Işaýa 52 - Мукаддес Китап

52‑нҗи бап Сионың шатлыгы

¹ Оян, эй, Сион, оян! Гудратыңа беслен! Эй, Иерусалим, мукаддес шәхер, гөзел лыбаса гир! Сүннетсизлер, харам адамлар ичери гирмезлер асла.

² Үстүңдәки тозаны как-да, гал, эй, Иерусалим, тагтда отур. Бойнуңдакы зынҗыры үз, эй, Сион, есир гыз!

³ Реб шейле диййәр: «Сиз мугт сатылдыңыз, ызыңыза пул төленмән алнарсыңыз».

⁴ Хөкмүрован Реб шейле диййәр: «Халкым месген тутҗак болуп, овал Мүсүре гидипди; соңра ашурлар олара нәхак сүтем этдилер».

⁵ Реб: «Инди бу ерде нәмәм бар?» диййәр. «Халкым бидерек ере әкидилди, хөкүмдарлары перят эдйәрлер. Адым узаклы гүн харланяр». Муны Реб айдяндыр.

⁶ «Мунуң үчин халкым Мениң адымы билер; шонуң үчин геплейәниң Мендигими шол гүн билерлер. Ине, бу Мендирин».

⁷ Дагдан ашып, парахатлыгы ыглан эдйән хабарчының гелши не гөзелдир! Ол: «Реб Халасгәрдир» дийип җар эдип, Сиона: «Худайың хөкүм сүрйәр» дийип, хош хабар гетирйәр.

⁸ Диңләң! Гаравулларың сеслерини гаталдяр, шатланып, биле айдым айдярлар; Реббиң Сиона гайдып гелшини өз гөзлери билен гөрерлер олар.

⁹ Эй, Иерусалимиң харабалары, шатлык билен айдыма гыгырың! Реб Өз халкына теселли берди, Иерусалими азат этди.

¹⁰ Әхли миллетлериң гөзлериниң алнында Реб мукаддес билегини чермеди; ериң аңры уҗы Худайымызың халас эдйәндигини гөрер.

¹¹ Барың, гидиң, ол ерден чыкың! Харам затлара эл дегирмәң; ол ерден чыкып, тәмизлениң, эй, Реббиң гап-гачларыны гөтерйәнлер!

¹² Эмма сиз гыссаглы чыкмарсыңыз, гачып гитмерсиңиз; чүнки Реб сизиң өңүңизден гидер, Ысрайыл Худайы ызыңызда гораг болар.

Реббиң гулуның эҗир чекмеси ве бейгелдилиши

¹³ Ине, гулум ровачланар, ол бейгелдилер, ёкары галдырылар, гаты беленде чыкарылар.

¹⁴ Көплер оңа хайран галды. Онуң кешби әхли ынсаныңкыдан бетнышанды, сыраты ынсан оглуныңка меңземейәрди.

¹⁵ Ол көп миллетлери гең галдырар; патышалар онуң янында агзыны юмарлар; чүнки олар өң айдылмадык зады гөрүп, эшитмедик затларына дүшүнерлер.