Işaýa 43 - Мукаддес Китап

43‑нҗи бап Ысрайылың Халасгәри

¹ Эмма инди, эй, Якуп, сени ярадан, эй, Ысрайыл, сени дөреден Реб шейле диййәр: «Горкма, чүнки Мен сени азат этдим, адыңы тутуп чагырдым, сен Мениңкисиң.

² Сениң билен боларын сувлардан гечениңде, дерялардан гечениңде, сени гарк этмез олар, одуң ичинден йөрәниңде янмарсың, ялын якмаз сени.

³ Мен сениң Худайың Реб, Ысрайылың Мукаддеси, сениң Халасгәриң. Мен саңа төлег хөкмүнде Мүсүри, сениң ериңе Эфиопияны, Себаны бердим.

⁴ Назарымда эзиз, гадырлы болуп, сени сөййәндигим үчин, сениң өвезиңе адамлар, халклар берерин җаныңың дерегине.

⁵ Горкма, Мен сениң билендирин; перзентлериңи гүндогардан, сени гүнбатардан гетирерин.

⁶ Демиргазыга: „Олары бер“, гүнорта: „Олары саклама“ диерин; огулларымы узакдан, гызларымы ериң четлеринден,

⁷ Маңа дегишли болан хер кеси, Өз шөхратым үчин яраданымы, шекил берип дөреденими гетир.

⁸ Гөзли көрлери, гулаклы керлери өңе чыкар.

⁹ Әхли миллетлер бир ере йыгнансын, халклар топлансын, оларың арасында ким муны ыглан этди? Хайсысы болуп геченлери өңден билдирди? Гүвәлерини гетирип, өзлерини акласынлар, башгалар эшидип: „Бу догры“ дийсинлер.

¹⁰ Сиз Мениң шаядымсыңыз, муны Мен – Реб айдяндырын. Өз сайлан бенделеримсиңиз, Сиз Мени билип, Маңа ынам эдиң, Мениң Шолдугыма дүшүниң, Менден өң хич худай болан дәлдир, Менден соң-да хиҗиси болмаз.

¹¹ Мен, диңе Мен Ребдирин, Менден башга Халасгәр ёкдур.

¹² Мен ыглан этдим, халас этдим, аян этдим, араңызда башга худай ёк; сиз Мениң шаятларым. Муны Мен – Реб айдяндырын.

¹³ Овалдан бәри Мен Олдурын. Элимден халас эдип билҗек ёкдур. Мениң эденими ятырып билҗек бармы?»

¹⁴ Пенакәриңиз, Ысрайылың Мукаддеси Реб шейле диййәр: «Сизиң хатыраңыза Бабыла лешгер ёллап, әхли бабыллылары гачгаклар хөкмүнде буйсанян гәмилеринде гетирерин.

¹⁵ Сизиң Мукаддесиңиз, Ысрайылы Ярадан, Патышаңыз Реб Мендирин».

^16-17 Деңизден ёл, чуң сувлардан ёда ачяр Реб, сөвеш арабалары, атлары, гошунлары сөвешиҗилери билен чыкаряр Ол; олар йыкылып, галып билмейәрлер, өчүрилйәрлер, пелтелер дек сөндүрилйәрлер. Булары эдйән Реб шейле диййәр:

¹⁸ «Ятламаң өтен затлары, көне затлара үнс бермәң.

¹⁹ Ине, Мен бир тәзе зат эдйәрин, ол хәзир башлаяр, гөрмейәрмисиңиз? Мен чөлде ёл, сәхрада дерялар эмеле гетирерин.

²⁰ Ябаны хайванлар, шагаллардыр дүегушлар Мени хорматларлар. Мен Өз сайлан халкымы гандырмак үчин чөлде сувлар, сәхрада дерялар билен үпҗүн этдим.

²¹ Маңа алкыш айтсынлар дийип, Өзүм үчин яратдым бу халкы.

²² Эмма сен, эй, Якуп, чагырмадың Мени, эй, Ысрайыл, Менден ирдиң сен!

²³ Гоюнларыңызы гетирмедиңиз Маңа якма гурбанлык үчин, гурбанлыкларыңыз билен Мени сыламадыңыз. Садакалары сизе агыр йүк этмедим, якымлы ыслы түтетги билен иризмедим.

²⁴ Хошбой ыслы гамыш сатын алмадыңыз Маңа, гурбанлыкларыңызың ягындан доюрмадыңыз, гүнәлериңиз билен Маңа йүк болдуңыз гайтам, этмишлериңиз билен Мени ириздиңиз.

²⁵ Өз хатырам үчин языкларыңызы өчүрйән Мендирин, Мен гүнәлериңизи ятламарын.

²⁶ Маңа ятлат! Гел, билеликде давалашалың, акланар ялы делиллериңи айт.

²⁷ Илкинҗи атаңыз гүнә этди, төвеллачыларыңыз гаршыма чыкдылар.

²⁸ Мунуң үчин биабрай этдим ыбадатхананың руханыларыны, Якубы долы вейранчылыга, Ысрайылы рысвалыга хөкүм этдим».