Işaýa 62 - Мукаддес Китап

62‑нҗи бап Сионың тәзе ады

¹ Сионың догрулыгы нур кимин, халас эдилиш янып дуран чыра дей парлаянча, Сионың хатырасына, Иерусалимиң хатырасына дыммарын.

² Миллетлер догрулыгыңы, патышалар шөхратыңы гөрерлер; Реббиң Өз агзындан чыкан тәзе ат билен атландырыларсың.

³ Реббиң элинде гөзеллик тәҗи, Худайыңың элинде шалык җыгасы боларсың.

⁴ Мундан бейләк «Терк эдилен» дийилмез саңа, мундан бейләк «Харабалык» дийилмез юрдуңа, эмма саңа «Сөйдүгим», юрдуңа «Әрли» дийлер; Реб сени сөййәр, юрдуң әрли болар.

⁵ Йигидиң гыза өйлениши дек, огулларың-да саңа эе чыкарлар, гиевиң гелни үчин шатланышы дек, Худай-да сениң үчин шатланар.

⁶ Эй, Иерусалим, диварларыңда гөзегчилер гойдум, гиҗе-гүндиз асла дыммаз олар. Эй, Реббе ятладянлар, өзүңизе дынч бермәң,

⁷ Иерусалими беркидип, оны ер йүзүниң шөхраты эдйәнчә, оңа ынҗалык бермәң.

⁸ Реб Өз саг элинден, гүйчли голундан ант ичди: «Инди галлаңы душманларыңа иймит хөкмүнде бермерин, өз зәхметиң сиңен шерабыңы кесекилер ичмезлер.

⁹ Хасылыны йыганлар ийип, Реббе алкыш айдарлар, оны топланлар, мукаддес ховлуларымда ичерлер».

¹⁰ Гечиң, гечиң дервезелерден! Халкың ёлуны тайынлаң! Чекиң, чекиң шаёлы, оны дашлардан арассалаң, халклар үчин байдак дикиң!

¹¹ Реб ериң аңры уҗуна ыглан этди: «Сион гызына шейле дий: „Ине, Халасгәриң гелйәр; Онуң сылагы янындадыр“».

¹² Олара «Мукаддес халк, Реббиң азат эденлери» дийлер, саңа болса «Худайың агтараны, терк эдилмедик шәхер» дийлер.