Lewiler 18 - Мукаддес Китап

18‑нҗи бап Гадаган эдилйән җынс гатнашыклары

¹ Реб Муса шейле дийди:

² «Ысрайыл халкына шейле дий: „Худайыңыз Реб Мендирин.

³ Сиз яшан ериңиз болан Мүсүр юрдуның ве сизи инди алып барян юрдум болан Кенганың адатларына эермәң.

⁴ Сиз Мениң хөкүмлериме, парзларыма эерип, олары берҗай эдиң. Худайыңыз Реб Мендирин.

⁵ Мениң парзларымы, хөкүмлерими берҗай эдиң. Олары берҗай эден аман галар. Мен Ребдирин.

⁶ Хич бириңиз өз мәхрем гарындашыңыз билен җынс гатнашыгыны этмәң. Мен Ребдирин.

⁷ Өз эҗең билен җынс гатнашыгыны эдип, какаңы намыса гойма. Ол сениң эҗеңдир, сен онуң билен җынс гатнашыгыны этмели дәлсиң.

⁸ Какаңың бейлеки аяллары билен-де җынс гатнашыгыны эдип, какаңы намыса гойма.

⁹ Исле бир өйде, исле башга ерде доглан болсун – пархы ёк, өз аял доганың билен я-да какаңың я-да эҗеңиң гызы билен җынс гатнашыгыны этме.

¹⁰ Өз оглуңдан болан гыз агтыгың я-да өз гызыңдан болан гыз агтыгың билен җынс гатнашыгыны этме, чүнки сен олары биабрай этмек билен, өзүңи-де биабрай эдйәрсиң.

¹¹ Өвей энеңден болан өвей аял доганың билен җынс гатнашыгыны этме, чүнки ол сениң какаңдан өнен аял доганыңдыр.

¹² Өз эҗекең билен җынс гатнашыгыны этме, ол сениң какаңың аял доганыдыр.

¹³ Дайзаң билен җынс гатнашыгыны этме, чүнки ол сениң эҗеңиң аял доганыдыр.

¹⁴ Өз гелнеҗеңе голайлашып, онуң билен җынс гатнашыгыны этме, ол сениң гелнеҗеңдир.

¹⁵ Өз гелниң билен җынс гатнашыгыны этме, ол сениң оглуңың аялыдыр.

¹⁶ Өз доганың аялы билен җынс гатнашыгыны этме, сен өз доганыңы намыса гоярсың.

¹⁷ Бир аялың хем өзи, хем гызы билен җынс гатнашыгыны этме; бир аялың хем өзи хем гыз агтыгы билен җынс гатнашыгыны этме. Олар сениң мәхрем гарындашларыңдыр, бу азгынлыкдыр.

¹⁸ Аялың дирикә, онуң уясыны оңа гүни эдип алма ве онуң билен җынс гатнашыгыны этме.

¹⁹ Айбашы гөрйән аял билен җынс гатнашыгыны этме.

²⁰ Ёлдашың аялы билен җынс гатнашыгыны эдип, өзүңи харам этме.

²¹ Өз перзентлериңден хич бирини Молек буты үчин гурбанлык этме. Чүнки шейле этмек билен сен өз Худайың адына ыснат гетирерсиң. Мен Ребдирин.

²² Аял билен җынс гатнашыгыны эдишиң ялы, эркек билен җынс гатнашыгыны этме, бу неҗисликдир.

²³ Хич бир эркек я-да аял хайван билен җынс гатнашыгыны эдип, өзүни харам этмесин, бу азгынлыкдыр.

²⁴ Шу неҗисликлериң хич бири билен гүнә этмәң, чүнки сизиң өңүңизден ковян миллетлерим шу пис ишлери зерарлы харам болдулар.

²⁵ Шейдип, юрт харама чыкды. Мен юрды этмишлери үчин җезаландырдым. Юрт өз илатындан йүз дөндерди.

²⁶ Эмма сиз Мениң парзларымы, хөкүмлерими берҗай эдип, бу неҗис ишлери этмәң. Ерли халк-да, араңызда яшаян гелмишеклер-де шейле пис ишлери этмесинлер.

²⁷ Чүнки сизден өң бу юртда яшан илат бу неҗисликлериң барыны этди ве юрт харама чыкды.

²⁸ Эгер сизем юрды харама чыкарсаңыз, озалкы миллетден йүз дөндериши ялы, юрт сизден-де йүз дөндерер.

²⁹ Кимде-ким бу неҗисликлерден бирини этсе, ол өз халкындан четлешдирилсин.

³⁰ Сизден өңкүлериң эден неҗисликлерини гайталамазлыгыңыз үчин, өзүңизи шу затлар зерарлы харам этмезлигиңиз үчин, Мениң буйругымы берҗай эдиң. Худайыңыз Реб Мендирин“».