Işaýa 40 - Мукаддес Китап

40-нҗы бап Худайың халкы көшешдирилйәр

¹ Худайыңыз: «Теселли бериң, халкыма теселли бериң» диййәр.

² Иерусалиме мылайым сөзлери айдың: сөвеш мөхлетиниң гутарандыгыны, языкларының гечилендигини, гүнәлериниң җезасыны Реббиң элинден ики эссе эдип аландыкларыны ыглан эдиң.

³ Бир сес гыгыряр: «Сәхрада Реббе ёл тайынлаң, чөлде Худайымыз үчин ёда дүзләң.

⁴ Әхли дерелер бейгелдилер, әхли даглар ве депелер песелдилер, аңңат ерлер текизленер, бейикли-песли ерлер дүзлүге өврүлер.

⁵ Шонда Реббиң шөхраты аян болар, әхли ынсанлар оны бирликде гөрерлер, муны айдян Ребдир».

⁶ «Җар эт!» диййәр бир сес. Мен: «Нәмәни җар этмели?» дийдим. Әхли ынсанлар отлук киминдир, оларың гөзеллиги мейдан гүли киминдир.

⁷ Реб демини үфләнде, от гураяр, гүл соляр. Хакыкатдан хем, халк отлукдыр.

⁸ От гураяр, гүл соляр, эмма Худайымызың сөзи эбеди галяр.

⁹ Эй, Сион, хош хабар, бейик дага чык! Эй, Иерусалим, хош хабар, сесиңи батлы гаталт! Сесиңи батландыр, горкма; Яхуда шәхерлерине: «Ине, Худайыңыз!» дийиң.

¹⁰ Ине, Хөкмүрован Реб гүйҗи билен гелйәр, Ол гудрат билен хөкүм сүрйәр, байрагы янындадыр, лайык хакы өңүндедир.

¹¹ Ол сүрүсини чопан кимин бакяр, гузулары Өз элине аляр, олары гөтерип, багрына басяр, эне гоюнлара ёл гөркезйәр.

Реббе тай ёк

¹² Сувлары гошавуҗы билен, гөклери гаршы билен өлчән ким? Ериң тозуны өлчеге салан, Байырлары терезиде, даглары гапанда чекен ким?

¹³ Реббиң Рухуна ким акыл етирди? Ким Оңа маслахат берип билди?

¹⁴ Акыл үчин Ол кимден маслахат сорады? Адалат ёлуны Оңа өвреден ким? Оңа билим берип, пайхас ёлуны гөркезен ким?

¹⁵ Ине, миллетлер ягыш дамҗасы кимин, терезилердәки тоз кимин сайыляр, Ол адалары тоз дейин әкидйәр.

¹⁶ Ливан җеңңелиниң одуны етерлик болмаз, маллары якма гурбанлыга азлык эдйәр.

¹⁷ Әхли миллетлер Онуң өңүнде хич затдыр, олары хич зат хасаплап, бошлукдан-да пес сайяр.

¹⁸ Онда Худайы киме меңзедйәрсиңиз? Хайсы меңзетмәни уланярсыңыз Онуң үчин?

¹⁹ Бутумы? Оны бир хүнәрмент гуйяр, зергәр оны алтына гаплаяр, онуң үчин күмүш зынҗыр ясаяр.

²⁰ Бейле гурбанлыга гурбы чатмаян киши, бир чүйремез агаҗы сайлаяр. Мәкәм отурдылан бут ясатҗак болуп, өкде уссаның гөзлегине чыкяр.

²¹ Билмейәрмисиңиз? Эшитмедиңизми? Сизе башдан айдылмадымы? Дүнйә ярадыланы бәри дүшүнмедиңизми?

²² Земин гүммезинде отурян Олдур, ерде яшаянлар чекиртгелер киминдир, гөклери перде кимин герип, яшамак үчин чадыр кимин язян Олдур.

²³ Шазадалары хич эдйән, дүнйәниң хөкүмдарларыны пуҗа чыкарян Олдур.

²⁴ Олар экилип, сепилип, балдаклары ере зордан көк уран дессине, Реб демини үфлейәр, олар гураярлар, харасат олары саман дек совуряр.

²⁵ «Мени киме меңзедерсиңиз? Ким Маңа тай гелер?» Муны Мукаддес Болан диййәр.

²⁶ Гөзлериңизи гөге тарап галдырың, Булары ярадан ким? Реб гөкдәки гошунлары екеме-еке чыкаряр, атларыны тутуп, чагыряр, Онуң зор гүйҗүне, бейик гудратына гөрә оларың хич бири кемлик этмейәр.

²⁷ Нәме үчин, эй, Якуп, эй, Ысрайыл: «Ёлум Реббе аян дәлдир, Худайым хакыма дыкгат бермеди» диййәрсиңиз?

²⁸ Билмейәрсиңизми? Эшитмедиңизми? Реб – эбеди Худай, ериң әхли күнҗегиниң Ярадыҗысы. Ол эҗизлейән я-да ядаян дәлдир, Онуң дүшүнҗесине акыл етмез.

²⁹ Ол эҗизлери кувватландыряр, меҗалсызларың гүйҗүни артдыряр,

³⁰ Хатда яшлар-да ысгындан гачып, ядаярлар, яш йигитлер-де бүдрәп, йыкылярлар.

³¹ Эмма Реббе умыт баглаянлар тәзеден гүйч топларлар, бүргүтлер дек ганат яйып беленде галарлар, йүврерлер, йөне ядамазлар, йөрәрлер, йөне ысгындан гачмазлар.