Işaýa 32 - Мукаддес Китап

32‑нҗи бап Адыл дөвлет вада берилйәр

¹ Ине, патыша догрулык билен шалык эдер, хөкүмдарлар адалатлык билен хөкүм сүрерлер.

² Оларың херси елден букы, тупандан пена, гурак ерде булаклар, тешне юртдакы улы гаяның көлегеси дек болар.

³ Гөрйәнлериң гөзлери юмулмаз, эшидйәнлер-де гулак гоярлар.

⁴ Акылсызың акылы гоялар, сакав ачык-айдың гепләр.

⁵ Акмага мундан бейләк асылзада дийилмез, ярамаза хормат гоюлмаз.

⁶ Акмак биэдеплик билен геплейәр, онуң ниети пислик этмекдир, иши яманлык этмек, Реббе дил етирмек, ачлары ач, сувсузлары сувсуз гоймакдыр.

⁷ Хилегәриң ярагы ямандыр, пукара догры сөзлейән хем болса, олар ялан сөзлери билен оны хеләк этҗек болуп, ниетлерини ямана дикйәндирлер.

⁸ Эмма асылзада асыллы ниет эдйәр, асыллы ишлеринде берк дуряр ол.

Өзүне буйсанян аяла дуйдурыш

⁹ Эй, өзлерине буйсанян аяллар, туруң, сесими эшидиң! Эй, өзлерине даянян аяллар, сөзүме гулак гоюң!

¹⁰ Эй, өзлерине буйсанян аяллар, бир йылдан соңра титрешерсиңиз, чүнки үзүм хасыл бермез, миве йыгымы болмаз.

¹¹ Эй, өзлерине даянян аяллар титрешиң, эй, өзлерине буйсанян аяллар сандырашың, эшиклериңизи чыкарып атып, билиңизе җул баглаң!

¹² Аҗайып экин мейданлары үчин, хасыллы үзүм багы үчин, дөшүңизе уруп аглашың!

¹³ Халкымың тикендир чалы битен топрагы үчин, шадыян шәхердәки шатлыкдан долы өйлер үчин аглашың!

¹⁴ Көшк терк эдилер, шовхунлы шәхер бош галар; галадыр гөзегчи диңи харабалыга, гуланларың гиң ерине, сүрүлериң өрүсине өврүлер.

¹⁵ Үстүмизе ёкардан Рух дөкүлйәнчә, чөл хасыллы мейдана өврүлйәнчә, мес топраклы ер токая дөнйәнчә шейле болар.

Асуда дурмуш

¹⁶ Онсоң чөлде адалат месген тутар, догрулык хасыллы мейданда яшар.

¹⁷ Догрулыгың мивеси рахатлык, нетиҗеси асудалык, эбеди ховпсузлыкдыр.

¹⁸ Халкым өйлеринде рахатлыкда, ховпсуз ерлерде, асуда месгенде яшарлар.

¹⁹ Җеңңел бүтинлей ёк болса-да, ер билен егсан эдиленем болса шәхер,

²⁰ хер чешмәниң боюнда экин экйән, өкүзи, эшеги бош иберйән сиз багтлы боларсыңыз!