Işaýa 24 - Мукаддес Китап

24‑нҗи бап Реб ер йүзүни җезаландыряр

¹ Ине, Реб ер йүзүни вейран эдип чолардар, ериң йүзүни танар ялы этмез Ол, илатыны даргадар.

² Халкың-да, руханың-да, гулуң-да, хоҗайының-да, гырнагың-да, бикәниң-де, сатын аляның-да, сатяның-да, бергидарың-да, алгыдарың-да, карздарың-да, карз берениң-де такдыры бирдир.

³ Ер йүзи бүтинлей вейран эдилип таланар. Муны Реб айдяндыр.

⁴ Ер йүзи соляр, гураяр хеләк болуп, йитип гидер дүнйә; дүнйәниң халкларының гүйчлүлери хеләк боларлар.

⁵ Илатлар харама чыкарды дүнйәни, олар канунлардан чыкдылар, парзлары сакламадылар, эбеди әхти боздулар.

⁶ Муңа гөрә дүнйә лагнат ягяр, илаты языкларының җезасыны чекйәр, шонуң үчин ер йүзүниң илаты янып, гаты аз адам галяр.

⁷ Тәзе шерап гутаряр, соляр үзүм агаҗы, ах чекйәр шадыянлар.

⁸ Депреклерем шат овазыны кесди, шадыян сеслер эшидилмеди, лира сем болды.

⁹ Инди айдым айдып, шерап ичмезлер, агызлара аҗы дегер ичги.

¹⁰ Вейран болан шәхер харабалыкдыр, хич ким гирмез ялы, әхли өй япылды.

¹¹ Көчелерде шерап үчин налашярлар, шатлыкдан нам-нышан галмады, бегенч дүнйәни терк этди.

¹² Шәхер харабалык, бөлек-бөлекдир дервезелер.

¹³ Зейтун агаҗы какыланда, хасыл йыгыландан соң, артып галан үзүмлер билен нәме эдилйән болса, дүнйәдәки миллетлер билен-де шейле болар.

¹⁴ Олар сеслерини гаталдып, бегенҗине хешелле какарлар, Реббиң бейиклиги үчин гүнбатардан гыгырышарлар.

¹⁵ Шонуң үчин гүндогарда Ребби өвүң, Ысрайылың Худайы Реббиң адыны шөхратландырың деңиз адаларында.

¹⁶ Өвги айдымлары яңланяр ериң аңры уҗунда: «Догры Болана шөхрат!» Эмма мен: «Гарамаңлай, гарамаңлай! Дат гүнүме! Дөнүклер дөнүклик эдйәрлер, дөнүклиги чәксиз оларың» дийдим.

¹⁷ Эй, ер йүзүниң илаты, горкы, чукур ве дузак башыңызда!

¹⁸ Горкы сесинден гачан чукура гапгарылар, чукурдан чыкан дузага дүшер, гөгүң пенҗирелери ачылар, ериң бинятлары титрәр.

¹⁹ Җайрык-җайрык болар ер йүзи, бөлек-бөлек болар ол, ер йүзи гүйчли сарсар.

²⁰ Серхош кимин ыраң атар ол, сакчы җайы кимин чайканар, языклары оңа агыр йүк болар, йыкылар-да, соң галмаз ол.

²¹ Шол гүн Реб гөкде гөк гошунларыны, ерде дүнйәниң шаларыны җезаландырар.

²² Ерземине туссаг кимин топланарлар, зындана габаларлар, бирнәче гүнден соң җезаландырыларлар.

²³ Айың йүзи гызарар, Гүн утанар; Хөкмүрован Реб Сион дагында, Иерусалимде хөкүм сүрер, Яшулуларының өңүнде Өз шөхратыны гөркезер.