Işaýa 58 - Мукаддес Китап

58‑нҗи бап Хакыкы ыбадат этмеклик

¹ Гаты гыгыр, чекинме! Сесиңи сурнай кимин гаталт! Халкыма языкларыны, Якубың неслине гүнәлерини ыглан эт.

² Олар хер гүн Мени агтарярлар, леззет алярмышлар ёлларымы билмекден, догры иш эдип, Худайың хөкүмлерини терк этмедик миллет кимин Менден адыл хөкүм сораярлар, Худая якынлашмагы арзув эдйәрлер.

³ Олар: «Биз агыз бекледик, нәме үчин гөрмейәрсиң? Өзүмизи кичелтдик, нәме үчин үнс бермейәрсиң?» диййәрлер. Ине, сиз агыз беклән гүнүңиз өз исләниңизи эдйәрсиңиз, ишчилериңизи агыр ишледйәрсиңиз.

⁴ Ине, сиз дава, җенҗел билен, рехимсиз юмруклама билен агыз беклейәрсиңиз. Бу гүнки агыз беклейшиңиз билен ёкарда сесиңизи эшитдирмерсиңиз.

⁵ Мениң сайлан агыз беклемәм, ынсаның өзүни кичелтмели гүни шейле болармы? Гамыш кимин башыңызы эгип, җулуң, күлүң үстүнде ятмак үчинми? Сиз муңа агыз беклеме, Реббе ярамлы гүн диййәрсиңизми?

⁶ Мениң сайлаян агыз беклемәм адалатсызлык зынҗырларыны гырмак, боюнтырык йүплерини чөзмек, эзиленлери азат этмек, хер бир боюнтырыгы сындырмак үчин дәлми?

⁷ Чөрегиңи ач билен пайлашып, өйсүз гарыбы өйүңе гетирмек үчин дәлми? Ялаңаҗы гөренде, оңа эшик берип, гарындашларыңыздан көмегиңизи гайгырмазлык үчин дәлми?

⁸ Шонда нуруңыз даң кимин ялпылдар, басым шыпа тапарсыңыз, догрулыгыңыз өңүңизден гидер, Реббиң шөхраты ызда горагыңыз болар.

⁹ Онсоң дилег эдерсиңиз, Реб җогап берер; перят эдерсиңиз, Ол: «Мен бу ерде» диер. Араңыздан боюнтырыгы, бармак чоммалтмагы, яман геплери айырсаңыз,

¹⁰ ачларың хатырасына җаныңызы пида этсеңиз, эҗирлилери зерур затлары билен доюрсаңыз, гараңкылыкда нуруңыз ялпылдап, түмлүгиң гүнорта чагы дек болар.

¹¹ Реб хемише сизе ёл гөркезер, гурак ерлерде сизи канагатландырар, сүегиңизе кувват берер. Сиз суварылан баг кимин, сувы эгсилмейән чешме кимин боларсыңыз.

¹² Көне харабаларыңыз тәзеден дикелдилер, көп асырлардан галан харабаларың дүйбүни гайтадан тутарсыңыз; олар сизе: «Җайрыклары беҗерйән, яшамак үчин көчелери дүзедйән» диерлер.

¹³ Сабат гүнүни бозмакдан, мукаддес гүнүмде исләниңизи этмекден саклансаңыз, Сабат гүнүни якымлы, Реббиң мукаддес гүнүни хорматлы сайсаңыз, өзүңизе яраяны этмән, исләниңизи этмән, бош сөзлери сөзлемән, ол гүни хорматласаңыз,

¹⁴ шонда сиз Ребден хошал боларсыңыз, Мен сизи дүнйәниң белентликлерине чыкарарын; атаңыз Якубың мирасыны сизе берерин. Муны Реб айдяндыр.