Lewiler 17 - Мукаддес Китап

17‑нҗи бап Ганың мукаддеслиги

¹ Реб Муса шейле дийди:

² «Харуна, онуң огулларына ве бүтин ысрайыл халкына айт, Мениң олара табшырыгым шейледир:

^3-4 „Эгер ысрайыллардан бири өкүзчәни, гузыны я-да гечини Реббе гурбанлык хөкмүнде хөдүрлемек үчин, йүз тутулян чадырының агзына гетирмән, онуң өзи гурбанлык малының дамагыны дүшелгәниң ичинде я-да дашында чалса, ол кануны бозандыр. Чүнки ол гурбанлык малының ганыны харам ере дөкди ве шонуң үчин-де ол халкдан четлешдирилсин.

⁵ Бу табшырык ысрайыл халкының ачык мейданда гурбанлыклар бермегини тогтадар. Бу ысрайыл халкының өз гурбанлыкларыны Реббе йүз тутулян чадырың агзындакы рухана гетирип бермеги үчиндир. Руханы ол гурбанлыклары Реббе саламатлык гурбанлыклары хөкмүнде хөдүр эдер.

⁶ Руханы ганы Реббе йүз тутулян чадырың агзындакы Реббиң гурбанлык сыпасына серпсин ве ягы Реббе якымлы ыс чыкармак үчин яксын.

⁷ Ысрайыл халкы мундан бейләк Реббе икилик эдип, гурбанлыкларыны бут эркечлерине хөдүр этмесинлер. Бу олара несилден-несле эбедилик дүзгүн болсун“.

^8-9 Мундан башга-да олара шуны табшыр: „Ысрайыл халкындан я-да оларың арасында яшаян гелмишеклерден бири якма гурбанлык я-да ислендик башга гурбанлык берип, оны Реббе хөдүр этмек үчин, Реббе йүз тутулян чадырың агзына гетирмесе, ол адам өз халкындан четлешдирилсин.

¹⁰ Эгер ысрайыл халкындан я-да оларың арасында яшаян гелмишеклерден бири ган ийсе, Мен ондан йүз өврерин ве оны өз халкындан четлешдирерин.

¹¹ Чүнки хер бир җандарың җаны онуң ганындадыр. Шоңа гөрә-де, Мен ганы сизе гурбанлык сыпасында җанларыңызы гүнәлериңизден сапламагыңыз үчин бердим, чүнки сизи гүнәлериңизден саплаян гандыр.

¹² Шонуң үчин Мен ысрайыл халкына шейле дийдим: ‘Сизиң хич бириңиз я-да араңызда яшаян гелмишеклерден хич бири ган иймесин’.

¹³ Ысрайыл халкындан я-да араңызда яшаян гелмишеклерден бири ийилйән хайваны я-да гушы авласа, ол онуң ганыны акдырып, үстүни топрак билен гөмсүн.

¹⁴ Чүнки хер бир җандарың җаны ганындадыр. Шонуң үчин Мен ысрайыл халкына шейле дийдим: ‘Хич бир җандарың ганыны агзыңыза алмаң, чүнки хер бир җандарың җаны онуң ганындадыр’. Оны иен Мениң халкымдан четлешдирилсин.

¹⁵ Харам өлен я-да йыртыҗыларың парчалан хайванының этини иен киши өзүниң ерли халкдан я-да гелмишекдигине гарамаздан, гейимлерини ювсун, сува дүшүнсин. Ол агшама ченли харамдыр ве соңра тәмиз болар.

¹⁶ Эгер ол гейимлерини ювмаса я-да сува дүшмесе, онда ол өз җезасыны чекмели“».