Lewiler 14 - Мукаддес Китап

14‑нҗи бап Тәмизлениш хакында

¹ Реб Муса шейле дийди:

² «Ёканчлы дери кеселли адамың тәмизленйән дөврүндәки кадасы шейледир: ёканчлы дери кеселлини руханының янына гетирсинлер.

^3-4 Руханы дүшелгәниң дашына чыкып, дери кеселлини гөзден гечирсин. Эгер дери кеселли адам кеселден гутулан болса, руханы тәмизленмели адам үчин ики саны дири халал гушы, кедр агаҗының бөлегини, гойы гызыл реңкли сапагы ве кәкилик оты гетирмеклерини буюрсын.

⁵ Руханы гушларың бириниң ичи чешме сувлы тоюн габының үстүнде союлмагыны буюрсын.

⁶ Онуң өзи болса дири гушы, кедр агаҗының бөлегини, гойы гызыл реңкли сапагы ве кәкилик отуны алып, олары чешме сувуның үстүнде өлдүрилен гушуң ганына батырсын.

⁷ Онсоң руханы дери кеселинден тәмизленмели адамың үстүне гандан еди гезек сепеләп, оны тәмиз дийип ыглан этсин. Соңра ол гушы ачык мейдана учурып гойберсин.

⁸ Тәмизленмели адам гейимлерини ювуп, эндамындакы әхли түйлерини сырып ювунсын. Шонда ол тәмиз болар. Соңра ол дүшелгә гирсин, йөне еди гүн гечйәнчә, өз чадырына гирмесин.

⁹ Единҗи гүн ол сачыны, сакгалыны, гашыны, эндамындакы әхли түйлерини сырсын. Соңра ол гейимлерини ювуп, сува дүшүнсин. Шонда ол тәмиз болар.

¹⁰ Секизленҗи гүн ол адам ики саны бир яшар шикессиз гочы, бир саны шикессиз бир яшар гузыны, зейтун ягына гарылан ондан үч батмана барабар сайлама бугдай унуны ве бир шакәсе зейтун ягыны галла садакасы хөкмүнде рухана гетирип берсин.

¹¹ Тәмизлейән руханы тәмизленйән адамы шу затлар билен билеликде Реббиң хузурына, Реббе йүз тутулян чадырың агзына гетирсин.

¹² Руханы гузуларың бирини алып, язык гурбанлыгы хөкмүнде бир шакәсе зейтун ягы билен биле, олары Реббе гөтерме садакасы хөкмүнде ёкары галдырсын.

¹³ Ол гузыны мукаддес ерде – гүнә хем-де якма гурбанлык малының союлян еринде сойсун. Чүнки язык гурбанлыгы-да, эдил гүнә гурбанлыгы ялы, руханыныңкы болсун. Бу өрән мукаддес гурбанлыкдыр.

¹⁴ Руханы язык гурбанлыгының ганындан бираз алып, оны тәмизленйән адамың саг гулагының юмшак ерине, саг элиниң башам бармагына ве саг аягының башам бармагына чалсын.

¹⁵ Руханы шол бир шакәсе зейтун ягындан алып, оны өз чеп элиниң аясына гуйсун.

¹⁶ Онсоң чеп элиндәки яга саг элиниң бармагыны батырып, оны еди гезек Реббиң хузурында сепелесин.

¹⁷ Элинде галан ягдан руханы тәмизленйән адамың саг гулагының юмшак ерине, саг элиниң башам бармагына ве саг аягының башам бармагына, язык гурбанлыгының малының ганы сүртүлен ере чалсын.

¹⁸ Элиндәки ягың галаныны руханы тәмизленйән адамың келлесине чалсын. Шейдип, руханы ол адамы Реббиң хузурында харамлыгындан тәмизлесин.

¹⁹ Харам адамы харамлыгындан тәмизлемек үчин, руханы гүнә гурбанлыгыны хөдүр этсин. Соңра ол якма гурбанлыгының малының дамагыны чалсын.

²⁰ Руханы гурбанлык сыпасының үстүнде якма гурбанлыгыны ве галла садакасыны берсин. Шейдип, руханы оны харамлыгындан тәмизлесин. Шондан соң ол адам тәмиз болар.

²¹ Эгер ол адам гарып болуп, бу затлара гурбы чатмаса, ол харамлыгындан тәмизленмек үчин, Реббе гөтерме садака хөкмүнде бир яшар гочы, галла садакасы үчин зейтун ягына гарылан бир батманың ондан бир бөлегине барабар болан сайлама бугдай унуны ве бир шакәсе зейтун ягыны ол рухана гетирип берсин.

²² Шейле хем ол ики гумрының я-да ики кепдериниң бирини гүнә гурбанлыгы, бейлекисини якма гурбанлыгы үчин хөдүр этсин.

²³ Секизленҗи гүн гурбанлык берйән адам бу гурбанлыклары өзүниң тәмизленмеги үчин Реббе йүз тутулян чадырың агзына, Реббиң хузурына гетирип, олары рухана берсин.

²⁴ Руханы язык гурбанлыгының гочуны ве бир шакәсе зейтун ягыны алып, олары Реббе гөтерме садакасы хөкмүнде ёкары галдырсын.

²⁵ Руханы язык гурбанлыгының гочуны союп, онуң ганындан биразрагыны алып, оны тәмизленйән адамың саг гулагының юмшак ерине, саг элиниң ве саг аягының башам бармакларына чалсын.

²⁶ Руханы зейтун ягындан биразрагыны, өзүниң чеп элиниң аясына гуйсун.

²⁷ Онсоң руханы саг элиниң бармагыны чеп элиндәки яга батырып, оны еди гезек Реббиң хузурында сепелесин.

²⁸ Руханы элиндәки ягдан тәмизленйән адамың саг гулагының юмшак ерине, саг элиниң ве саг аягының башам бармакларына, язык гурбанлыгының гочуның ганы сүртүлен ере чалсын.

²⁹ Элиндәки ягың галаныны руханы Реббиң хузурында тәмизленйән адамы харамлыгындан тәмизлемек үчин, онуң келлесине чалсын.

^30-31 Соңра руханы ол адамың гурбуның чатып гетирен гумруларының я-да кепдерилериниң бирини гүнә гурбанлыгы, бейлекисини болса якма гурбанлыгы хөкмүнде галла садакасы билен бирликде хөдүр этсин. Шейдип, руханы тәмизленйән адамы Реббиң хузурында харамлыгындан тәмизлесин.

³² Дери кеселли болуп, тәмизленмеги үчин садака бермәге гурбы чатмаян кишилер үчин када шулардан ыбаратдыр».

Җайлардакы зең хакда

³³ Реб Муса билен Харуна шейле дийди:

^34-35 «Сиз Мениң мүлк эдип берйән Кенган юрдума бараныңыздан соң, Мен сизиң өйлериңизиң биринде зең дөретсем, шол өйүң эеси руханының янына гелип: „Өйүмде зең пейда болды“ дийсин.

³⁶ Руханы өйи гөзден гечирмәге гитмезден өң, өйүң ичиндәки бар затларың даша чыкарылмагыны буюрсын, ёгсам өйүң ичиндәки әхли зат харапланар. Соңра руханы өйи гөзден гечирмәге гитсин.

^37-38 Ол зең ери гөзден гечирсин. Эгер зең өйүң диварында болуп, яшылымтыл я-да гызылымтыл менеклер гөрнүшинде диварда чуң орнан болса, руханы өйден даша чыкып, өйи еди гүнләп гулплап гойсун.

^39-40 Единҗи гүн руханы гелип, өйи ене гөзден гечирсин. Эгер зең өйүң диварларына яйрап гиден болса, руханы зең яйран дашлары айырдып, олары галаның дашындакы харап затларың зыңылян ерине ташлатсын.

⁴¹ Руханы өйүң ичиниң сувагыны гырдырып алып, оны галаның дашындакы харап затларың зыңылян ерине ташлатсын.

⁴² Айрылан дашларың ерине башга дашлар өрүлип, өй тәзеден сувалсын.

^43-44 Дашлары сөкүлип алнып, сувагы гырлып айрылып, тәзеден суваландан соңам ол өйде зең пейда болса, руханы барып, ол өйи ене-де гөзден гечирсин. Эгер зең өе яйран болса, ол өй харап сайылсын.

⁴⁵ Ол өй йыкылмалыдыр, онуң дашлары, агачлары ве өйүң әхли суваглары, галаның дашына, харап затларың зыңылян ерине чыкарылып ташлансын.

⁴⁶ Кимде-ким „өй япык“ дийлип ыглан эдилен дөвүрде оңа гирсе, ол агшама ченли харам сайылсын.

⁴⁷ Кимде-ким ол өйде ятса я-да нахарланса, ол гейимлерини ювсун.

⁴⁸ Өй суваландан соңра руханы гелип, өйи гөзден гечирсин. Эгер өе зең яйрамадык болса, руханы өйи тәмиз дийип ыглан этсин, чүнки бу зеңиң долы айрылдыгыдыр.

⁴⁹ Өйи халалламак үчин руханы ики саны гушы, кедр агаҗының бөлегини, гойы гызыл реңкли сапагы ве кәкилик отуны алсын.

⁵⁰ Гушларың бирини ичи чешме сувлы тоюн габың үстүнде өлдүрсин.

⁵¹ Онсоң кедр агаҗының бөлегини, кәкилиги, гойы гызыл реңкли йүпи дири гуш билен билеликде алып, олары чешме сувлы тоюн габының үстүнде өлдүрилен гушуң ганына батырсын-да, ганы еди гезек өйүң ичине сепелесин.

⁵² Шейдип, руханы өйи гушуң ганы, чешме сувы, дири гушы, кедр агаҗының бөлегини, кәкилик отуны ве гойы гызыл реңкли сапак билен халалласын.

⁵³ Руханы дири гушы галаның дашына чыкарып, оны ачык мейдана учурып гойберсин. Шейдип, ол өйи халалласын, шондан соң өй тәмиз болар.

^54-56 Хер хили дери кеселлери: гиҗилевүк, гейимде ве өйде пейда болан зең, дери пакгармасы, готур, менек ялы хер дүрли дери кеселлериң харапдыгыны я-да тәмиздигини кесгитлейән кадалар шулардан ыбаратдыр».