Işaýa 60 - Мукаддес Китап

60-нҗы бап Сион шәхериниң шөхраты

¹ Тур, парла, нуруң гелди, үстүңде Реббиң шөхраты догды.

² Ине, ер йүзүни гараңкылык, халклары түм гараңкылык бүрәр; сениң үстүңде болса Реб пейда болар, үстүңде болар Онуң шөхраты.

³ Миллетлер ышыгыңа гелерлер, шалар даңыңың ягтысына.

⁴ Төвереге сер сал, галдыр башыңы, әхлиси үйшүшип, саңа гелйәрлер. Огулларың узакдан гелерлер, гуҗакда гөтерилер гызҗагазларың.

⁵ Шонда олары гөрүп, йүзүң ягтылар, шатлыкдан тирпилдәр йүрегиң, чүнки байлык деңиз үсти билен саңа гетирилер, миллетлериң байлыгы саңа гелер.

⁶ Сен дүе сүрүлеринден, Мидян, Эйпа көшеклеринден доларсың; бүтин Шеба халкы гелер. Олар алтындыр якымлы ыслы түтетги гетирип, Реббе алкыш айдарлар.

⁷ Кедарың әхли сүрүлери яныңа топланар, Небаётың гочлары саңа хызмат эдерлер, олар гурбанлык сыпамда гурбанлык хөкмүнде кабул эдилер, шөхратлы өйүми шөхратландырарын Мен.

⁸ Кимдир бу булут кимин сүйшйәнлер, хөвүртгелерине гөгерчин дек учянлар?

⁹ Адалар Маңа умыт баглаярлар элбетде; Худайың Реббиң, Ысрайылың Мукаддесиниң адының хатырасына Таршыш гәмилери өңүрти гелйәрлер, огулларың күмүшдир алтыныны өзлери билен гетирйәрлер. Реб сени шөхратландырды.

¹⁰ Кесекилер диварларыңы дикерлер, оларың шалары саңа хызмат эдерлер; газабымда сени җезаландырдым, йөне мәхримде рехим этдим саңа.

¹¹ Дервезелериң ачык болар мыдам, миллетлериң өз патышаларының баштутанлыгында байлыкларыны саңа гетирерлери ялы, гиҗе-гүндиз япылмаз.

¹² Саңа хызмат этмедик миллет ве патышалык ёк болар; шол миллетлер бүтинлей вейран эдилер.

¹³ Мукаддес өйүми беземек үчин Ливаның байлыгы гелер саңа, Аяк басян ерими шөхратландырмак үчин серви, чынар ве арча агачлары саңа гетирилер.

¹⁴ Саңа эзъет беренлериң несиллери гелип, тагзым эдерлер саңа, сени кемсиденлериң әхлиси аягыңа йыкыларлар; саңа Реббиң шәхери, Ысрайылың Мукаддесиниң Сионы диер олар.

¹⁵ Терк эдилип, йигренилип, үстүңден хич ким гечмеди. Инди болса Мен сени бакы бейик, несилден-несле шатлык эдерин.

¹⁶ Миллетлериң сүйдүни эмерсиң, Сорарсың шаларың гөвсүн. Шонда сен Мен Реббиң Халасгәриңдигими, Пенакәриңдигими, Якубың Гудратлы Худайыдыгымы билерсиң.

¹⁷ Бүрүнч ерине алтын, демир ерине күмүш берерин Мен; агач ерине бүрүнч, демир берерин даш ерине. Парахатчылыгы баштутаның, догрулыгы гөзегчиң эдип белләрин.

¹⁸ Юрдуңда мундан бейләк зорлук, серхетлериң ичинде вейранчылык, гыргынчылык болмаз; Худай халас эдйәр, алкыш болсун Худая.

¹⁹ Мундан бейләк гүндизине Гүн ышыгың болмаз, гиҗесине Ай саңа ышык бермез; чүнки Реб сениң эбеди нуруң болар, шөхратың өз Худайың болар.

²⁰ Мундан бейләк Гүнүң батмаз, Айың яшмаз, чүнки Реб сениң эбеди нуруң болар, яслы гүнлериң тамам болар.

²¹ Бүтин халкың догручыл болар, олар юрды бакы эеләрлер, Өзүмиң шөхратланмагым үчин, экен нахалым, эллеримиң ишидир олар.

²² Оларың иң азы уруг болар, гүйчли миллет болар иң эҗизи; Мен – Реб муны өз вагтында тиз амал эдерин.