Işaýa 59 - Мукаддес Китап

59-нҗы бап Реб адалатсызлыгы җезаландыряр

¹ Реббиң эли гысга дәлдир халас этмез ялы, эшитмез ялы гулагы-да агыр дәлдир.

² Языкларыңыз Худайыңыз билен араңыза айралык салды, сесиңизи эшитмез ялы, гүнәлериңиз Онуң йүзүни сизден гизледи.

³ Сизиң эллериңиз ган билен, бармакларыңыз этмишлер билен харамланды; диллериңиз ялан сөзлейәр, пис сөзлер чыкяр агзыңыздан.

⁴ Догрулыга чагырян ёк, адалатлы чөзйән ёк даваны. Бош сөзлере умыт баглаяр олар, ялан сөзлейәрлер, бетбагтлыкдан хамыла болуп, яманлык догурярлар.

⁵ Кепҗебашың юмуртгаларыны басырярлар, мөй керебини докаярлар; оларың юмуртгаларыны иен өлйәр, алахөврен чыкяр дөвлен юмуртгадан.

⁶ Керебинден эгинбаш болмаз оларың, газананлары безененлерине етмейәр, ишлери эрбет ишдир, эллеринде зорлук иши.

⁷ Аяклары пислиге ёртяр, бигүнә ган дөкмәге ховлугяр, пикирлери шердир, харабалык, вейранчылык бар ёлларында.

⁸ Парахатлык ёлы недир, олар билмейәрлер, адалат ёкдур ёдаларында, өзлерине эгри ёллар этдилер, ол ёллардан йөрейәнлер парахатлыгы билйән дәлдирлер.

⁹ Муңа гөрә адалат бизден узакда, гутулыш бизден дашда; биз нура гарашярыс, йөне диңе гараңкылык; ягтылыга гарашярыс, йөне түмлүкден барярыс.

¹⁰ Көрлер кимин дивары сермелейәрис, сермелешип гезйәрис гөзсүз кимин, гүнорта чагы алагараңкыда мысалы бүдрейәрис, гүйчлүлериң арасында өли ялыдырыс.

¹¹ Әхлимиз айы дей арлаярыс, гөгерчин дей иңңилдейәрис. Адалата гарашярыс, йөне ол ёк; халас эдилмәге гарашярыс, йөне ол бизден узакда.

¹² Өңүңде языкларымыз көпдүр, гүнәлеримиз өзүмизе гаршы шаятлык эдйәр, языкларымыз янымыздадыр, этмишлеримизи биз билйәрис.

¹³ Языклы болдук, Ребби рет этдик, Худайымыздан йүз өвүрдик, сүтемиң, питнәниң гүррүңини этдик, калбымыздакы ялан сөзлеримизи сөзледик.

¹⁴ Адалат ыза чекилйәр, догрулык узакда; шәхер мейданчасында бүдрейәр хакыкат, догрулык арамыза гирип билмейәр.

¹⁵ Хакыкат ёк, яманлыкдан гача дурян таланяр, Реб муны гөрди, адалатың ёкдугына гынанды.

¹⁶ Реб хич кимиң ёкдугыны гөрди, арачының ёкдугына гең галды; Өз голы еңиш гетирди Оңа, Өз догрулыгы голдады Оны.

¹⁷ Ол догрулыгы совут кимин гейинди, гутулыш тувулгасыны башына гейди; өч алыш лыбасына бүренди, газап донуны гейди.

¹⁸ Ол хер кесе ишлерине гөрә җеза берер, ягыларына газап, душманларына җеза гарашяр, адалара җеза берер.

¹⁹ Гүнбатардакылар Реббиң адындан, гүндогардакылар Онуң шөхратындан горкарлар. Чүнки Реб ел ковалаян даг сили дей гелер.

²⁰ «Сиона, Якуп неслинден болуп, языкларындан дөненлере Пенакәр гелер». Муны Реб айдяндыр.

²¹ «Мениң болса, олар билен эдйән әхтим, ине, шудур: үстүңиздәки Рухум, агзыңыза салан сөзлерим шу гүнден эбедә ченли өз дилиңизден, зүрятларыңызың дилинден, зүрятларыңызың зүрятларының дилинден дүшмесин». Муны Реб айдяндыр.