Işaýa 30 - Мукаддес Китап

30-нҗы бап Питнечи халк

¹ «Питнечи халкың дат гүнүне! Олар Мениңкини дәл-де, өз ниетлерини берҗай эдйәрлер; Менден сорашман ылалашык баглашып, гүнә үстүне гүнә гошярлар. Муны Реб айдяндыр.

² Фараоның пенасында пеналамак үчин, Мүсүриң көлегесинде гоналга гөзлемек үчин, Менден геңешсиз Мүсүре гидйәрлер.

³ Фараоның горагы олара утанч, рысвалык болар Мүсүриң көлегесини пеналамак.

⁴ Баштутанлары Зоганда болуп, илчилери Ханасе етенем болсалар,

⁵ өзлерине пейдасы болмадык халк зерарлы утанҗа галар олар. Не ярдам берйәр бу халк, не-де пейда берйәр, гайтам олары утанҗа ве гыҗалата гойяр».

⁶ Негеп хайванлары барада пыгамберлик: уркачы хем эркек арсланың, алахөврениң хем учян йыланың яшаян, алада хем хасрат юрдуның үстүнден гечип, байлыкларыны эшеклериниң аркасына, хазыналарыны дүелериниң өркүҗине атып, пейдасыз халка әкидип берйәрлер.

⁷ Мүсүриң ярдамы бош хем пейдасыздыр. Мунуң үчин Мен оны: «Үмсүм отурян Рахап» дийип атландырдым.

⁸ Инди гит-де, муны ясы даш бөлегине яз, дүйрленен кагыза гечир. Бу гелҗекки гүнлер үчин эбеди шаят болсун!

⁹ Бу питнечи халк, хилегәр огуллар, Реббиң өвүдине гулак гоймаян огуллардыр.

¹⁰ Олар гөргүрлере: «Гөрмәң», пыгамберлере: «Бизе догры затлары пыгамберлик этмәң, сүйҗи сөзлер айдың бизе, хилели затлары пыгамберлик эдиң.

¹¹ Ёлдан совлуң, ёдадан айрылың, бизи Ысрайылың Мукаддеси билен йүзлешдирмәң» диййәрлер.

¹² Мунуң үчин Ысрайыл Мукаддеси шейле диййәр: «Бу сөзи рет эдип, зулум хем хилегәрлиге бил баглап, олара даяняндыгыңыз үчин,

¹³ бу этмиш белент диварда пейда болуп опурылып гелйән җайрык кимин болар; диварың йыкылышы дуйдансыз болуп гечер.

¹⁴ Дөвлүши күйзегәриң күйзесиниң дөвлүши киминдир; ол шейле бир пытрар велин, дөвүклериң арасында оҗакдан от алмага, гуюдан сув алмага яраҗак бөлек тапылмаз».

¹⁵ Мунуң үчин Хөкмүрован Реб, Ысрайылың Мукаддеси шейле диййәр: «Маңа доланып, рахатлык тапанда халас боларсыңыз; гүйҗүңиз асудалыкда ве ынамда болар», йөне сиз ислемейәрсиңиз.

¹⁶ Сиз: «Ёк, биз атлы гачарыс» дийдиңиз. Шонуң үчин гачарсыңыз! Сиз: «Йүврүк атлара мүнерис» дийдиңиз. Шонуң үчин ковгучылар йүврүк болар.

¹⁷ Бир кишиниң хайбатындан мүң киши гачар, бәш кишиниң хайбатындан сиз гачарсыңыз, аман галанларыңыз дагың депесиндәки байдак сырыгы, депедәки байдак кимин боларсыңыз.

¹⁸ Реб сизе мерхемет этҗек болуп гарашяр, ёкарда сизе рехим этмәге хәзир, чүнки Реб адалат Худайыдыр; Оңа интизарлар нәхили багтлы!

¹⁹ Эй, Сионың-Иерусалимиң халкы, агламарсыңыз инди сиз! Перят эдениңизде, сизе мерхемет эдер Ол, оны эшиденинде, сизе җогап берер.

²⁰ Реб сизе азап чөрегини, күлпет сувуны берсе-де, Мугаллымыңыз инди гизленмез, гөзүңиз билен Оны гөрерсиңиз.

²¹ Сага, сола өврүлениңизде, ызыңыздан: «Ёл будур, шундан йөрәң» диен сеси эшидерсиңиз.

²² Онсоң күмүш билен өртүлен бутларыңызы, алтына гапланан хейкеллериңизи харам саярсыңыз; олары харам эсги хөкмүнде ташларсыңыз, сиз олара: «Гүм болуң!» диерсиңиз.

²³ Реб ере сепен тохумыңыз үчин ягыш берер, ер хасылының чөреги бол ве берекетли болар. Шол гүн мал-гараларыңыз гиң өрүлерде отларлар.

²⁴ Ер беҗерйән өкүзлер билен эшеклер күрек ве ябак билен соврулан сайлама ийм иер.

²⁵ Улы гыргынчылык гүнүнде, диңлер йыкыланда, хер бейик дагда, хер белент байырда акар сувлы чешмелер болар.

²⁶ Реббиң Өз халкының яраларыны сарап, Өз етирен шикесине шыпа берен гүни, Айың нуры Гүнүң нуры дек, Гүнүң нуры еди Гүнүң нуры дек, еди эссе артык болар.

Реб Ашуры җезаландыряр

²⁷ Ине, Реббиң Өзи узакдан гелйәр, ловлаян газап билен гара булудың ичиндедир Ол; додаклары гахардан долы, дили ялмаян от киминдир.

²⁸ Онуң деми җошуп, кекирдеге етйән чешме киминдир, миллетлери хеләкчилик элегинден гечирер, халкларың агзында ёлдан азашдырян агыззырык болар.

²⁹ Мукаддес байрам белленйән гиҗесиндәки дек айдым айдарсыңыз; Реббиң дагына, Ысрайылың Гаясына түйдүк чалып чыкян дек, йүрегиңиз шатланар.

³⁰ Реб хайбатлы сесини эшитдирер, ловлаян газап билен, ялмаян от ялны билен, булутларың партламасы билен, тупан хем долы билен голуның гудратыны гөркезер.

³¹ Реббиң сесинден Ашур вехим эдер, Ол хасасы билен Ашуры урар.

³² Реббиң оларың үстүнден индерйән җеза хасасының хер зарбасы депреклердир лиралар билен амала ашырылар; Реб газаплы сөвешлер билен гаршысына чыкар онуң.

³³ Җесетлер якылян бир ер тайынланды, хава, ол патыша үчин тайынланды; ол ер чуңңур хем гиң эдилди, ол одун билен долдурылды. Күкүрт акымы кимин оны яндырар Реббиң деми.