Işaýa 48 - Мукаддес Китап

48‑нҗи бап Реб Ярадыҗы хем Пенакәрдир

¹ Эй, Якубың несли, гулак гой! Ысрайылың ады билен атландырылан, Яхуданың билинден өнен, сиз, Ребден ант ичйәрсиңиз, ятлаярсыңыз Ысрайыл Худайыны, эмма чын йүрекден, догрулык билен этмейәрсиңиз булары.

² Өзлерини мукаддес шәхерден дийип, Ысрайыл Худайына даянярлар олар; Онуң ады Хөкмүрован Ребдир.

³ «Гечмишдәкилери овалдан Мен беян этдим, Мениң агзымдан чыкды, Мен олары билдирдим; дуйдансыз шейле этдим, олар берҗай болды.

⁴ Сизиң кесирдигиңизи Мен билйәндирин. Еңсе дамарыңыз демирдендир, маңлайыңыз мисдендир.

⁵ Булары сизе овалдан беян этдим. „Булары эден мениң бутум, ойма, гуйма хейкеллерим булары буйрук берди“ диймезиңиз ялы, берҗай болманкалар, олары сизе аян этдим.

⁶ Инди эшиденлериңизиң әхлисини гөрүң; олары ыглан этҗек дәлмисиңиз? Индиден бейләк сизе тәзе затлары, сизиң билмейән, гизлин затларыңызы айдарын.

⁷ Булар яңы ярадылды, гечмишде дәл, шу гүне деңеч билмедиңиз булары, „Булары эййәм билйәрдик“ диердиңиз ёгса.

⁸ Не эшитдиңиз сиз, не-де билдиңиз, овалдан гулагыңыз ачылманды. Мен сизиң дөнүклик этҗекдигиңизи билдим, догланыңыздан бәри сизе топалаңчы дийилди.

⁹ Өз адымың хатырасына гахарымы ятырярын, гахарымы саклаярын Өз хорматымың хатырасына, ёк эдердим сизи ёгсам.

¹⁰ Ине, сени сапладым, йөне күмүш дек дәл, азап күресинде сынадым сени.

¹¹ Өз хатырама, Өз мертебәме муны эдйәрин, нәме үчин Мениң адым харлансын? Башга бермерин Өз шөхратымы.

Бабылдан чыкың!

¹² Эй, Якуп, эй, чагыраным Ысрайыл, Мени диңле! Мен Шолдурын, Илкинҗи-де, Ахыркы-да Мендирин.

¹³ Ериң бинядыны гоян Мениң элимдир, Мениң саг элимдир гөклери яйрадан; бары бирликде өңүмде дурярлар, олары чагыранымда».

¹⁴ Хеммәңиз топланың, диңләң! Бутларың хайсысы булары өңден аян этди? Реб бирини сайлап-сечер, ол Реббиң Бабыла гаршы максадыны амала ашырар, онуң голы бабыллылара гаршы болар.

¹⁵ «Мен, хава, Мен гепледим, оны Мен чагырдым, Мен гетирдим, ол өз ёлунда үстүнлик газанар.

¹⁶ Маңа якынлашың-да, муны эшидиң! Овалдан яшырын геплән дәлдирин Мен, шондан бәри Мен шол ерде». Инди Хөкмүрован Реб мени ве Рухуны иберди.

¹⁷ Пенакәриңиз, Ысрайылың Мукаддеси Реб шейле диййәр: «Пейдалы зады өвредйән сизе, йөремели ёлуңыздан әкидйән Худайыңыз Реб Мендирин.

¹⁸ Табшырыкларыма гулак асан болсадыңыз, шонда абаданлыгыңыз деря дей, догрулыгыңыз деңиз толкунлары дей боларды.

¹⁹ Перзентлериңиз чәге дей, несиллериңиз чәге овнуклары дей боларды; атлары хузурымдан айрылмаз, ёк эдилмез».

²⁰ Бабылдан чыкың, кесетлерден гачың, муны шатлыклы оваз билен аян эдиң, җар эдиң, аңры четине етсин земиниң; «Реб бендеси Якубы азат этди!» дийиң.

²¹ Чөллериң ичи билен әкидиленде-де, сувсаманды олар, олар үчин гаядан сув акдырды; Ол гаяны ярды, сув чогуп чыкды ондан.

²² Реб: «Пислере рахатлык ёкдур» диййәр.