Lewiler 11 - Мукаддес Китап

11‑нҗи бап Халал ве харам җандарлар

¹ Реб Муса хем-де Харуна шейле дийди:

^2-3 «Ысрайыл халкына айт: „Гуры ерде яшаян җандарларың арасындан сизиң ийип билҗеклериңиз шулардыр: гошатойнаклы, гәвүшейән ислендик хайваны.

^4-6 Эмма гәвүш гайтарян хайванлардан я-да гошатойнаклы хайванлардан дүйәни, атялманы ве товшаны иймели дәлсиңиз, чүнки олар гәвүш гайтарярлар, эмма олар гошатойнаклы дәлдирлер, булар сизиң үчин харамдыр.

⁷ Гошатойнаклыдыгына гарамаздан, доңуз хем тойнагы ярыклы болса-да, гәвүш гайтармаяр, бу сизиң үчин харамдыр.

⁸ Сиз оларың этини иймәң ве ләшини-де эллемәң.

⁹ Сувда яшаян әхли җандарлардан шулары ийип билерсиңиз: акар сувда я-да деңиздедигине гарамаздан, йүзгүчли хем теңңели җандарларың ислендигини ийип билерсиңиз.

¹⁰ Сувда яшаян ислендик йүзгүчсиз ве теңңесиз сүйрениҗилер ве деңиздәки бейлеки кичи җандарларың әхлиси сизиң үчин неҗисдир.

¹¹ Бу җандарлар ысрайыл халкы үчин неҗислигине галсын. Оларың этини иймәң, оларың маслыгына галташмаң.

¹² Сувда яшаян йүзгүчсиз ве теңңесиз җандарларың бары сизиң үчин неҗисдир.

¹³ Гушлардан шу ашакдакылар сизиң үчин неҗисдир: бүргүт, гарагуш ве деря бүргүди;

^14-16 чайчаңңалак, лачының әхли гөрнүшлери, гарганың әхли гөрнүшлери, дүегуш, хүви, чарлак, гыргының әхли гөрнүшлери;

^17-19 байгуш, җүптүн, улы байгуш, ак байгуш, готан ве даззаркел, леглек, хокгарың әхли гөрнүшлери, хүйпүйпик ве ярганат.

²⁰ Дөрт аяклы, ганатлы мөр-мөҗеклериң хеммеси сизиң үчин неҗисдир.

²¹ Йөне дөрт аяклы ганатлы мөр-мөҗеклерден ерде бөкер ялы аягы богунлыларыны ийип билерсиңиз.

²² Олардан чекиртге гөрнүшлилери, чөл чекиртге гөрнүшлилери, җызлан гөрнүшлилери, яшыл чекиртге гөрнүшлилери ийип билерсиңиз.

²³ Эмма галан дөрт аяклы, ганатлы мөр-мөҗеклериң бары сизиң үчин неҗисдир.

²⁴ Кимде-ким оларың маслыгына галташса, ол агшама ченли харам сайылсын.

²⁵ Кимде-ким буларың маслыгының ислендик бөлегини гөтерсе, ол эшиклерини ювсун ве агшама ченли харам сайылсын.

²⁶ Тойнаклы болуп, эмма тойнагы ярык болмадык я-да гәвүш гайтармаян хер бир хайван сизиң үчин харамдыр.

²⁷ Дөрт аяклы җандарларың арасында пенҗесини ере уруп йөрейәнлериниң бары сизиң үчин харамдыр. Кимде-ким бу хайванларың маслыгына галташса, ол агшама ченли харам сайылсын.

²⁸ Оларың маслыгыны гөтерен адам эшиклерини ювсун, ол агшама ченли харам сайылсын. Чүнки бу хайванлар сизиң үчин харамдыр.

^29-30 Гурыер сүйрениҗилерден шулар: ялман, сычан, гөрнүшине гөрә улы сувулган, хажжык, земзен, сувулган, чәге сувулганы ве хамелеон сизиң үчин харамдыр.

³¹ Сүйрениҗи җандарлардан шулар сизе харамдыр. Кимде-ким оларың маслыгына галташса, ол агшама ченли харам сайылсын.

³² Буларың бириниң маслыгы бир задың үстүне гачса, шол зат харам болар. Ол ислендик уланылян зат: агач гап болсун, эгинбаш болсун, дери болсун, халта болсун – пархы ёк, олар сува сокулып чыкарылмалыдыр ве ол агшама ченли харам сайылмалыдыр. Шондан соң ол халал болар.

³³ Эгер бу җандарларың бириниң маслыгы ислендик тоюн габың ичине дүшсе, онуң ичиндәки әхли зат харапланар ве ол габы дөвүң.

³⁴ Ислендик иймит шулар ялы гапда ювулса, ол иймит харапланар. Шулар ялы гапдан ичилйән ислендик ичгилер-де харапланар.

³⁵ Оларың маслыгының бир бөлегиниң үстүне гачан ислендик зат харапланар. Тамдырдыгына я-да оҗакдыгына гарамаздан, ол йыкылмалыдыр. Олар харапдыр ве сизиң үчин хем харап болмалыдыр.

³⁶ Муңа гарамаздан, чешме я-да гуйы халаллыгына галар, эмма бу җандарларың маслыгына галташан ислендик адам ве ислендик зат харапланар.

³⁷ Эгер оларың маслыгының бир бөлеги, экилмек үчин айры гойлан ислендик тохумың үстүне гачса, ол халаллыгына галяндыр.

³⁸ Эмма оларың маслыгының бир бөлеги эзилен тохумың ичине гачса, онда тохум сизиң үчин харапдыр.

³⁹ Эгер халал җандарларың бири өлүп, онуң маслыгына галташан хер кес, агшама ченли харам сайылсын.

⁴⁰ Онуң этинден иен адам, эшиклерини ювсун ве ол агшама ченли харам сайылсын; онуң маслыгыны гөтерен адам эшиклерини ювсун ве ол агшама ченли харам сайылсын.

⁴¹ Гурыер сүйрениҗилериң бары сизиң үчин неҗисдир. Олар ийилмели дәлдир.

⁴² Сиз гарнында сүйшйән сүйрениҗилери, дөрт аяклы я-да көп аяклы сүйрениҗилери иймели дәлсиңиз. Чүнки олар сизиң үчин неҗисдирлер.

⁴³ Сүйренип йөрейән җандарлардан хайсыдыр бирини ийип, сиз өзүңизи харам этмәң.

⁴⁴ Худайыңыз Реб Мендирин. Шонуң үчин хем сиз тәмизленип, мукаддес болуң, чүнки Мен мукаддесдирин. Гурыер сүйрениҗилерини ийип, өзүңизи харам этмәң.

⁴⁵ Мен – Реб сизи Мүсүр топрагындан сизиң Худайыңыз болмак үчин алып гелдим. Сиз мукаддес болмалысыңыз, чүнки Мен мукаддесдирин“».

^46-47 Бу канун харам билен халалы, ийилйән җандар билен ийилмейән җандары бири-биринден тапавутландырмак үчин ниетленендир. Шейле хем ерде яшаян хайванлар, гушлар, сувда яшаян җандарлар, гурыер сүйрениҗилери хакындакы канундыр.