Lewiler 15 - Мукаддес Китап

15‑нҗи бап Адамы мурдар эдйән затлар

¹ Реб Муса билен Харуна шейле дийди:

² «Ысрайыл халкына шейле дий: „Бир эркегиң җынс агзаларындан сувуклык акян болса, онда ол адам харамдыр.

³ Сувуклык акмасы бар адамың харамлыгы шундан ыбаратдыр: онуң эркеклик агзасындан сувуклыгың акмагы довам эдйәнем болса, этмейәнем болса, ол харамдыр.

⁴ Онуң ятян ёрган-дүшеги, үстүнде отурян ислендик зады харапдыр.

⁵ Онуң ёрган-дүшегине галташан хер кес гейимлерини ювсун, сува дүшүнсин. Ол агшама ченли харамдыр.

⁶ Сувуклык акмасы болан адамың отуран еринде отуран хер кес гейимлерини ювсун, сува дүшүнсин. Ол агшама ченли харамдыр.

⁷ Сувуклык акмасы бар адамың беденине галташан хер кес гейимлерини ювсун, сува дүшүнсин. Ол агшама ченли харамдыр.

⁸ Эгер сувуклык акмасы бар адам тәмиз адамларың үстүне түйкүрсе, олар гейимлерини ювсунлар, сува дүшүнсинлер. Олар агшама ченли харамдырлар.

⁹ Сувуклык акмасы бар адамың мүнен ислендик эери-де харапдыр.

¹⁰ Сувуклык акмасы бар адамың отуран ислендик задына галташан адам агшама ченли харамдыр. Харам адамың отуран ислендик задыны гөтерен гейимлерини ювсун, сува дүшсүн. Ол агшама ченли харамдыр.

¹¹ Сувуклык акмасы бар адам элини ювман бирине галташса, ол адам гейимлерини ювсун, сува дүшүнсин. Ол агшама ченли харамдыр.

¹² Сувуклык акмасы бар адамың эллән ислендик тоюн габы дөвүлсин, агачдан эдилен гап болса, ол ювулсын.

¹³ Сувуклык акмасы бар адам кеселден гутулансоң, тәмизленмек үчин еди гүни санап гечирсин. Ол гейимлерини ювуп, акар сува дүшсүн. Шондан соң ол тәмиз болар.

¹⁴ Секизленҗи гүн ол ики саны гумрыны я-да ики кепдерини Реббиң хузурына, Реббе йүз тутулян чадырың агзына гетирип, олары рухана берсин.

¹⁵ Руханы гушларың бирини гүнә гурбанлыгы, бейлекисини болса, якма гурбанлыгы үчин хөдүр этсин. Шейдип, Реббиң хузурында руханы ол адамы сувуклык акмасы зерарлы болан харамлыкдан тәмизлесин.

¹⁶ Эгер хайсыдыр бир эркегиң тохумы акса, ол адам тутуш беденини ювсун. Ол агшама ченли харамдыр.

¹⁷ Матадан я-да дериден эдилен зада тохум деген болса, ол сув билен ювулсын. Ол зат агшама ченли харапдыр.

¹⁸ Эркек аялына янашып, ондан тохум акса, эркегем, аялам сува дүшүнсинлер. Олар агшама ченли харамдырлар.

¹⁹ Айбашы гөрйән аял еди гүне ченли харамдыр. Ким оңа галташса, ол агшама ченли харамдыр.

²⁰ Айбашы гөрйән дөврүнде аялың дүшенип ятан хер зады харап болар. Аялың отуран хер зады хем харапдыр.

²¹ Онуң дүшегине галташан адам гейимлерини ювсун, сува дүшүнсин. Ол агшама ченли харамдыр.

²² Ол аялың отуран задына галташан адам гейимлерини ювсун, сува дүшүнсин. Ол агшама ченли харамдыр.

²³ Ол аялың ёрган-дүшегими я-да үстүнде отуран зады – пархы ёк, оңа галташан адам агшама ченли харамдыр.

²⁴ Эгер эркек адам ол аяла янашса, аялың харамлыгы эркеге-де гечер ве ол еди гүне ченли харамдыр ве онуң ятан ёрган-дүшеги-де харапдыр.

²⁵ Эгер аялың ган акмасы айбашы гөрйән дөврүнден дашары бирнәче гүнләп довам этсе, ган акмасы кесилйәнчә, ол аял эдил айбашы гөрйән дөврүндәки ялы харамдыр.

²⁶ Онуң ган акмасы дөврүнде ятян ёрган-дүшеги, эдил айбашы гөрйән дөврүндәки ёрган-дүшеги ялы харам хасаплансын. Аялың отуран ислендик зады онуң айбашы гөрйән дөврүндәки ялы харамдыр.

²⁷ Бу затлара галташан хер кес-де харам болар. Ол эшиклерини ювуп, сува дүшүнсин. Ол агшама ченли харамдыр.

²⁸ Аялың ган акмасы кесиленден соң, арадан еди гүн гечсин. Диңе шондан соң, ол тәмиз болар.

²⁹ Секизинҗи гүн ол ики саны гумрыны я-да ики кепдерини алып, Реббиң хузурына, Реббе йүз тутулян чадырың агзына гетирип, олары рухана берсин.

³⁰ Руханы оларың бирини гүнә гурбанлыгы, бейлекисини-де, якма гурбанлыгы хөкмүнде хөдүрләп, ган акмасы зерарлы харам аялы Реббиң хузурында харамлыгындан тәмизлесин.

³¹ Шейдип, харамлыклары зерарлы, мукаддес чадырдан дашда болмакларыны ысрайыл халкына дуйдурың. Маңа йүз тутулян өйи хараплап, оларың өзлери хем мурдарлыкда өлмесинлер.

^32-33 Эркеклик җынсындан сувуклык я-да тохум акып харам болан киши айбашы гөрйән аял, сувуклык акмасы болан эркек я-да аял ве харам аяла янашан эркек хакындакы кадалар шулардан ыбаратдыр“».