр. Шол себәпли бу адам өз халкының арасындан ковлуп чыкарылсын.

⁹ Ериңизиң хасылыны йыгнаныңызда, атызларыңызың гыра четиндәкилерини ормаң, хасылыңызың хошасыны чөплемәң.

¹⁰ Үзүм багларыңызың мивелериниң барыны йыгмаң, ере гачан үзүмлери йыгнаман, олары гарып-гасара, гелмишеклере гоюң. Худайыңыз Реб Мендирин.

¹¹ Огрулык, хилегәрлик этмәң, бир-бириңизи алдамаң.

¹² Галп зат бабатда Мениң адымдан ант ичип, Худайыңызың адына ыснат гетирмәң. Мен Ребдирин.

¹³ Ёлдашыңың хакыны ийме, оны талама. Гүнлүкчиниң зәхмет хакыны бир гүнем саклама.

¹⁴ Кере сөгме, көрүң өңүнде бүдрәр ялы зат гойма. Худайыңдан горк. Мен Ребдирин.

¹⁵ Хөкүм чыкараныңда адалатсызлык этме. Гарыбың тарапыны тутуп я-да байдан хедер эдип, адалатсызлык этме, илдешиңе хемише адалатлы хөкүм чыкар.

¹⁶ Өз халкыңың арасында ялан геп гездирме, адалатсыз хөкүм зерарлы илдешиңе ховп абанян болса, шаят онуң аркасында дурсун. Мен Ребдирин.

¹⁷ Йүрегиңде илдешиңи йигренме, гүнәсини онуң йүзүне айт, ёгсам сенем гүнәкәр боларсың.

¹⁸ Өз халкыңдан өч алма, оларың хич бири бабатда ичиңде китүв саклама. Гайтам, якыныңы өзүңи сөйшүң ялы сөй. Мен Ребдирин.

¹⁹ Сиз Мениң парзларымы берҗай эдиң. Мал-гараларыңы башга гөрнүшдәки маллар билен чакнышдырма. Экин мейданыңда ики хили тохумы биле экме ве ики хили матадан тикилен эшик гейме.

²⁰ Эгер бир адам башга бирине адагланан, ызына сатын алынмадык я-да азат эдилмедик гырнак билен ятса, онда оларың икисине-де җеза берилсин, йөне өлдүрилмесин. Чүнки бу гырнак азат эдилен дәлдир.

²¹ Ол адам өзи үчин Реббе йүз тутулян чадырың агзына Реббе язык гурбанлыгы хөкмүнде бир гоч гетирсин.

²² Онсоң руханы Реббиң хузурында бу язык гурбанлыгының гочы билен, оны эден гүнәсинден сапласын ве Худай гүнәлиниң эден гүнәсини гечер.

²³ Сиз Кенган юрдуна гелип, иймит үчин хер хили мивели агачлары отурданыңызда, илкинҗи үч йылың мивелеринден иймеклик гадаган эдилсин, олары иймәң.

²⁴ Дөрдүнҗи йыл болса хемме мивелер алкыш хөкмүнде Реббе багыш эдилсин.

²⁵ Бәшинҗи йыл велин, сиз мивели агачларың мивесинден ийип билерсиңиз, олар сизе бол миве берер. Худайыңыз Реб Мендирин.

²⁶ Хич бир эти ганы билен иймәң. Сиз пал атмаң, җадыгөйлик этмәң.

²⁷ Сачыңызың гыраларыны гыркып, сакгалыңызы тимарламаң.

²⁸ Мерхум үчин бедениңизе тыг чекмәң, өзүңизи тагмаламаң. Мен Ребдирин.

²⁹ Гызларыңызы лолучылыга сатып, олары биабрай этмәң. Эгер сиз шейле этсеңиз, юрт зынахорлыга берлип, ол азгынлыкдан долар.

³⁰ Сабат гүнүмиң канунларыны ерине етирип, мукаддес өйүме хормат гоюң. Мен Ребдирин.

³¹ Җадыгөйлере ве палчылара йүз тутмаң. Олардан маслахат сорап, өзүңизи харам этмәң. Худайыңыз Реб Мендирин.

³² Улы яшулының өңүнде дик дуруң, гаррыны сылаң, Худайыңыздан горкуң. Мен Ребдирин.

³³ Юрдуңызда өз араңызда яшаян гелмишеклере сүтем этмәң.

³⁴ Араңызда яшаян гелмишеклер сизиң үчин илдешиңиз ялы болсун. Олары өзүңизи сөйшүңиз ялы сөйүң, чүнки сизем Мүсүр илинде гелмишек болупдыңыз. Худайыңыз Реб Мендирин.

³⁵ Сиз узынлык өлчәниңизде, чекимде я-да санагда хич кими алдамаң.

³⁶ Сиз хак терезилери, хак өлчег дашларыны, хак өлчеглери уланың. Сизи Мүсүр юрдундан чыкаран Худайыңыз Реб Мендирин.

³⁷ Сиз Мениң әхли парзларымы, әхли хөкүмлерими саклап, олары берҗай эдиң. Мен Ребдирин“».