Işaýa 53 - Мукаддес Китап

53‑нҗи бап

¹ Бизиң хабарымыза ким ынанды? Реббиң гүйч-гудраты киме аян болды?

² Ол Реббиң өңүнде нәзик майса дек, гуры ердәки көк дей өсди; бизиң оңа середеримиз ялы, онда не шекил, не сырат барды, арзувларымыз ялы кешп ёкды.

³ Ол әсгерилмеди, ынсанлар оны рет этди, ол дерди, хассалыгы билйән адамды; адамлар ондан йүзлерини өвүрдилер, ол әсгерилмеди, хич затча-да гөрмедик оны биз.

⁴ Ол бизиң хассалыгымызы өз үстүне йүкледи, бизиң дертлеримизи чекди; биз болса ол Худай тарапындан җезаландырылып, урлуп эҗир чекендир дийип пикир этдик.

⁵ Эмма ол бизиң языкларымыз үчин яраланды, бизиң этмишлеримиз үчин эзъет чекди, рахатлыгымыз үчин җеза онуң башына гелди, онуң яралары аркалы биз шыпа тапдык.

⁶ Әхлимиз эдил гоюн ялы азашдык; өз ёлумыз билен гитдик херимиз, Реб әхлимизиң этмишимизи оңа йүкледи.

⁷ Оңа сүтем эдилди, ол эҗир чекди, эмма шонда-да агзыны ачмады. Союлмага әкидилип барян гузы дек, гыркымчының өңүндәки сессиз гоюн дек, хич агзыны ачмады ол.

⁸ Ол сүтем, адалатсызлык билен әкидилди. Онуң несли хакда ким айдып билҗек? Ол дирилер диярындан махрум эдилди, халкымың языгы үчин зарба оңа дегди.

⁹ Онуң габры пислер билен болды. Ол бай адамың янында җайланды, ол хич хили сүтем этмәнди, агзындан ялан сөзлер чыкманды.

¹⁰ Эмма онуң эзилмеси, дерт чекмеси Реббиң ислегиди. Онуң җаны гүнә гурбанлыгы эдилсе, ол неслини гөрер, онуң өмри узар; Реббиң ислеги ол аркалы ровачланар.

¹¹ Җанының чекен җебир-җепаларының хөзирини гөрүп, ол канагатланар. Өз билшине гөрә, Мениң догры гулум көплери аклар, өз үстүне алар оларың этмишини.

¹² Шонуң үчин Мен оңа бейик адамларың арасындан пай берерин; олҗаны гүйчлүлер билен пайлашар ол, җаныны гурбан этди ол, языклылар билен бир сайылды; ол көплериң гүнәсини өз үстүне алды, оларың языкларының гечилмегини диледи.