Lewiler 12 - Мукаддес Китап

12‑нҗи бап Догрумдан соңкы тәмизлениш

¹ Реб Муса шейле дийди:

² «Ысрайыл халкына айт: „Эгер гөврели аял огул догурса, эдил айбашы гөрйән дөврүндәки ялы, ол аял еди гүнләп харамдыр.

³ Доглан чага секизленҗи гүн сүннет эдилсин.

⁴ Аялың гандан тәмизлениш дөври отуз үч гүн довам эдер. Ол өзүниң тәмизлениш дөври гутарянча, хич бир мукаддес зада галташмасын я-да мукаддес өе гирмесин.

⁵ Эгер аял гыз догурса, ол эдил айбашы гөрйән дөврүндәки ялы, ики хепделәп харамдыр. Онуң гандан тәмизлениш дөври алтмыш алты гүн довам эдер.

⁶ Огул үчинми я-да гыз үчин – пархы ёк, аял өзүниң тәмизлениш дөври тамамланандан соң, ол якма гурбанлыгы үчин биряшар токлыны ве гүнә гурбанлыгы үчин бир кепдерини я-да гумрыны Реббе йүз тутулян чадырың агзындакы рухана гетирип берсин.

⁷ Руханы бу якма гурбанлык җанлысыны Реббиң хузурында хөдүр эдип, ол аялы харамлыгындан тәмизлесин. Шондан соң ол аял ган акма харамлыгындан тәмизленер. Огул я-да гыз дограндыгына гарамаздан, чага догран аял үчин канун шейледир.

⁸ Эгер догран аялың токла гурбы чатмаса, онда ол ики гумрыны я-да ики кепдерини – бирини якма гурбанлыгы үчин, бейлекисини гүнә гурбанлыгы үчин гетирсин. Руханы-да ол аялы хөдүр эден якма гурбанлыгы билен харамлыгындан тәмизлесин. Шондан соң ол аял тәмиз болар“».