Колосиялылар 4 - Мукаддес Китап

4‑нҗи бап

¹ Эй, хоҗайынлар, гулларыңыз бабатда адыллыгы, деңлиги берҗай эдиң, себәби өзүңизиң хем гөкде Хоҗайыныңызың бардыгыны билйәнсиңиз.

Дүрли өвүтлер

² Ыхлас билен хемише Худая дога окаң, дога-дилегде шүкүр эдип, хүшгәр болуң.

³ Бизиң үчин хем дилег эдиң: Худайың сөзүни яйрадып, Месих барадакы сыры аян эдер ялы, Онуң Өзи бизе гапы ачып берсин. Ине, шонуң үчинем мен туссаглыкдадырын.

⁴ Бу сыры болмалысы ялы айдың беян этмегим үчин дилег эдиң.

⁵ Месихи дәллер биленем вагтыңызы пейдалы гечириң, пурсады элден бермәң.

⁶ Хер киме нәхили җогап бермелидигиңизи билер ялы, сөзүңиз хемише якымлы ве мазмунлы болсун.

Павлусың соңкы табшырыклары ве саламлар

⁷ Реббиң садык хызматкәри болан сөйгүли ишдешимиз хем доганымыз Тихик мен хакда сизе әхли зады хабар берер.

⁸ Ягдайымыз барада хабар бермек ве сизи рухландырмак үчин мен оны сизиң яныңыза ибердим.

⁹ Онуң билен биле яныңыза өз шәхериңизден болан, садык ве сөйгүли доганымыз Онесим-де барар. Олар сизе бу ерде болуп гечйән әхли вакалары гүррүң берерлер.

¹⁰ Мениң билен туссаглыкда болян ёлдашым Аристарх билен Барнабың егени Марк хем сизе салам ёллаяр. Марк барадакы буйруклары алансыңыз. Яныңыза барса, оны кабул эдиң.

¹¹ Юстус лакамлы Ешува хем сизе салам айдяр. Худайың Шалыгы угрунда зәхмет чекйән яхуды ишдешлерим диңе шулардыр. Олар маңа теселли берип гелйәрлер.

¹² Өз шәхериңизден болан, Иса Месихиң гулы Эпафра хем сизе салам ёллаяр. Худайың хер бир ислегини долы билмегиңиз ве иманда берк дуруп, кәмил болмагыңыз үчин, Эпафра ыхлас билен хемише Реббе дилег эдйәр.

¹³ Онуң сизиң үчин, шейле-де Лаодикиядакы ве Иераполисдәки иманлылар үчин арман-ядаман зәхмет чекйәндигине мен шаятдырын.

¹⁴ Сөйгүли достумыз лукман Лука билен Дема хем сизе салам ёллаяр.

¹⁵ Лаодикиядакы доганлара, Нимфа уямыза ве онуң өйүндәки иманлылар йыгнагына салам айдың.

¹⁶ Шу хат араңызда окаландан соң, оны Лаодикиядакы иманлылар йыгнагында хем окадың. Сиз хем Лаодикиядан гелен хаты окаң.

¹⁷ Архипа: «Реббиң табшыран хызматыны ахырына ченли долы битирҗекдигиңе ынамлы бол» дийип айдың.

¹⁸ Мен Павлус бу саламы өз элим билен язярын. Мениң туссаглыкдадыгымы ятдан чыкармаң. Худайың мерхемети сизе яр болсун!