Işaýa 55 - Мукаддес Китап

55‑нҗи бап Бол яшайша чагырыш

¹ Эй, тешнелер, сува гелиң! Эй, пулсузлар, гелиң, галла сатын алың, ийиң! Гелиң, шерабы, сүйди пулсуз алың!

² Нәме үчин пулуңы чөрек болмаҗак зада, зәхметиңи доюрмаҗак зада сарп эдйәң? Мени үнсли диңләң, ягшы зады ийиң, җаныңыз нәз-ныгматлардан леззет алар.

³ Гулак асың, Маңа гелиң, диңләң, яшарсыңыз, сиз билен бакы әхт эдишерин, Давуда вада берен садык сөйгими берерин.

⁴ Ине, Мен оны халклара шаят, баштутан хем баш серкерде этдим.

⁵ Ине, сиз танамаян миллетлериңизи чагырярсыңыз, сизи танамадык миллетлер-де, сизе гелерлер. Бу Ысрайылың Мукаддеси, Худайыңыз Реб себәплидир, Ол сизи шөхратландырды.

⁶ Ребби тапылярка, агтарың, якындака, чагырың.

⁷ Пислер өз ёлларындан, эрбетлер өз пикирлеринден дәнип, Реббе доланып барсынлар, Реб олара рехим эдер; Худайымыза долансынлар, Ол гаты гечиримлидир.

⁸ «Мениң пикирлерим сизиң пикирлериңиз дәл, сизиң ёлларыңыз Мениң ёлларым дәл». Муны Реб айдяндыр.

⁹ «Гөклер ерден нәхили бейикликде болса, Мениң ёлларым-да сизиң ёлларыңыздан, Мениң пикирлерим-де сизиң пикирлериңизден бейикдир.

¹⁰ Ягшың, гарың гөклерден инип, ери суварып, оны өнүмли, хасыллы эдип, экене тохум, чөрек иййәне чөрек берйәнчә, ызына доланмайшы дек,

¹¹ Мениң агзымдан чыкян сөзүм-де шейле болар; Ол Маңа бош гайдып гелмез, максадымы ерине етирер, этсин дийип иберен ишимде үстүнликли болар» Реб диййәр.

¹² Сиз шатлык билен чыкарсыңыз, парахатлык билен гетирилерсиңиз, даглардыр депелер өңүңизде айдыма гыгырышарлар, бүтин мейданың агачлары-да эл чарпышарлар.

¹³ Тикенекли гырымсы агаҗың ерине серви, читчити ерине нар битер; бу Реббе шөхрат гетирер, өлмез-йитмез эбеди аламат болар.