Işaýa 25 - Мукаддес Китап

25‑нҗи бап Реббе өвги

¹ Я Реб, Сенсиң мениң Худайым! Сени арша чыкарарын, алкыша бесләрин адыңы, чүнки Сен аҗайып ишлер этдиң, овалдан карар этдиң, кәмил садыклык билен.

² Сен шәхери даш үйшмегине, диварлы шәхери харабалыга өвүрдиң; кесекилериң көшклери болан шәхерлери ёк этдиң, олар бина эдилмез асла.

³ Шонуң үчин гүйчли халклар шөхратландырар Сени; ёвуз миллетлериң шәхерлери Сенден горкарлар.

⁴ Сен ёксуллара пена, мәтәчлере мәтәчлигинде пена болдуң, тупандан гораян гачыбаталга, ыссыдан гораян көлеге болдуң. Рехимсизлериң гахарлы деми дивара урулян тупан кимин,

⁵ гурак ердәки ыссы киминдир, кесекилериң галмагалыны ятырарсың; булут көлегеси билен ыссыны басышың кимин, ёвузларың айдымы-да ятырылды.

Реббиң тайярлан мейлиси

⁶ Хөкмүрован Реб бу дагда әхли халклар үчин бол иймитли, сап шераплы, йиликли, бол этден, сүзүлен сап шераплы мейлис гурар.

⁷ Бүтин халклары өртен өртүги, әхли миллетлериң үстүндәки япынҗаны бу дагдан ёк эдер.

⁸ Өлүми эбедилик ювудар Ол; гөзяшлары сүпүрер Хөкмүрован Реб, халкының утанҗыны бүтин ер йүзүнден айрар Ол. Муны Реб айдяндыр.

⁹ Шол гүн шейле дийлер: «Ине, Худайымыз будур, биз Оңа умыт багладык, Ол бизи халас этди. Бизиң умыт баглан Реббимиз будур; халас боланымыз үчин бегенелиң, шатланалың!»

¹⁰ Реббиң эли бу дагда болар, дерсли чукурда саманың депелениши кимин моваплылар-да өз ерлеринде басгыланар.

¹¹ Йүзүҗиниң йүзҗек болуп, эллерини галгадышы кимин, олар-да онуң ичинде эллерини галгадарлар; эмма Худай эллериниң уссатлыгына гарамаздан, оларың текепбирлерини песелдер.

¹² Ер билен егсан эдилер, диварларындакы беркитмелер.