Işaýa 41 - Мукаддес Китап

41‑нҗи бап Реб Ысрайыла медет берйәр

¹ «Эй, адалар, Мениң хузурымда дымың, халклар тәзеден гүйч топласынлар, олар якына гелип, геплесинлер; хөкүм үчин биле топланалың.

² Гүндогардан догры адамы аяга галдыран ким? Оны хызматына чагыран ким? Миллетлери онуң элине берйәр, патышалары аяк астында эзйәр, олары гылыҗы билен тозана, соврулан самана өвүрйәр яйы билен.

³ Ковалаяр олары, саг-аман гечйәр аяк басмадык ёдасындан.

⁴ Башдан несиллери чагырып, булары эден, тамамлан ким? Мен – Реб олар билен илкибашдан болдум, ахырда хем олар билен болҗак Мендирин.

⁵ Адалар муны гөрүп, горкярлар, ериң аңры учлары титрешйәрлер, олар якынлашып гелйәрлер.

⁶ Херси бейлекисине көмек эдйәр, бири-бирине: „Батыр бол!“ диййәр.

⁷ Хүнәрмент зергәри, чекич билен текизлейән сандала уряны рухландыряр. Кебширлейиш хакда: „Бу говы болды“ диййәр; гозганмаз ялы чүй билен беркидйәр.

⁸ Эмма сени, эй, бендәм Ысрайыл, Өз сайланым Якуп, достум Ыбрайымың несиллери,

⁹ ериң аңры уҗундан топладым, узак ерлерден чагырып: „Сиз Мениң бендәмсиңиз, Мен сизи сайладым, терк этмедим“ дийдим.

¹⁰ Горкмаң, сизиң билендирин Мен, хедер этмәң, Худайыңыздырын Мен, сизе гүйч берерин, ярдам эдерин, садык саг голум билен сөйгет берерин.

¹¹ Сизе гаршы газапланянларың әхлиси утандырылар, иле рысва эдилер. Хич зат дек ёгалып гидерлер сизе гаршы чыкянлар.

¹² Душманларыңызы тапып билмерсиңиз агтарарсыңыз-да, хич затча болман ёгалып гидерлер сизе гаршы чыкянлар.

¹³ Худайыңыз Мен – Реб саг элиңизден тутарын, сизе: „Горкмаң, ярдам эдерин“ диййән Мендирин.

¹⁴ Эй, ер гурчугы Якуп, эй, Ысрайыл адамлары, горкмаң! Сизе көмек эдерин. Муны Мен – Реб, Ысрайылың Мукаддеси, Пенакәриңиз айдяндыр.

¹⁵ Ине, Мен сизи йити, тәзе, дишли дөвек гуралы этдим; сиз даглары дөверсиңиз, оврадарсыңыз, байырлары саман чөпи кимин эдерсиңиз.

¹⁶ Сиз олары соврарсыңыз, шемал олары учурып әкидер, харасат олары пытрадар. Онсоң сиз Ребде шатланарсыңыз, Ысрайылың Мукаддесинде шөхратланарсыңыз.

¹⁷ Гарыплар, мәтәчлер сув агтарярлар, йөне сув ёк; тешнеликден кепейәр агызлары, Мен – Реб олара җогап берерин, Ысрайыл Худайы Мен олары терк этмерин.

¹⁸ Мен ачык депелерден дерялар, дерелериң ортасындан булаклар акдырарын; чөли көле, гуры ери сувлы чешмелере өврерин.

¹⁹ Чөлде кедр, акация, мирт, зейтун агачларыны отурдарын, сервини, чынары, арчаны сәхрада биле дикерин.

²⁰ Онсоң хеммелер муны Реббиң элиниң эдендигини, Ысрайылың Мукаддесиниң ярадандыгыны гөрерлер, билерлер, акыл етирерлер, дүшүнерлер».

Бутлар бидерекдир

²¹ Реб: «Даваңызы айдың» диййәр, Якубың Патышасы: «Субутнамаңызы гетириң» диййәр.

²² «Бутларыңызы гетириң, гой, олар нәме болҗагыны айтсынлар, ойланып, соңуны билеримиз ялы гечмишде боланлары аян этсинлер, я-да болҗак затлары бизе хабар берсинлер.

²³ Сизиң худайлардыгыңызы билеримиз ялы, бизе мундан соң болҗак затлары билдириң; горкуп, хедер эдеримиз ялы, я ягшылык, я-да яманлык эдиң.

²⁴ Эмма сиз хич затсыңыз, ишлериңиз-де бидерек; сизи сайлан йигренҗидир.

²⁵ Мен демиргазыкдан бирини өҗүкдирдим, ол гелйәр, гүндогардан адымы тутуп чагырян бири. Ол күйзегәриң тойны депелейши кимин хөкүмдарлары палчык кимин депеләр.

²⁶ Биз билер ялы, ким муны башлангычдан ыглан этди? „Ол мамла“ диеримиз ялы, ким өңүнден хабар берди? Хич ким хабар бермеди, хич ким җар этмеди, хич ким сөзлериңизи эшитмеди.

²⁷ Илки Сиона: „Ине, олар!“ дийип аян этдим, Иерусалиме хабарчы ёлладым.

²⁸ Серетдим, йөне хич ким ёк, араларында маслахатчы ёк, сорагыма җогап берҗек ёк.

²⁹ Ине, оларың хеммеси галп, ишлери хич затдыр, бутлары бош елдир».