Işaýa 3 - Мукаддес Китап

3‑нҗи бап Иерусалимдәки битертиплик

¹ Ине, Хөкмүрован Таңры Реб Иерусалимден, Яхудадан ярдамы ве азыгы, наны ве сувы кесер.

² Сөвешиҗилердир эсгерлери, казылардыр пыгамберлери, палманлардыр яшулулары,

³ эллибашылары, атлы-абрайлы адамлары, маслахатчылардыр мекир гөзбагчылары, өкде җадыгөйлери арадан айрар.

⁴ Етгинҗеклери олара баштутан эдерин, гөвнүне геленини эдйәнлер олара хөкмүрованлык эдерлер.

⁵ Ынсан ынсана, гоңшы гоңшусына сүтем эдер, яшлар яшулулары, гарамаяк адамлар абрайлы адамлары сыламазлар.

⁶ Гарындаш гарындашына япышып, өз уругындан болана шейле диер: «Эгниңде эшигиң бар, сен бизе баштутан бол! Бу харабалыклар сениң гол астыңда болсун».

⁷ Шол гүн ол адам гыгырып, шейле диер: «Мен яраңызы сарап билмен; өйүмде не чөрек бар, не-де гейим, мени халка баштутан этмәң».

⁸ Иерусалимиң бүдрейәндиги, Яхуданың йыкыляндыгы үчин, Реббиң шөхратлы барлыгыны әсгермән сөзлериниң ве эдйән ишлериниң Реббе гаршы боландыгы үчин шейле болар.

⁹ Йүз кешплери өзлериниң гаршысына шаятлык эдйәр, гүнәлерини Содом ялы әшгәр эдйәрлер, олары яшырмаярлар, оларың дат гүнүне! Бетбагтчылыгы сатын алдылар олар.

¹⁰ Догрулара айдың, ягшылык гөрерлер олар, өз ишлериниң мивесини иерлер.

¹¹ Пислериң дат гүнүне! Бетбагтчылык инер оларың башына, эллери билен эденлерини эгинлери билен чекерлер.

¹² Чагалары халкыма сүтем эдйәрлер, аяллары үстлеринден хөкүм сүрйәрлер. Эй, халкым, баштутанларыңыз сизи азашдырярлар, йөреҗек ёдаларыңызы булашдырярлар.

¹³ Реб дава тутмага еринден галяр, халклара казылык этмек үчин аяга галяр.

¹⁴ Реб халкының яшулулары, хөкүмдарлары билен хөкүме гиришйәр: «Үзүмчилиги вейран эден сизсиңиз, өйлериңиз гарыпдан талан олҗаңыздан долы.

¹⁵ Халкымы эзип, гарыплары ере чалмага нәме хакыңыз бар?» Муны Гудратыгүйчли-Хөкмүрован Реб айдяндыр.

Иерусалим аялларына дуйдурыш

¹⁶ Реб шейле диййәр: «Сион гызлары текепбирдирлер, тумшукларыны гөге тутуп йөрейәрлер, нәзиргешип середйәрлер, нәз-керешме билен әдим әдип, аяк халкаларыны шыңңырдадярлар.

¹⁷ Шонуң үчин Таңры Сион гызларының келлесини кел эдер, Реб маңлайларыны такырадар.

¹⁸ Шол гүн Таңры овадан аяк-халкаларыны, алын безеглерини, гымматбаха монҗукларыны,

¹⁹ гулакхалкаларыны, билезиклерини ве яглыкларыны, бөрүклерини, топук-халкаларыны, гушакларыны, атыр чүйшеҗиклерини ве дога-тумарларыны,

²⁰ йүзүклерини ве бурун халкаларыны,

²¹ той лыбасларыны, күртелерини, чабытларыны ве эл гапҗыкларыны,

²² йүз айналарыны, йүпек лыбасларыны, бөрүклерини ве бүренчеклерини айрар.

²³ Атырың дерегине порсы ыс, бил гушагың дерегине йүп, буйра зүлплериң дерегине келлик, беземен лыбасың дерегине җул, гөзеллигиң дерегине утанч болар.

²⁴ Эркеклериң гылычдан гырларлар, эдермен уршуҗыларың сөвешде өлерлер.

²⁵ Сионың дервезелери ах чекип, яс тутар, шәхер чоларып, гуры ерде отурар».