Işaýa 27 - Мукаддес Китап

27‑нҗи бап Реб өз халкыны топлаяр

¹ Шол гүн Реб газаплы, хайбатлы, гудратлы гылыч билен гачян, товланян йылан Ливятаны – деңиз аждархасыны җезаландырар.

² Шол гүн «Аҗайып үзүмчилик барада айдым айдың.

³ Мен – Реб онуң сакчысыдырын, оны хер пурсат суварярын, хич ким зыян етирмесин дийип, гиҗе-гүндиз гораярын.

⁴ Мен газаплы дәл, чалылар, тикенлер гаршыма чыкса, олар билен сөвешип, барыны ода якарын.

⁵ Я-да ол пена ызлап, Маңа япышсын, Мениң билен ярашык этсин, ярашык этсин Мениң билен.

⁶ Гелҗекде Якуп көк урар, Ысрайыл гунчалап гүлләр, ер йүзүни миведен долдурар.

⁷ Реб ысрайыллары җезаландыранларың җезаландырышы кимин җезаландырдымы? я-да ысрайыллары өлдүренлериң өлдүриши кимин өлдүрдими?

⁸ Реб Ысрайыла хөкүм этди, ковуп, сүргүн этди; олары газаплы деми билен ковуп чыкарды, гүндогардан өвүсйән ел дек.

⁹ Шейдип, Якубың этмиши өтүлер, гүнәсиниң өтүлмегиниң долы мивеси шу болар: Гурбанлык сыпаларының әхли дашлары хек дашлары дей оврадыланда, не Ашера бутлары, не-де түтетги сыпалары галар.

¹⁰ Диварлы шәхер терк эдилйәр, чөл кимин терк эдилен, ташланан юртдыр бу; гөлелер ол ерде отлап, агачларың шахаларыны иййәрлер; ол ерде ятярлар.

¹¹ Пудаклары гурап дөвлер, аяллар гелип, олары якарлар. Бу халк дүшүнмейән халкдыр; шонуң үчин Яраданы олара рехим этмез, Дөредиҗиси олара мерхемет гөркезмез».

¹² Шол гүн Реб Евфрат дерясындан Мүсүр дерясына ченли сизи харман дөвеги дей енҗер, ысрайыллары еке-екеден топлар.

¹³ Шол гүн улы сурнай чалнар; Ашур юрдунда хеләк боланлар, Мүсүре сүргүн эдиленлер гелип, Иерусалимдәки мукаддес дагда Реббе ыбадат эдерлер.