Işaýa 28 - Мукаддес Китап

28‑нҗи бап Эфрайымың дат гүнүне!

¹ Эфрайым серхошларының буйсанян тәҗиниң дат гүнүне! Онуң шөхратлы гөзеллиги солуп барян гүллер киминдир, хасыллы дерәниң башындакы шәхериң дат гүнүне! Шерапдан доянлар оңа гуванярлар.

² Ине, Реббиң гудратлы, гүйчли бир адамы бар; вейран эдйән долы тупаны кимин, гүйчли ягыш сили кимин, Өз эли билен шәхери ере чалар.

³ Эфрайымың серхошларының буйсанҗы болан тәҗи аяк астында депеленер.

⁴ Хасыллы дерәниң башында ерлешен, шөхратлы гөзеллиги солуп барян гүл, томусдан өң етишен инҗир дек болар; оны гөрен, тиз ёлуп иер.

⁵ Шол гүн халкының аман галанларына шөхрат тәҗи, гөзеллик җыгасы болар Хөкмүрован Реб.

⁶ Хөкүм күрсүсинде отуряна адалатлык рухы, дервезеде душмана зарба уряна медет болар.

Реб баштутанлары җезаландыряр

⁷ Руханыдыр пыгамберлер-де шерапдан яңа ыраң атярлар, чакыр зерарлы энтиреклейәрлер; шерап ичип ёлдан чыкярлар, шерапдан башлары айланяр, чакыр зерарлы энтреклейәрлер, нәхак гөрнүшлер гөрйәрлер, хөкүм эденлеринде бүдрейәрлер.

⁸ Әхли сачаклары гусукдан долы, арасса ер ёкдур асла.

⁹ «Олар билими киме өвредйәрлер? Хабары киме дүшүндирйәрлер? Сүйтден кесиленлереми? Эмҗекден айрыланларамы?

¹⁰ Буйрук үстүне буйрук, буйрук үстүне буйрук, дүзгүн үстүне дүзгүн, дүзгүн үстүне дүзгүн, бираз бу ерде, бираз ол ерде».

¹¹ Инди бу халка кесеки агзы билен гепләр Реб дүшнүксиз дилде сөзләр.

¹² Олара: «Бу дынчлык еридир, аргынлара дынч бериң, бу дынчлык еридир» дийди; эмма диңлемек ислемедилер.

¹³ Шонуң үчин олар гидип, аркан йыкылып, яраланарлары ялы, дузага дүшүп, тутулары ялы, Реббиң сөзи олар үчин: «Буйрук үстүне буйрук, буйрук үстүне буйрук, дүзгүн үстүне дүзгүн, дүзгүн үстүне дүзгүн, бираз бу ерде, бираз ол ерде» болар.

¹⁴ Мунуң үчин эй, масгаралайҗылар, Иерусалимдәки бу халка хөкүмдарлык эдйән сиз, Реббиң сөзүни эшидиң!

¹⁵ Сиз: «Биз өлүм билен әхт эдишдик, ылалашык баглашдык өлүлер дүнйәси билен; улы бетбагтчылык иненде юрда, гечип гидер, бизе етмез, чүнки биз яланчылыгы пена эдиндик, галплык ичинде гизлендик» дийдиңиз.

¹⁶ Шонуң үчин Хөкмүрован Реб шейле диййәр: «Ине, Мен Сионда бина дашыны, сыналан дашы, гымматбаха бурч дашыны, ынамдар бина гойярын; Оңа бил баглан ховсала дүшмез.

¹⁷ Адалаты өлчег йүпи, догрулыгы терези эдерин; долы ягып яланчылык пенасыны сүпүрип әкидер, сувлар басар гачыбаталганы.

¹⁸ Өлүм билен эден әхтиңиз ятырылар, Габыр билен баглашан ылалашыгыңыз пуҗа чыкар; улы бетбагтчылык геленде, ер билен егсан боларсыңыз.

¹⁹ Бетбагтчылык хер геченде, сизи сүпүрип әкидер, ол хер сәхер, гиҗе-гүндизине гечер». Хабара дүшүнениңизде, сизи горкы гаплар.

²⁰ Үстүнде узалардан гысга болар дүшек, өртүнмәге инсиз болар ёрган.

²¹ Өз ишини, тәсин ишини, амалыны, гең амалыны ерине етирмек үчин, Перазим дагындакы ялы аяга галар Реб, Гибгон җүлгесиндәки ялы газаба мүнер.

²² Инди масгараламаңызы бес эдиң, ёгсам зынҗырларыңыз агралар, бүтин юрдуң вейран эдилҗекдиги барада карара гелендигини Гудратыгүйчли-Хөкмүрован Ребден эшитдим.

²³ Гулак гоюң, сесими эшидиң, үнс бериң, сөзүми диңләң.

²⁴ Сүрүмчилер экин экмек үчин дынувсыз ер сүрйәрлерми? Ери кешләп, малалап гезйәрлерми?

²⁵ Ери текизләнлеринден соң, күнҗи, зире сепмейәрлерми? Бугдайы хатарлайын, арпаны өз еринде, язлык бугдайы-да өз еринде экмейәрлерми?

²⁶ Худайы олара гөркезме берер, өвредер.

²⁷ Күнҗи дөвек билен дөвүлмез, тигир йөредилмез зирәниң үстүнден, күнҗи токмак билен, зире-де таяк билен дөвүлйәр.

²⁸ Бугдай чөрек үчин үвелйәр, эмма ол эбедилик дөвүлмез, үстүнден арабадыр атлар айланса-да, бугдай үвелмез.

²⁹ Бу-да Хөкмүрован Ребдендир, Онуң маслахаты аҗайып, пайхасы бейикдир.