Işaýa 5 - Мукаддес Китап

5‑нҗи бап Мивесиз үзүмчилик хакда нагма

¹ Сөйгүлиме үзүмчилик хакдакы сөйги нагмамы айдайын: мес топраклы депеде сөйгүлимиң үзүмчилиги бар.

² Оны агдарып, дашлардан арассалады, сайлама үзүмлер экди. Ортасында гөзегчилик диңини дикди, үзүм сыкмак үчин чукур газды. Үзүм хасылына гарашды, эмма ол ябаны үзүм берди.

³ Инди, эй, Иерусалим илаты, Яхуда халкы! Мен билен үзүмчилигимиң арасында казылык эдиң.

⁴ Үзүмчилигим үчин ене нәме эдейин Мен? Эдилмән галдырылан иш бармы? Хасылына гарашанымда, нәме үчин ябаны үзүм берди?

⁵ Инди Мен сизе үзүмчилигиме нәме этҗекдигими айдарын. Мен онуң хаядыны айрарын, ол вейран эдилер; онуң диварыны йыкарын, оны басгылап заяларлар.

⁶ Оны хараба өврерин, оны пудамазлар, ери беҗермезлер, онда чалыдыр тикенеклер битер; булутлара-да онуң үстүне ягыш ягдырмазлыгы буйрарын.

⁷ Хөкмүрован Реббиң үзүмчилиги Ысрайылың несиллеридир, хош гөрйән багы-да, яхуда халкыдыр. Ол адалата гарашды, йөне зулум гөрди; догрулыга гарашды, йөне дады-перят эшитди.

Адалатсызлык эдйәнлериң дат гүнүне!

⁸ Өй үстүне өй, ер үстүне ер эдинйәнлериң дат гүнүне! Өзүңизден башга ер гоймаярсыңыз, юртда диңе сиз яшамалымы нәме?

⁹ Хөкмүрован Реббиң шейле диенини эшитдим: «Бейик хем гөзел җайлар хараба өврүлер, ичинде хич ким галмаз.

¹⁰ Үзүмчилигиң он танап ери бир мешик шерап берер, он батман тохум диңе бир батман хасыл берер».

¹¹ Ир туруп, чакыр угрунда ылгаянларың, гич агшама ченли шерап ичип, мөвч алянларың дат гүнүне!

¹² Мейлислеринде лирадыр арфа, депрекдир түйдүк чалнып, шерап ичилйәр, йөне Реббиң ишлерине үнс бермейәрлер, Онуң элиниң ишлерини гөрмейәрлер.

¹³ Мунуң үчин халкым наданлыкдан есир эдилип әкидилер, ат-абрайлы адамлары ачлыкдан өлер, көплери болса тешнеликден гырлар.

¹⁴ Шонуң үчин доймагы билмейән өлүлер дүнйәси агзыны гиңден ачды; Иерусалимиң ат-абрайлылары, көплүги, шовхунчылары, шады-хоррамлары бу дүнйә гирерлер,

¹⁵ Ынсан песелдилер, хер кес кичелдилер, текепбир бакышлар песелдилер.

¹⁶ Эмма Хөкмүрован Реб адалатлылыкда бейгелдилер, Мукаддес Худай догрулыкда Өз мукаддеслигини гөркезер.

¹⁷ Гоюнлар өз өрүлериндәки ялы отларлар, овлак-гузулар харабалыкларың арасында отларлар.

¹⁸ Этмиши яланчылык йүплери билен, гүнәни араба танаплары билен сүйрейәнлериң дат гүнүне!

¹⁹ Олар: «Гой, Худай ховлуксын, ишини тиз этсин, биз-де гөрели; Ысрайылың Мукаддесиниң ниетләни тиз амала ашсын, биз хем оны билели».

²⁰ Ямана ягшы, ягша яман диййәнлериң, зулматы нур, нуры зулмат сайянларың, аҗа сүйҗи, сүйҗә аҗы диййәнлериң дат гүнүне!

²¹ Өзлерини пайхаслы, дүшүнҗели сайянларың дат гүнүне!

²² Шерап ичмекде батырларың, чакыр гармакда гүйчлүлериң,

²³ пара үчин гүнәкәри аклаянларың, догрыны хакындан махрум эдйәнлериң дат гүнүне!

Кесеки чозушы өңден айдыляр

²⁴ Одуң сыпалы ялмайшы кимин, гуры отуң алав ичинде ашак чөкүши кимин, оларың көки-де шейле чүйрәр, гүллери тозан кимин гөге соврулар; чүнки олар Хөкмүрован Реббиң кануныны рет этдилер, Ысрайылың Мукаддесиниң сөзүни әсгермедилер.

²⁵ Мунуң үчин Реббиң газабы Өз халкына гаршы ловлаяр, элини олара гаршы узадып, җеза берйәр; даглар титрешйәр, маслыклары зибил кимин көчелерде ятыр, Шонда-да Онуң газабы көшешмәнди, эли энтек хем җеза бермәге тайын.

²⁶ Ол узакдакы миллетлере нышан иберер, олары ериң аңры уҗундан сыкылык билен чагырар, ине, олар дазлап, тизден етип гелерлер.

²⁷ Ичинде ядавы, бүдрейәни болмаз, хич ким иркилмез я-да укламаз, биллериниң гушагы говшамаз, чарыкларының багы үзүлмез.

²⁸ Оклары йитидир, яйлары-да дартыландыр, атларының тойнаклары чакмакдаша меңзейәр, арабаларының тигирлери түвелее.

²⁹ Аррылдылары арсланыңкы дей, яш ширлер кимин арлаярлар; арлап, авуны тутярлар, оны алып гидйәрлер, халас этҗек ёк.

³⁰ Шол гүн олар авуның үстүнде деңиз гүввүлдиси кимин арларлар, ким юрда назар салса, ине, гараңкылык хем хасрат; нур гара булутлар билен өртүлер.