Işaýa 46 - Мукаддес Китап

46-нҗы бап Реббиң максатлары

¹ Бел худайы дыза чөкйәр, Небо худайы эгилйәр, хейкеллери өкүзлере йүкленйәр; дашаян затларыңыз агыр йүк дей, ядав хайванлара йүкленилйәр;

² худайлар эгилйәрлер, дыза чөкйәрлер, хейкеллерини халас эдип билмән, өзлери сүргүн эдилйәрлер.

³ Эй, Якубың несли, Ысрайыл неслиниң аман галанлары! Гөвреде галаныңыз бәри этдим аладаңызы, догланыңыз бәри элимде гөтердим.

⁴ Гарраныңызда-да, Мен Шолдурын, сачыңыз агаранда хем сизи гөтерерин, сизи Мен яратдым, Өзүм гөтерерин, Мен гөтерип, сизи халас эдерин.

⁵ Мени киме меңзедйәрсиңиз? Ким билен деңешдирйәрсиңиз? Киме деңейәрсиңиз, Маңа меңзейән бармы?

⁶ Алтыны торбадан гуйянлар, күмши терезиде чекйәнлер бир зергәри хакына тутярлар, ол-да олардан бир худай ясаяр; олар ере йүзин дүшүп, оңа сежде эдйәрлер.

⁷ Оны геришлерине алып гөтерйәрлер, еринде гойярлар, ол шол ерде дуряр, еринден гозганып билмейәр. Җогап бермейәр оңа перят эденлеринде, хич бир беладан гутармаяр.

⁸ Эй, гүнәкәрлер, унутмаң муны, мерт болуң, чыкармаң ятдан.

⁹ Гадымда болан-гечен затлары ятлаң, Мен Худайдырын, Менден башга Худай ёкдур, Мен Худайдырын, Маңа меңзейән ёкдур.

¹⁰ Овалдан ахыра болҗагы, хениз болмадыклары аян эдйәрин. Мен: «Берҗай болар максатларым, бар ислеглерими амал эдерин» диййәрин.

¹¹ Гүндогардан бир йыртыҗы гушы, максадымы берҗай этҗек бирини узак юртдан чагырдым. Булары айдан Мендирин, ерине-де етирерин; Мен ниет этдим, амала ашырарын оны.

¹² Эй, гутулышдан узак болан дикдүшдилер, гулак гоюң Маңа!

¹³ Мен халас этмек үчин якын гелйәрин, узакда дәлдирин, узак эглемерин халас эдишими, Сионы халас эдерин, Ысрайыла шөхратымы берерин.