Колосиялылар 2 - Мукаддес Китап

2‑нҗи бап

¹ Мен сизиң үчин ве Лаодикиядакы иманлыларың, шейле-де мени танамаянларың әхлиси үчин нәхили гайдувсыз зәхмет чекйәндигими билмегиңизи ислейәрин.

² Мен оларың калбының рухланып, сөйгүде бирлешмеклерини дилейәрин. Шейдип, олар долы ынама хем бай дүшүнҗә эе болуп, Ата Худайың сырыны, ягны Месихи танасынлар.

³ Чүнки акылдарлыгың хем билимиң әхли хазынасы Месихде гизленендир.

⁴ Муны хич ким сизи сүйҗи сөзлер билен алдамасын дийип айдярын.

⁵ Себәби мен араңызда болмасам-да, йүрегимде сизиң билендирин. Сизиң тертип-дүзгүнлидигиңизи, Месихе болан берк иманыңызы гөрүп шатланярын.

Месих иң берйән тәзе дурмушы

⁶ Шейлеликде, Иса Месихи Реббиңиз хөкмүнде кабул эдишиңиз ялы, Онуң гөркезен ёлы билен йөрәң.

⁷ Алкышлар билен долуп-дашып, Месихде көк уруң ве бина эдилиң, өзүңизе өвредилиши ялы, иманда берк дуруң.

⁸ Хүшгәр болуң! Хич ким сизи бош хем ялан пелсепелер билен есир эдәймесин, себәби бейле геплер Месихе дәл-де, ынсан дәп-дессурларына ве паны дүнйәниң йөрелгелерине эсасланяндыр.

⁹ Чүнки Худайың долы кәмиллиги бир беден кимин Месихде яшаяр.

¹⁰ Сиз хем хер бир гүйҗүң ве ыгтыярлыгың башы болан Месих аркалы битевүлиге говушдыңыз.

¹¹ Сиз Онуң билен бирлешмек аркалы сүннет хем эдилдиңиз. Бу беден сүннети дәл-де, Месих аркалы эдилен сүннет болуп, гүнәли тебигатыңызың кесилип ташланмагыдыр.

¹² Сиз чүмдүрилиш аркалы Месих билен биле җайландыңыз ве Оны өлүмден дирелден Худайың гудратына иман эдип, Месих билен бирликде дирелдиңиз.

¹³ Овал сиз сүннетсиз болан өңки тебигатыңызда гүнәлериңиз зерарлы өлүдиңиз. Инди болса Худай әхли гүнәлериңизи багышлап, сизи Месих билен биле дирелтди.

¹⁴ Ол бизе гаршы язылан бергидарлык язгысыны өчүрди, оны хача чүйләп, арадан айырды.

¹⁵ Худай рухы гүйчлериң ве ыгтыярлыкларың элинден ярагыны алды ве олары Иса Месих аркалы еңип, ачыкдан-ачык паш этди.

¹⁶ Шонуң үчин хем хич ким сизе азык-овкат, дини байрам, Тәзе Ай я-да Сабат гүни хакда хөкүм чыкармасын.

¹⁷ Булар гелҗекки затларың көлегесиди, эмма хакыкат Месихиң Өзүдир.

¹⁸ Яландан песпәлсирейән ве перишделере сежде эдйән адам сизи Худайың сылагындан махрум этмесин. Шейле адам гөрен гөрнүшлерине магтаняндыр, эмма бу бош ере паңкарян ынсан пикир йөретмесидир.

¹⁹ Шейдип, ол адам бедениң Башы болан Месих билен багланышыгыны йитирендир. Бу беден болса Месихиң ёлбашчылыгы астында хер бир богнуң көмеги билен биригип, Башдан иймитленйәр ве Худайың ислегине гөрә өсйәр.

^20-21 Сиз Месих билен өлүп, бу паны дүнйәниң йөрелгелеринден азат болдуңыз. Онда нәме үчин хенизем бу дүнйә дегишли ялы, «Муңа галташма», «Муны ийме», «Муңа эл дегирме» диен ынсан кадаларына эерйәрсиңиз?

²² Бу дүзгүнлериң хеммеси уланылдыгыча ёк болуп гидер, себәби олар ынсан буйрукларына ве таглыматларына эсасланяндыр.

²³ Элбетде, бу урп-адатлар галп диндарлыкда, песпәлсирән болмакда, бедене эзъет чекдирмекде акылдарлык ялы гөрүнйәндир, эмма буларың ынсаның пис ниетиниң өңүни алмакда хич бир пейдасы ёкдур.