Lewiler 13 - Мукаддес Китап

13‑нҗи бап Дери кеселлери хакда

¹ Реб Муса ве Харуна шейле дийди:

² «Эгер кимдир бириниң дерисинде пакгарма, готур я-да менек пейда болуп, ол дери кеселине өврүлсе, ол адам руханы Харуның я-да онуң огулларының бириниң янына гетирилсин.

³ Руханы онуң эндамындакы дери кеселини барласын. Эгер дериниң кеселли ериниң гыллары агарып, ол дериден ашак гечен болса, онда бу дери кеселидир. Руханы дери кеселлини гөзден гечиренден соң, оны харам дийип ыглан этсин.

⁴ Эмма кеселлиниң эндамындакы менек ак болуп, ол дериниң астына гечмән, дериниң кеселли ериниң гыллары агармадык болса, онда руханы дери кеселлини еди гүнләп айры сакласын.

⁵ Единҗи гүн руханы дери кеселлини гөзден гечирсин. Эгер дери кесели эндама яйраман, өңкүлигине галан болса, онда руханы дери кеселлини ене-де еди гүнләп айры сакласын.

⁶ Единҗи гүнде руханы оны ене гөзден гечирсин. Эгер дери кесели солуп, эндама яйрамадык болса, руханы дери кеселлини тәмиз дийип ыглан этсин. Бу диңе готурдыр, ол адам гейимлерини ювсун ве диңе шондан соң ол тәмиз болар.

⁷ Йөне дери кеселли адам тәмизленмек үчин өзүни рухана гөркезенден соң, готур онуң эндамына яйрап уграса, ол ене-де руханының янына гелсин.

⁸ Руханы оны ене-де гөзден гечирсин. Эгер готур онуң эндамына яйран болса, руханы дери кеселлини харам дийип ыглан этсин. Бу дери кеселидир.

⁹ Эгер кимдир бири дери кеселине ёлукса, ол руханының янына гетирилсин.

^10-11 Руханы оны гөзден гечирсин. Эгер онуң дерисинде ак пакгарма болуп, онуң үстүндәки гыллар агарып, ачык яра дөрән болса, бу өтүшен ёканчлы дери кеселидир. Руханы дери кеселлини харам дийип ыглан этсин. Рухана кеселлини айры сакламак герек дәлдир, чүнки ол харамдыр.

^12-13 Эмма дери кесели эндама яйрап, ол кеселлиниң башындан аягына ченли бүтин эндамыны тутан болса, руханы оны гөзден гечирсин. Эгер дери кесели онуң тутуш эндамына яйран болса, руханы кеселлини тәмиз дийип ыглан этсин. Диңе бүтин эндамының агаранлыгы үчин кеселли тәмиздир.

¹⁴ Эмма кеселлиниң эндамындакы яраның ичиндәки эт гызаран болса, ол шол гүнүң өзүнде харам дийип ыглан эдилсин.

¹⁵ Руханы оны ене-де гөзден гечирсин. Эгер руханы деридәки, яраның ичинде гып-гызыл эт гөрсе, ол дери кеселлини харам дийип ыглан этсин. Яраның ичинде гызаран эт харапдыр, чүнки ол дери кеселидир.

¹⁶ Эмма яраның ичинде гөгерен гып-гызыл эт агарса, ол дери кеселли адам руханының янына гелсин.

¹⁷ Руханы оны гөзден гечирсин. Эгер яраның ичинде гөгерен гып-гызыл эт агаран болса, руханы дери кеселлини тәмиз дийип ыглан этсин. Ол тәмиздир.

^18-19 Эгер бириниң эндамына чыбан чыкып, говулашандан соң чыбаның еринде ак пакгарма я-да гызылымтыл ак менек пейда болса, ол рухана гөркезилмелидир.

²⁰ Руханы оны гөзден гечирсин, эгер шол гызылымтыл ак менек дериден ашак гечип, ондакы гыллар агаран болса, руханы ол адамы харам дийип ыглан этсин. Ол чыбан чыкан ерден дөрән дери кеселидир.

²¹ Эмма руханы дери кеселлини гөзден гечиренде, гызылымтыл ак менегиң үстүндәки гыллар агармадык болса ве ол дериден ашак гечмедик болса, онда руханы дери кеселлини еди гүнләп айры сакласын.

²² Эгер гызылымтыл ак менек онуң бүтин эндамына яйран болса, руханы оны харам дийип ыглан этсин. Бу ёканчлы дери кеселидир.

²³ Эмма бу менек бир ерде болуп, эндама яйрамадык болса, онда бу чыбандан галан ыздыр. Руханы ол адамы тәмиз дийип ыглан этсин.

^24-25 Эгер кимдир бириниң эндамында янык болуп, ол янык ярасы гызылымтыл ак я-да чув-ак менеге өврүлсе, руханы оны гөзден гечирсин. Эгер менекдәки гыллар агарып, менек дериден ашак гечен болса, бу яныкдан дөрән ёканчлы дери кеселидир. Руханы ол адамы харам дийип ыглан этсин.

²⁶ Эмма руханы оны гөзден гечиренде, менекдәки гыллар агарман, менек дериден ашак гечмән, гайтам онуң реңки өчүшен болса, руханы ол адамы еди гүнләп айры сакласын.

²⁷ Единҗи гүн руханы оны гөзден гечирсин. Эгер менек эндама яйраян болса, руханы ол адамы харам дийип ыглан этсин. Бу дери кеселидир.

²⁸ Эмма бу менек бир ерде болуп, ол эндама яйраман, гайтам, онуң реңки өчүшен болса, бу ёканчлы дери кесели дәлдир. Руханы ол адамы тәмиз дийип ыглан этсин, чүнки бу янык ярасындан галан ыздыр.

^29-30 Эркек адамың я-да аялың келлесинде я-да эңегинде дери кесели пейда болса, руханы оны гөзден гечирсин. Эгер дери кесели дериден ашак гечип, ондакы гыллар инчеҗик, сары болса, руханы оны харам дийип ыглан этсин. Ол гиҗилевүкдир; ол келледе ве эңекде дөрән ёканчлы дери кеселидир.

³¹ Руханы гиҗилевүк кеселлини гөзден гечирсин. Эгер гиҗилевүк дериден ашак гечмедик болса ве онда гара гыллар ёк болса, онда руханы гиҗилевүкли адамы еди гүн айры сакласын.

^32-33 Единҗи гүн руханы гиҗилевүкли адамы гөзден гечирсин. Эгер гиҗилевүк онуң эндамына яйрамадык болса ве онда сары гыллар болман, гиҗилевүк дериден ашак гечмедик болса, ол кеселли адам сачыны сырсын, эмма гиҗилевүгиң үстүни сырмасын. Руханы яңкы гиҗилевүкли адамы ене-де еди гүн айры сакласын.

³⁴ Единҗи гүн руханы гиҗилевүк кеселлини гөзден гечирсин. Эгер гиҗилевүк эндама яйрамадык болса ве дериден ашак гечмедик болса, руханы оны тәмиз дийип ыглан этсин. Ол эшиклерини ювсун, шондан соң ол тәмиз болар.

^35-36 Эгер гиҗилевүк кеселли тәмиз дийлип ыглан эдиленден соң, гиҗилевүк онуң эндамына яйраса, руханы оны гөзден гечирсин. Эгер гиҗилевүк эндама яйран болса, онда руханы сары гыллары тапҗак болуп отурмасын, ол харамдыр.

³⁷ Эмма руханының пикириче гиҗилевүк өңки дуршуна галып, оңа гара гыллар чыкан болса, онда гиҗилевүк говулашандыр. Ол адам тәмиздир ве руханы оны тәмиз дийип ыглан этсин.

^38-39 Эркек адамың я-да аялың дерисинде ак менеклер пейда болса, руханы оны гөзден гечирсин. Эгер деридәки менеклер агымтыл болса, бу дериде өрен өргүндир, ол тәмиздир.

⁴⁰ Эгер бир адамың сачы дүшен болса, ол такыр келледир, эмма тәмиздир.

⁴¹ Эгер онуң маңлай сачы ве депе сачы дүшен болса, ол такыр келледир, эмма тәмиздир.

⁴² Эмма такыр келледе я-да маңлайда гызылымтыл ак менек пейда болса, бу онуң такыр келлесинде я-да маңлайында дөрән дери кеселидир.

^43-44 Руханы оны гөзден гечирсин. Эгер онуң такыр келлесиндәки я-да маңлайындакы ёкушян дери кесели ялы гызылымтыл ак менек болса, ол адам дери кеселлидир ве ол харамдыр. Руханы дери кеселлидиги үчин, ол адамы харам дийип ыглан этсин.

⁴⁵ Ёканчлы дери кесели болан адам сал-сал эгинбаш гейип, сачыны дарамасын ве эли билен агзыны тутуп: „Мен – харам, мен – харам“ дийип гыгырсын.

⁴⁶ Ёканчлы дери кесели айрылып гидйәнчә, ол харамдыр. Ол еке яшамалыдыр ве дүшелгәниң дашында болмалыдыр».

Зең хакда

^47-49 «Эгин-эшиге дегишли кадалар шейледир. Йүңден я-да непис зыгыр матадан тикилен эшикде, зыгыр сүйүмиң я-да йүңүң эршинде я-да аргаҗында болсун, дериде я-да дериден эдилен ислендик затда болсун – пархы ёк, онуң яшылрак я-да гызылрак өвүсйән ери бар болса, ол зеңдир ве ол рухана гөркезилмелидир.

⁵⁰ Руханы зеңли зады гөзден гечиренинден соң, оны еди гүнләп айры сакласын.

⁵¹ Единҗи гүнде руханы зеңли зады ене-де гөзден гечирсин. Эгер зең эшикде, эришде я-да аргачда, дериде я-да ислендик бир дериден эдилен затда болса, яйраян ёканчлы зеңдир ве ол харапланандыр.

⁵² Эришден тикилен болсун я-да аргачдан, йүңден я-да непис зыгыр матадан, я-да дериден – пархы ёк, руханы ол зең яйран эшиги ода яксын.

^53-54 Руханы оны гөзден гечиренинде, зең эшиге, эрше я-да аргаҗа, я-да дериден эдилен ислендик зада яйрамадык болса, руханы шол зеңли задың ювулмагыны буюрсын. Соңра оны ене-де еди гүнләп айры сакласын.

⁵⁵ Зең ёкушан зат ювландан соң, руханы оны гөзден гечирсин. Эгер зеңиң реңки үйтгемедик болса, хатда зең яйрамадык болса-да, ол харапланандыр. Зең эшигиң ичиндеми я-да дашында – пархы ёк, оны ода якың.

⁵⁶ Эгер руханы оны гөзден гечирйәркә, бу затлар ювландан соң зеңиң реңкиниң өчүшендигини гөрсе, ол зеңи эшикден, эришден я-да аргачдан, я-да дериден йыртып айырсын.

⁵⁷ Эгер бу зең эшикде, эришде я-да аргачда, я-да дериден эдилен бир затда пейда болуп, ол яйрап башласа, зеңли зады ода якың.

⁵⁸ Эмма эшик, эриш, аргач я-да дериден эдилен ислендик зат ювландан соң зең айрылан болса, онда ол икиленч ювулсын, шондан соң ол тәмиз болар.

⁵⁹ Тәмиз я-да харапланан дийип ыглан этмек үчин, йүң я-да непис зыгыр матадан тикилен эшикде, эришде, аргачда я-да дериден эдилен ислендик затда пейда болан зең барадакы кадалар шулардан ыбаратдыр».