Işaýa 34 - Мукаддес Китап

34‑нҗи бап Миллетлере гаршы хөкүм

¹ Эй, миллетлер, голайрак гелиң-де, эшидиң! Эй, халклар, диңләң! Ер йүзи ве ондакы хер кес, дүнйәдәкилер, онда дөрәнлериң бары эшитсин!

² Реб миллетлере гахарланяр, гошунларына гаршы газабы туташяр, олары бүтинлей ёк эдер, өлүме берер.

³ Өлүлери дашары ташланар, маслыкларының ысы яйрар, даглардан оларың ганы акар.

⁴ Гөгүң әхли гошунлары чүйрәр, асман кагыз кимин дүйрленер; әхли асман җисимлери үзүм агаҗының япрагы дек, инҗир агаҗының япрагы дек соларлар.

⁵ Гылыҗым гөклерде гандан ганды, ине, гылыҗым Эдомың үстүне, бүтинлей ёк этҗек халкымың үстүне җеза үчин инер.

⁶ Реббиң гылыҗы гана буланандыр, гузудыр овлакларың ганындан долудыр, яг, гочларың бөврек ягы билен өртүлендир; Реббиң Босрада гурбанлыгы бар, Эдомда улы гыргын болар.

⁷ Ябаны гәвмишлер, өкүзчелердир, гүйчли өкүзлер ере серлер. Юртлары гана эзилер, топраклары яга.

⁸ Реббиң өч гүни, Сионың ынҗамасындан ар алыш йылы болар.

⁹ Эдомың чешмелери эргин шепбиге топрагы күкүрде, юрды янып дуран шепбиге өврүлер.

¹⁰ Гиҗе-гүндиз сөнмез ол, түссеси бакы түтәр, несилден-несле чоларар ятар, асырлар бойы ичинден хич ким гечмез.

¹¹ Готанлар билен кирпилер Эдомы эеләрлер, байгушлардыр гаргалар месген тутарлар онда, Реб онуң үстүне алҗыраңңылык йүпүни, вейранчылык йүпүни өлчемек үчин чекер.

¹² Шалык сүрер ялы асылзадалары ёк инди, әхли хөкүмдарлары хич инди.

¹³ Көшклеринде тикенлер, галаларында читчитидир бүрмеклер гөгерер, шагалларың меканына, дүегушларың месгенине өврүлер.

¹⁴ Вагшы хайванлар сыртланлара душарлар, даг гочлары хөвүрлерини чагырарлар, гиҗеки җандарлар-да ол ерде орнашып, дынч алмага ер тапарлар.

¹⁵ Ол ерде байгушлар хөвүртгеләп, юмуртгалар ве чагалар, олары өз саясына үйшүрерлер, чайкеллер-де җүбүт-җүбүтден топланар.

¹⁶ Реббиң китабындан окап агтарың: булардан хиҗиси-де кем болмаз, хич бири өз җүбүтини йитирмез. Муны Реб буюрды, Онуң Рухы олары үйшүрди.

¹⁷ Олар үчин биҗе атды, Өз эли билен юрды өлчәп пайлады, Олар оны бакы эеләрлер, ол ерде яшарлар несиллер бойы.