Işaýa 50 - Мукаддес Китап

50‑нҗи бап

¹ Реб шейле диййәр: «Эҗеңиз талак зерарлы гитдими? Эйсем бергидар болуп сатдыммы сизи? Ине, сиз өз этмишлериңиз себәпли сатылдыңыз, сизиң языкларыңыз зерарлы эҗеңиз ковулды.

² Нәме үчин геленимде, хич ким ёкды? Нәме үчин чагыранымда, хич ким җогап бермеди? Сизи азат этмәге гысгамы голум? Я сизи халас этмәге Менде гүйч ёкмы? Өз кәйинҗим билен деңзи гурадярын, дерялары чөле өвүрйәрин; балыклар сувсузлыкдан порсаярлар, тешнеликден өлйәрлер.

³ Гөклере гара гейдирйәрин, җулы оларың өртгүси эдйәрин».

Реббиң гулуның эҗири

⁴ Меҗалсызлара сөз билен ярдам эдерим ялы Хөкмүрован Реб маңа дана дил берди. Ол дана адамлар дей диңлесин дийип, гулагымы ояряр хер сәхер.

⁵ Хөкмүрован Реб гулагымы ачды, мен гаршы чыкмадым, ыза чекилмедим.

⁶ Өзүми урянлара аркамы, сакгалымы үтйәнлере яңагымы тутдум; масгараланмакдан, түйкүрмеден йүзүми гизлемедим.

⁷ Хөкмүрован Реббиң маңа ярдам берендиги үчин, мен утанҗа галмадым, йүзүми чакмакдашы дей этдим, мен утандырылмаҗагымы билйәрин.

⁸ Мени аклаҗак якынымдадыр, мениң билен давалашҗак ким? Гелиң, йүзлешелиң. Гүнәкәрлейҗим ким мениң? Гой, яныма гелсин!

⁹ Маңа ярдам эдйән Хөкмүрован Ребдир. Ким мени гүнәли чыкарҗак? Оларың әхлиси гейим дей көнелер, олара гүе дегер.

¹⁰ Сизиң араңызда Ребден горкуп, Онуң гулуның сөзүне гулак асян бармы? Гараңкылыкда гезйән, ышыгы болмадык, Реббиң адына бил баглап, Худайына даянсын.

¹¹ Эмма от якып, алавлы оклар гушанан сизиң хеммәңиз өз одуңызың ышыгында, якан алавлы окларыңызың арасында гезиң! Мениң элимден башыңыза гелҗек шудур: сиз азап ичинде ятарсыңыз.