Işaýa 66 - Мукаддес Китап

66-нҗы бап Хөкүм ве умыт

¹ Реб шейле диййәр: «Гөклер Мениң тагтым, ер аягыма күрсүдир. Маңа гурҗак өйүңиз ханы?! Дынчлык меканым ниреде болҗак?!

² Өз элим яратды буларың барын, хеммеси-де Мениңкидир! Йөне Мен кичигөвүнлә, рухы сыныга, сөзүме титрейәне назар саларын». Муны Реб айдяндыр.

³ «Өз ёлларыны сайлаянлар, неҗис ишлеринден леззет алянлар бар. Өкүзи гурбанлык берйән адам өлдүрен билен деңдир, гузыны гурбанлык берйән итиң бойнуны яздыран ялыдыр; галла садакасыны берыән доңзуң ганыны хөдүрлән билен деңдир, якымлы ыслы түтетги түтедйән бута сежде эден ялыдыр.

⁴ Олара залымлык этмеги сайларын Менем, горкян затларыны башларына гетирерин; чүнки Мен чагыранымда, хич ким җогап бермеди, гепләнимде, диңлемедилер; Мениң йигренйән ишлерими этдилер, Маңа ярамаян затлары сайладылар».

⁵ Эй, Реббиң сөзүне титрейәнлер, Онуң сөзүне гулак гоюң: «Сизи йигренйән, Мениң адым үчин сизи рет эдйән доганларыңыз: „Реб шөхратландырылсын, бизем сизиң шатлыгыңызы гөрели!“ дийдилер. Эмма оларың өзлери утандырылар».

⁶ Шәхерден бир гүйчли сес, ыбадатханадан бир сес эшидилйәр! Душманларының җезасыны берйән Реббиң сесидир бу!

⁷ Бургусыз догурды, бир огул догурды азап чекмән.

⁸ Шейле зады эшиден бармы? Гөрен бармы шейле зады? Юрт бир гүнде доглармы? Бир демде дүнйә инерми миллет? Эмма Сион бургусы тутан дессине огулларыны догурды.

⁹ «Мен догурма пурсадына етирибем, догуртмайынмы?» диййәр Реб. «Догурмага гүйч берйән Мен ятгыны япарынмы?» диййәр Худайың.

¹⁰ Иерусалим билен биле шатланың, онуң үчин бегениң, эй, оны сөййәнлер, эй, Иерусалим үчин яс тутянлар, онуң билен биле шатланың.

¹¹ Онуң гөвсүнден эмип, доярсыңыз, теселли тапарсыңыз; ганып-ганып ичип, долы гөвсүнден леззет аларсыңыз.

¹² Реб шейле диййәр: «Мен абаданчылыгы деря дек, миллетлериң байлыгыны дашгын чешме дек оңа угрукдырарын, ол сизи эмдирип, элинде гөтерер, аягында ыралар.

¹³ Энәниң чагасына теселли берши дек, Менем сизе теселли берерин. Сиз Иерусалимде теселли тапарсыңыз».

¹⁴ Булары гөрүп, калбыңыз шатлыкдан долар, бедениңиз майса кимин гүлләп өсер; Реббиң элиниң бенделериниң үстүндедиги аян болар, Онуң газабы болса душманларына гаршыдыр.

¹⁵ Чүнки Реб алав билен гелйәр, сөвеш арабалары түвелей дек, ловлаян газабыны, кәйинҗини ялынлы алав кимин дөкер.

¹⁶ Реб бүтин адамзада отдур гылыҗы билен хөкүм эдер, Реббиң өлдүренлери көп болар.

¹⁷ Бутпараз сеждегәхлерине гирмек үчин, өзлерини мукаддес эдип, инлерини тәмизләнлер, шейле-де доңуз, сычан ве бейлеки харам хайванларың этини иенлериң ортасында баш болуп дураның ызына эеренлер ёк боларлар. Муны Реб айдяндыр.

¹⁸ Реб шейле диййәр: «Мен оларың ишлерини-де, ниетлерини-де билйәрин. Әхли миллетлери ве диллери бир ере топламак үчин Мен гелйәрин. Олар гелип, Мениң шөхратымы гөрерлер.

¹⁹ Мен оларың арасында бир аламат гөркезерин. Оларың арасындан гачып гутуланлары миллетлериң арасына, Таршыша, Пула, яйчы Луда, Тубала, Явана, Мен барада эшитмедик, шөхратымы гөрмедик узакдакы адалара ёлларын. Олар Мениң шөхратымы миллетлериң арасында ыглан эдерлер.

²⁰ Ысрайыл огулларының галла садакасыны халал гапда Реббиң өйүне гетиришлери ялы, олар хем сизиң доганларыңызың барыны атларда, сөвеш арабаларында, ат арабаларында, гатырлардыр дүелерде әхли миллетлериң ичинден топлап, Мениң мукаддес дагыма – Иерусалиме Реббе пешгеш хөкмүнде гетирерлер.

²¹ Оларың арасындан бирнәчесини руханы ве леви эдип сайларын».

^22-23 «Мениң яратҗак тәзе гөгүмиң, тәзе еримиң гөзүмиң алнында дурушлары ялы, сизиң несиллериңиз билен адыңыз-да шейле болар. Хер Тәзе Ай байрамында, хер Сабатда әхли ынсанлар хузурыма гелип, Маңа ыбадат эдерлер». Муны Реб айдяндыр.

²⁴ Олар даша чыкып, Маңа гаршы баш галдыранларың җесетлерини гөрерлер. Оларың җесетлерини иййән гурт өлмез, олары якян от сөнмез; олар бүтин адамзада йигренҗи боларлар.