Işaýa 64 - Мукаддес Китап

64‑нҗи бап

¹ Гөклери ярып, ашак инседиң, Сен! Өңүңде титрешседи даглар!

² Алавың чалыны яндырышы дек, сувы гайнадышы дек одуң адыңы душманларыңа танатдыряң, миллетлер өңүңде лерзана гелерлер.

³ Гарашылмаян горкунч ишлери эдениңде, ер йүзүне индиң, өңүңде даглар титрешди.

⁴ Өзүне умыт баглаянлар үчин шейле ишлери эден Худайы овалдан бәри не гулак эшидипди, не-де гөз гөрүпди.

⁵ Догры ишлери шатланып эдйәнлери, Сени ятлаянлары гаршылаярсың ёлларыңда. Йөне гүнә батдык биз, Сен гахарландың, биз халас эдилерисми?

⁶ Харам адам дей болдук әхлимиз, әхли догры ишлеримиз харам эсги дей. Солярыс биз япрак дей, ел дек алып гидйәр языкларымыз бизи.

⁷ Сениң адыңы тутян, Саңа даянҗак болуп, оянян ёк; Сен йүзүңи гизледиң бизден, бизи языкларымызың ыгтыярына бердиң.

⁸ Шонда-да Атамыз Сенсиң, я Реб, биз тоюндырыс, Сен күйзегәримиз, Сениң элиңиң ишидирис әхлимиз.

⁹ Гаты гахарланма, хемишелик ятлама языгы, я Реб, әхлимиз Сениң халкыңдырыс, муны назара ал!

¹⁰ Мукаддес шәхерлериң чөл болды, Сион дүзлүге, Иерусалим хараба өврүлди.

¹¹ Аталарымызың Саңа өвги айдан ери болан мукаддес хем гөзел өйүмиз ода янды, әхли эзиз затларымыз хараба өврүлди.

¹² Шулара гарамаздан, я Реб, сакланҗакмы Сен? Дымып, шейле газаплы эзъет берҗекми бизе?