Işaýa 26 - Мукаддес Китап

26-нҗы бап Алкыш айдымы

¹ Шол гүн Яхуда юрдунда шу айдым яңланар: «Бизде гүйчли шәхер бар, Худайың халас эдиши диварлардыр сеңңерлер ялыдыр.

² Дервезелери ачың, садык, догры миллет ичери гирсин.

³ Пикири Өзүңе йөнеленлери долы рахатлыкда саклаярсың, чүнки олар Саңа бил баглаярлар.

⁴ Реббе эбедилик бил багла, чүнки Бейик Худай эбеди Гаядыр.

⁵ Текепбирлери кичелдйәр, бейик шәхери йыкып, ер билен егсан эдйәр оны.

⁶ Ол шәхер эҗизлериң аяклары, мәтәчлериң дабанлары билен басгыланар».

⁷ Догруларың ёлы дүздүр. Эй, Адыл Болан, догруларың ёдасыны текизлейәрсиң.

⁸ Я Реб, Хөкүмлериңиң ёдасында, биз Саңа интизар, Сениң адың ве ятланмагың йүрегимизиң ислегидир.

⁹ Гиҗе калбым Сени күйсейәр, җаным Сени чынлакай ызлаяр, хөкүмлериң ер йүзүндекә, дүнйәниң бүтин илаты догрулыгы өвренер.

¹⁰ Пислер мерхемет газансалар-да, догрулыгы өвренмезлер, адалатсызлык эдерлер, догруларың юрдунда. Реббиң шан-шөхратыны гөрмезлер.

¹¹ Я Реб, эл галдырдың, эмма оны гөрмедилер. Халкыңа болан ыхласыңы гөрүп, утансынлар олар. Душманларыңа ниетленен от, гой, олары ювутсын.

¹² Я Реб, рахатлык берҗек Сенсиң, әхли эден ишлеримизи берҗай эден Сенсиң.

¹³ Я Реб, Худайымыз, Сенден башга хөкүмдарлар бизе агалык этдилер, эмма биз диңе Сениң адыңа хормат гойярыс.

¹⁴ Ол хөкүмдарлар өлди, олар инди ёк, Сен олары җезаландырып, хеләк этдиң, олары хич ким ятламаз асла.

¹⁵ Я Реб, Сен миллети көпелтдиң! Миллети көпелдип, Өзүңе шөхрат газандың; юрдуң әхли чәклерини гиңелтдиң.

¹⁶ Я Реб, хасрат ичинде сени агтардылар, Сенден темми аланларында, пышырдап зордан дилег этдилер.

¹⁷ Догурмак пурсады якынлашанда, бургудан эҗир чекип, гыгырян аял нәхили болса, биз-де, я Реб, Сениң өңүңде шейле болдук.

¹⁸ Биз гөврели болдук, эҗир чекдик, эмма елден башга зат догурмадык, ер йүзүне еңиш гетирмедик, дүнйәниң илаты йыкылмады.

¹⁹ Эмма өлүлериң яшар, җесетлер дирелер. Эй, топрак астында ятанлар, ояның, шатлыкдан айдым айдың! Чыгың эртириң чыгы киминдир, топракдакы мерхумлар яшайша етер.

²⁰ Гелиң, эй, халкым, отагларыңыза гириң-де, ичинден япың гапылары! Газап гечйәнчә, аз салым гизлениң.

²¹ Ине, Реб дүнйәниң әхли илатына этмишлери үчин җеза бермәге Өз меканындан чыкып гелйәр; ер үстүне дөкүлен ганы әшгәр эдер, өлдүриленлерини яшырмаз инди.