Işaýa 7 - Мукаддес Китап

7‑нҗи бап Ахаз патыша берлен хабар

¹ Ресин Сирияның патышасыды; Ремаляның оглы Пека Ысрайылың патышасыды. Олар Иерусалиме гаршы уруш этмәге чыкдылар, йөне оңа гаршы сөвеш эдип билмедилер. Шол дөвүрде Узыяның агтыгы, Ётамың оглы Ахаз Яхуданың патышасыды.

² Давудың несли Сирияның Эфрайым билен бирлешенини эшиденде, Ахазың йүреги еле титрейән җеңңел агачлары ялы титреди.

³ Онсоң Реб Ишая шейле дийди: «Оглуң Шеяряшуп билен ёкаркы ховза акян ябың аягындакы кир ювулян мейданың ёлунда Ахазы гаршыламага гидип, оңа шуны айдың:

⁴ „Гулак гой, рахатлан, горкма. Бу түсселәп дуран ики отлы кесиндиден, Сирия шасы Ресиниң ве Ремаляның оглуның ловлаян газабындан хедер этме.

⁵ Сириялылар ве эфрайымлылар өз патышасы Ремаляның оглы билен саңа гаршы дилдүвшүк гурады.

⁶ Олар: ‘Гелиң, Яхуданың үстүне чозалың, оны горкузып, басып алалың ве Табеелиң оглуны патыша эделиң’ дийдилер.

⁷ Эмма Хөкмүрован Реб шейле диййәр: ‘Бу амала ашмаз, берҗай болмаз ол.

⁸ Дамаск Сирияның пайтагтыдыр, Ресин Дамаскың баштутаныдыр. Халк болмакдан галар Эфрайым, алтмыш бәш йылың ичинде сынып.

⁹ Самария Эфрайымың пайтагты, Ремаляның оглы Самарияның башы, ынамда берк дурмасаңыз, берк дурмарсыңыз асла’“».

Иманувелиң аламаты

¹⁰ Реб ене-де Ахаза:

¹¹ «Худайың Ребден аламат сора; гой, ол өлүлер дүнйәсинден чуң, гөк кимин бейик болсун» дийди.

¹² Эмма Ахаз: «Сораҗак дәл, Ребби сынаҗак дәл» дийди.

¹³ Онсоң Ишая шейле дийди: «Гулак гоюң, эй, Давудың несиллери! Ынсанлары иризениңиз сизе азлык эдип, инди Худайымы хем иризҗекмисиңиз?

¹⁴ Мунуң үчин Реббиң Өзи сизе бир аламат берер. Ине, гыз гөврели болуп, огул дограр. Онуң адына Иманувел дакар.

¹⁵ Ол ягшыны ямандан сайгарып билйәнчә, диңе гаймак билен бал иер.

¹⁶ Йөне огланың ягшыны ямандан сайгармагы өвренмезинден өң, сени горка салан ики патышаның юрды терк эдилер.

¹⁷ Реб сениң, халкыңың ве ата-бабаларың несиллериниң башларына Эфрайымың Яхудадан бөлүнип айрылан гүнүнден бәри гөрүлмедик гүнлери гетирер; Ашур патышасыны гетирер».

¹⁸ Шол гүн Реб Мүсүр деряларының аягучларындакы сиңеклере, Ашур юрдундакы арылара сыгырар.

¹⁹ Олар хем гелип, япашак дерелерде, гаяларың җайрыкларында, әхли тикенекли гырымсы агачларда ве өрүлерде орнашарлар.

²⁰ Шол гүн Реб Евфрат дерясының аңырсындан кирейине алнан пәки билен, ягны Ашур патышасы билен сачыңызы, аякларыңызың түйлерини ве сакгалыңызы сырар.

²¹ Шол гүн бир адам бир гулаҗын билен ики гоюн саклар.

²² Ол сагып алан бол сүйдүнден гаймак иер; юртда галан хер кес гаймак хем бал иер.

²³ Шол гүн бахасы мүң күмүш теңңә барабар болан мүң дүйп үзүмли тутуш ер чалылык ве тикенлик ерлере өврүлер.

²⁴ Тутуш юрт чалылыга ве тикенлиге өврүлер; адамлар ол ере окдур яйлары билен гидер.

²⁵ Чалылардан ве тикенлерден горкыңыза өңки кәтменленен депелере гидип билмерсиңиз; ол ерлер мал гойберилйән, гоюнларың басгылаян ери болар.