Işaýa 9 - Мукаддес Китап

9-нҗы бап Адыл ша

¹ Муңа гарамаздан, азап ичиндәкилер түкениксиз түмлүкде болмаз. Гечмишде Ол Зебулун ве Нафталы юрдуны песелтди, эмма гелҗекде Деңиз якасындакы ёлы, Иорданың аңырсыны ве миллетлериң Җелилесини шөхратландырар.

² Бейик бир нур гөрди, түмлүкде гезйән халк; түм гараңкылыкда яшаянларың үстлерине нур сачылды.

³ Миллети көпелтдиң Сен, артдырдың оларың шатлыгын, хасылда шатланышлары дей, Сениң өңүңде гуванярлар, олҗа пайлашян дей галкынышярлар.

⁴ Оларың агыр боюнтырыгыны, геришлериндәки сердессесини, сүтемкешлериниң хасасыны дөвдүң мидянларың башына гетирен гүнүң дек.

⁵ Сөвешдәки эсгерлериң әдиклери, әхли гана булашан эшиклери, ода ташланып якылар.

⁶ Бизиң үчин бир чага догулды, бир огул берилди бизе, хөкүмдарлык онуң гершинде болар; Онуң ады Аҗайып Маслахатчы, Гудратлы Худай, Эбеди Ата, Парахатлык Шазадасы болар.

⁷ Хөкүмдарлыгы дынувсыз өсер, парахатчылыгы түкениксиз болар. Давудың тагтындан бакы беркарар эдер өз патышалыгыны. Патышалыгы адалатлылык хем догрулык билен голдар. Хөкмүрован Реббиң ыхласы билен амала ашар бу.

⁸ Таңры Якубың неслине гаршы сөз иберди, ол Ысрайылда берҗай болды.

⁹ Бүтин халк, Эфрайымың, Самарияның илатлары муны билерлер. Олар текепбирлик, йүрек буйсанҗы билен шейле диййәрлер:

¹⁰ «Керпичлер йыкылды, йөне ёнулан дашлардан гурарыс биз, керкав агачлары кесилип ташланды, йөне кедр агачларыны экерис биз».

¹¹ Муңа гөрә Реб Ресиниң ягыларына онуң гаршысына чыкмага гүйч берди, душманларыны аяга галдырды оларың,

¹² гүндогардан сириялылары, пилиштлилери гүнбатардан. Олар Ысрайылы ювударлар, агызларыны ачарлар-да. Йөне Реббиң газабы сөнмәнди шонда-да, эли энтек-де җеза бермәге тайын.

¹³ Өзүне җеза Берене тарап өврүлмеди халк, Хөкмүрован Реббе табын болмады.

¹⁴ Шонуң үчин Ысрайылдан башы-да, гуйругы-да, палма шахасыны-да, гамшы-да бир гүнде кесип ташлар Реб.

¹⁵ Яшулулар хем ат-абрайлы адамлар-а башдыр, ялан зады өвредйән пыгамберлер болса гуйрукдыр.

¹⁶ Ёл гөркезйәнлер бу халкы азашдырярлар, олара эеренлер болса бетбагтчылыга учраярлар.

¹⁷ Мунуң үчин Реб оларың яшларына гуванмаз, рехим этмез етимине, дул хатынына, чүнки хер кес худайсыз хем пис, хеммәниң агзындан акмак сөз чыкяр. Булара гарамаздан, Реббиң газабы сөнмәнди, эли шинди җеза бермәге тайын.

¹⁸ Пислик от кимин яняр, чалыдыр тикенлери ялмаяр ол, токайың гүр ерлерини туташдыряр, түссе ал-асмана галяр.

¹⁹ Хөкмүрован Реббиң газабындан юрт янар, халкы от якып-яндырар, хич ким өз доганына рехим этмез.

²⁰ Халк онда-мунда тапаныны иер, йөне шонда-да доймаз, ач болар, хер кес өз гарындашының этини иер.

²¹ Эфрайым билен Манаша бири-бирини ювударлар, билеликде Яхуда хүҗүм эдерлер, сөнмәнди Реббиң газабы барыбир, энтек хем җеза бермәге тайын эли.