Işaýa 63 - Мукаддес Китап

63‑нҗи бап Реббиң гудраты

¹ Эдомдан, Босрадан гырмызы эшикли гелйән бу ким? Шөхратлы лыбас ичинде бейик гудрат билен йөриш эдйән бу ким? «Дабара билен геплейән, халас этмәге гүйҗи етйән Мендирин!»

² Нәме үчин лыбасың гырмызы, эшигиң үзүм сыкяныңкы кимин?

³ «Үзүми еке сыкдым, янымда халклардан хич ким ёкды; гахарлыкам сыкдым үзүми, газаплыкам аяк астына алдым; онуң ганы эшиклериме сычрады, бар лыбасымы хапалады.

⁴ Өч алыш гүни йүрегимдеди, халас этҗек йылым гелипди.

⁵ Мен серетдим, көмекчи ёкды; хич кимиң Мени голдамаяндыгына хайран галдым. Онсоң Өз голум Маңа еңиш гетирди, Өз газабым Мени голдады.

⁶ Гахарыма халклары аяк астына алдым, газабыма олары серхош этдим, ганларыны ере дөкдүм».

⁷ Реббиң эден әхли ишлерине гөрә Онуң ягшылыгыны, алкышларыны, рехимлерине гөрә, Ысрайыл неслине гөркезен бейик мерхеметини, улы ягшылыгыны агзайын.

⁸ Ол: «Элбетде, олар Мениң халкым, Мени алдамаҗак огуллардыр» дийди. Шейдип, оларың Халасгәри болды.

⁹ Олар азап чекенде, гынанды Ол. Хузурындан гелен перишде олары халас этди; сөйгүси ве рехими билен азат этди олары; овалдан олары элинде гөтерип гелди.

¹⁰ Эмма олар питне турзуп, Онуң Мукаддес Рухуны ынҗатдылар; Реб-де олара душман болуп, гаршыларына сөвешди.

¹¹ Худайың халкы гечмиши, Реббиң гулы Мусаны ятлады. Сүрүсиниң чопанлары билен биле олары деңизден гечирен ниреде? Өз Мукаддес Рухуны ичлерине салан ниреде?

¹² Гудратлы голуны Мусаның сагында йөреден, Өзүне эбеди ат эдинмек үчин өңлериндәки сувы бөлен ниреде?

¹³ Халкыны деңиз дүйбүнден гечирен ким? Атың бүдремән чөлден гечиши дек олар-да бүдремедилер.

¹⁴ Дерә инйән мал сүрүси дек, Реббиң Рухы олара рахатлык берди. Өзүңе шөхратлы ат эдинмек үчин халкыңа, ине, шейле ёл гөркездиң.

¹⁵ Гөклерден серет, Өз мукаддес, шөхратлы месгениңден бизе назар сал. Ыхласың, гудратың ниреде Сениң? Мерхеметиң, рехимиң ниреде? Олары бизден сакладың.

¹⁶ Атамыз Сенсиң, Ыбрайым бизи билмесе-де, Ысрайыл бизи танамаса-да, я Реб, бизиң Атамызсың Сен, овалдан бәри адың «Пенакәримиздир».

¹⁷ Я Реб, нәме үчин бизи Өз ёлларыңдан азашдырярсың, Сенден горкмазымыз ялы йүреклеримизи гатадярсың? Өз бенделериң хатырасына, Мирасың болан тирелериң хатырасына ыза долан.

¹⁸ Мукаддес халкың аз вагт мукаддес ериңе эелик этди, эмма душманларымыз аяк астына атдылар оны.

¹⁹ Овалдан бәри үстлеринден Сен хөкүм сүрмедик, Сениң адың дакылмадык халка меңзедик биз.