Колосиялылар 3 - Мукаддес Китап

3‑нҗи бап Мукаддес яшайыш

¹ Шейлеликде, Месих билен дирелендигиңизе гөрә, гөклердәки затлары агтарың. Месих гөкде Худайың сагында отурандыр.

² Пикириңизи дүнъеви затлара дәл-де, гөкдәки затлара гөнүкдириң.

³ Чүнки сиз өленсиңиз, дурмушыңыз болса Месих билен биле Худайда гизленендир.

⁴ Месих сизиң дурмушыңыздыр. Ол аян боланда, сиз хем Онуң билен биле шөхратда аян боларсыңыз.

⁵ Шонуң үчин хем дүнъеви тебигатыңыза махсус болан азгынлыгы, ахлаксызлыгы, харам кейпи, пис хөвеслери ве бутпаразлык билен дең хасапланян ачгөзлүги өлдүриң.

⁶ Ине, хут шу затлар үчин Худайың гахар-газабы инйәндир.

⁷ Сиз хем бирвагтлар буларың арасында яшаныңызда шейле эдипдиңиз.

⁸ Инди болса гахар-газабы, яманлыкларың хеммесини өзүңизден айрып ташлаң. Агзыңыздан хич бир төхмет ве пайыш сөзлер чыкмасын.

⁹ Бири-бириңизе ялан сөзлемәң, себәби сиз көне ярадылышыңызы көне урп-адатлары билен бирликде чыкарып зыңдыңыз.

¹⁰ Инди Яраданың кешбине меңземекде ве Оны танамакда тәзе ярадылыша беслениң.

¹¹ Бу ярадылышда яхуды дәл билен яхудының, сүннетли билен сүннетсизиң, надан билен медениетсизиң, гул билен азадың арасында хич бир парх ёкдур, эмма Месих хемме затдыр, хемме затдадыр.

¹² Шонуң үчин хем, эй, Худайың сайлан мукаддес хем эзиз халкы! Рехим-шепагата, мәхрибанлыга, песпәллиге, юмшаклыга ве сабыр-такатлылыга беслениң.

¹³ Бири-бириңизе сабырлылык билен чыдаң. Араңызда өйке-кине бар болса, бири-бириңизи багышлаң. Реббиң сизи багышлайшы ялы, сиз хем багышлаң.

¹⁴ Буларың хеммесиниң үстесине-де кәмил бирлиги багланышдырян сөйгә беслениң.

¹⁵ Калбыңызда Месихиң парахатлыгы хөкүм сүрсүн. Чүнки сиз бир бедениң агзалары болуп, бу парахатчылыга чагырылансыңыз. Хемише шүкүрли болуң.

¹⁶ Гой, Месихиң сөзи калбыңызың төрүнде орнашсын. Бүтин акылдарлык билен бири-бириңизе тәлим ве өвүт-несихат бериң. Мезмурлар, өвги айдымлар, рухы нагмалар айдып, Худая йүрекден миннетдарлык билдириң.

¹⁷ Нәме этсеңиз хем, айтсаңыз хем, хеммесини Реббимиз Исаның ады билен ерине етириң, Ол аркалы Ата Худая шүкүр эдиң.

Месих и машгалалар үчин дүзгүнлер

¹⁸ Эй, аяллар, әриңизе табын болуң, чүнки шейле этмек Реббе дегишли адамлара ярашяндыр.

¹⁹ Эй, әрлер, аялыңызы сөйүң, олара ёвуз дарамаң.

²⁰ Эй, чагалар, әхли ишде эне-атаңызың сөзүне гулак асың, себәби бу Ребби хошнут эдйәр.

²¹ Эй, аталар, чагаларыңызы ынҗатмаң, ёгсам, олар рухдан дүшерлер.

²² Эй, гуллар, әхли затда ердәки хоҗайыныңыза боюн эгиң. Муны ынсанлара говы гөрүнмек үчин, гөзе якымлы ишлер билен дәл-де, Ребден горкмак билен чын йүрекден ерине етириң.

²³ Нәме этсеңиз, ынсанлар үчин дәл-де, Реб үчин эдйән ялы, чын йүрекден ерине етириң.

²⁴ Мунуң үчин Ребден мирас сылагыны алҗагыңызы билйәнсиңиз. Сиз Реб Месихе гуллук эдйәнсиңиз.

²⁵ Ким яманлык этсе, өз эден яманлыгының алмытыны алар, Реб хич киме тарапгөйлик эдйән дәлдир.