Işaýa 54 - Мукаддес Китап

54‑нҗи бап Реббиң әхти

¹ Реб: «Шатлан, эй, чага догмадык, өнелгесиз, бургуда болмадык, бегенчден айдым айт! Чүнки өң терк эдилен аялың огуллары әрли аялың огулларындан көп болар» диййәр.

² Чадырыңың ерини гиңелт, месгениңиң перделерини гер, гайгырма; танапларыңы узалт, газыкларыңы беркит.

³ Сен сага-сола яйыларсың, несиллериң миллетлери эеләп, чола шәхерлерде орнашарлар.

⁴ Горкма, утанҗа галмарсың сен; рухдан дүшме, рысва болмарсың сен; яшлыгыңдакы утанҗыңы унударсың, дуллук рысваңы ятламарсың мундан бейләк.

⁵ Ярадыҗың сениң әриңдир, Онуң ады Хөкмүрован Ребдир; Ысрайылың Мукаддеси Пенакәриңдир, Оңа бүтин дүнйәниң Худайы дийилйәр.

⁶ Реб сени терк эдилен, калбы гуссалы аял дек, рет эдилен яш гелин дек чагырды. Муны Худай диййәр.

⁷ «Мен сени бир салым терк этдим, йөне бейик рехим билен сени йыгнарын.

⁸ Газап одунда сенден бир салым йүзүми гизледим, эмма саңа рехим эдерин садык сөйги билен». Муны Пенакәриңиз Реб диййәр.

⁹ Бу Мениң үчин Нухуң дөври киминдир, Нухуң тупаны ер йүзүнде инди гайталанмаз дийип ант ичишим ялы, саңа-да гахарланмарын инди, хич хачан кәемерин дийип ант ичдим.

¹⁰ Даглар еринден гозганса-да, депелер сарсса-да, садык сөйгим сенден айрылмаз, сарсмаз парахатчылык әхтим. Саңа рехим эден Реб диййәр муны.

¹¹ «Эй, харасада дүшүп, теселли тапмадык мушакгатлы шәхер! Дашларыңы гымматбаха дашлардан гоюп, гөк якутлар билен дүйбүңи тутарын.

¹² Күңрелериңи лагылдан, дервезелериңи җөвхерден, гымматбаха дашлардан эдерин диварларыңы.

¹³ Әхли чагаларың Ребден таглым аларлар, чагаларыңың абаданчылыгы бейик болар.

¹⁴ Догрулыкда беркарар эдилерсиң, сүтемден узакда боларсың, горкмарсың; ховп-хатардан даш боларсың, голайлашмаз саңа.

¹⁵ Саңа хүҗүм этсе бири, Менден дәлдир; ким саңа хүҗүм этсе, саңа боюн эгер.

¹⁶ Ине, көмүр көзүни үфлейән, өз максады үчин яраг ясаян демирчини Мен яратдым. Ёк этсин дийип, хеләк эдиҗини ярадан-да Мендирин.

¹⁷ Сениң гаршыңа ясалан яраг дерде ярамаз, хөкүмде гаршыңа чыкян хер дили айыпларсың. Реббиң бенделериниң мирасы шудур, Мен олары акларын». Муны Реб айдяндыр.