Lewiler 16 - Мукаддес Китап

16-нҗы бап Гүнәден сапланма гүни

^1-2 Харуның мукаддес дәл от билен Реббиң хузурына якынлашандыклары себәпли өлен ики оглуның өлүминден соң, Реб Муса шейле дийди: «Доганың Харуна айт, ол тутының аңырсына – иң мукаддес отага ислән вагты гирмесин, ёгсам ол өлер. Чүнки Мен Әхт сандыгының гапагының үстүнде булут болуп гөрүнйәндирин.

³ Харун илки билен гүнә гурбанлыгы үчин бир өкүзчәни ве якма гурбанлыгы үчин бир гочы гурбанлык бермезден өң иң мукаддес отага гирмели дәлдир.

⁴ Харун иң мукаддес отага гирмезинден өң сува дүшүнип, непис зыгыр матадан тикилен мукаддес доны гейсин. Донуң ашагындан зыгыр матадан тикилен ички гейимлери гейсин ве билине зыгыр матадан эдилен гушагы гушанып, келлесине зыгыр матадан селле орансын.

⁵ Ысрайыл халкы болса гүнә гурбанлыгы үчин ики эркеҗи ве якма гурбанлыгы үчин бир гочы рухана гетирип берсин.

⁶ Харун өзи үчин гүнә гурбанлыгы хөкмүнде бир өкүзчәни хөдүрләп, өзүни ве машгаласыны гүнәлеринден сапласын.

⁷ Соң ол ики эркеҗи алып, Реббиң хузурына, Реббе йүз тутулян чадырың агзына гетирсин.

⁸ Онсоң Харун ики эркеч үчин биҗе атсын: бир эркеч Реббе гурбанлык хөкмүнде хөдүрленсин, бейлекиси болса гүнә алып гидйән эркеч болар.

⁹ Харун Реббе хөдүр эдилмели эркеҗи гетирип, гүнә гурбанлыгы хөкмүнде хөдүрлесин.

¹⁰ Гүнә алып гидйән эркеч болса халкы гүнәсинден сапламак үчин, дирилигине Реббиң хузурына гетирилип, соңра чөле ковулсын.

¹¹ Харун өзи үчин гүнә гурбанлыгы хөкмүнде бир өкүзчәни хөдүрләп, өзүни ве машгаласыны гүнәлеринден сапласын. Ол өзи үчин гүнә гурбанлыгы хөкмүнде бу өкүзчәниң дамагыны чалсын.

¹² Харун Реббиң хузурындакы гурбанлык сыпасында янян одуң көзлеринден долдурылан күл атары ве оврадылан якымлы ыслы түтетгиден ики гысым алып, иң мукаддес отага гирсин.

¹³ Якымлы ыслы түтетгиниң түссеси Әхт сандыгының гапагының үстүни бүрәр ялы, Харун якымлы ыслы түтетгини Реббиң хузурында ода атсын, ёгсам ол өлер.

¹⁴ Соңра ол өкүзчәниң ганындан алып, оны бармагы билен Әхт сандыгының гапагының үстүне ве Әхт сандыгының өңүне еди гезек сепелесин.

¹⁵ Соңра Харун халк үчин гүнә гурбанлыгына ниетленен эркеҗиң дамагыны чалып, онуң ганыны иң мукаддес отага гетирсин. Онуң ганыны-да, өкүзчәниң ганыны эдиши ялы, Әхт сандыгының гапагының үстүне ве өңүне сепелесин.

¹⁶ Ысрайыл халкының харамлыклары ве оларың бар этмишлери, гүнәлери зерарлы Харун иң мукаддес отагы халалласын. Ол Реббе йүз тутулян өйи-де халалласын, чүнки Реббе йүз тутулян бу өй мурдарлыкдан долы дүшелгәниң ортарасындадыр.

¹⁷ Харун гүнәден сапламак үчин, иң мукаддес отага гирип, өзүни, машгаласыны ве бүтин ысрайыл халкыны гүнәлеринден саплап, дашарык чыкянча, Реббе йүз тутулян отагда хич ким болмасын.

¹⁸ Соңра ол чыкып, Реббиң хузурындакы гурбанлык сыпасыны халалласын. Өкүзчәниң ве эркеҗиң ганындан алып, гурбанлык сыпасының шахларына чалсын.

¹⁹ Ол бармаклары билен еди сапар гурбанлык сыпасының үстүне ган сепеләп, оны ысрайыл халкының харамлыкларындан тәмизләп, мукаддес этсин.

²⁰ Харун иң мукаддес отагы, Реббе йүз тутулян өйи ве гурбанлык сыпасыны халалландан соң, дири эркеҗи Реббиң хузурына гетирсин.

²¹ Онсоң Харун эллерини дири эркеҗиң башына гоюп, ысрайыл халкының бар писликлерини, этмишлерини ве гүнәлерини боюн алсын. Руханы шейле этмек билен халкың гүнәсини эркеҗе гечирип, оны йөрите чөле бошадып ибермек үчин белленен адам билен чөле иберсин.

²² Эркеч оларың әхли языкларыны гөтерип, адам аягы секмедик бир ере әкидер. Яңкы белленен адам эркеҗи бошадып чөле иберсин.

²³ Шондан соң Харун Реббе йүз тутулян өе гирсин-де, иң мукаддес отага гиренинде геен непис зыгыр матадан тикилен лыбасларыны чыкарып, олары иң мукаддес отагда гойсун.

²⁴ Харун мукаддес ерде сува дүшүнип, өзүниң гүнделик геййән гейимлерини гейсин. Соңра чыкып, өзи үчин ве халк үчин якма гурбанлыкларыны хөдүрләп, өзүни хем-де халкы гүнәлеринден сапласын.

²⁵ Ол гүнә гурбанлыгының ягыны гурбанлык сыпасында яксын.

²⁶ Гүнә алып гидйән эркеҗи чөле гойберен адам гейимлерини ювуп, сува дүшүненинден соң, ол дүшелгә гирип билер.

²⁷ Гүнә гурбанлыгы хөкмүнде хөдүрленен ве гүнәден сапламак үчин ганлары иң мукаддес отага гетирилен өкүзче билен эркеҗиң ләшлери дүшелгәниң дашына чыкарылсын. Оларың дериси, эти ве гарын-гаҗагы якылсын.

²⁸ Олары якан адам гейимлерини ювуп, сува дүшүненинден соң, ол дүшелгә гирип билер.

²⁹ Бу сизиң үчин эбедилик дүзгүн болсун: единҗи айың онунҗы гүни сиз гиҗе-гүндиз агыз бекләп, ишлемәң. Шол гүн ерли халк-да, араңызда яшаян гелмишеклер-де ишлемесин.

³⁰ Чүнки шол гүн сиз гүнәлериңизден тәмизленерсиңиз. Реб сизи әхли гүнәлериңизден тәмизләр.

³¹ Ол гүн Сабат гүни болуп, сизиң үчин долы дынчлык гүнүдир. Шол гүн сиз гиҗе-гүндиз агыз бекләң. Бу сизиң үчин эбедилик дүзгүн болсун.

³² Атасының ерине руханылыга белленип, багыш эдилен руханы непис зыгыр матадан тикилен мукаддес лыбасларыны гейип, сизи гүнәлериңизден сапласын.

³³ Ол иң мукаддес отагы, Реббе йүз тутулян өйи, гурбанлык сыпасыны халаллап, руханылары ве бүтин ысрайыл халкыны гүнәлеринден сапласын.

³⁴ Ысрайыл халкыны әхли гүнәлеринден йылда бир гезек сапламак сизиң үчин эбедилик дүзгүн болсун». Муса Реббиң табшырышы ялы этди.