Işaýa 23 - Мукаддес Китап

23‑нҗи бап Сур хакындакы пыгамберлик

¹ Сур хакындакы пыгамберлик: Эй, Таршыш гәмилери, Сур вейран болды, перят эдиң! өйсүз-өвзарсыз галды ол. Кипрден сизе хабар гелди.

² Эй, ада илаты, деңизден гечйәнлериң үсти билен баян Сидон тәҗирлери, дымың!

³ Бол сувлар якасында Шихорың галласы, Нилиң хасылы гирдеҗиңди. Миллетлериң тәҗириди ол.

⁴ Утан, эй, Сидон, деңиз якасындакы гала, деңиз шейле диййәр: «Не бургы тутды, не-де догурдым, не яш йигитлери кемала гетирдим, не-де яш гызлары етишдирдим».

⁵ Суруң халына гынанар Мүсүр, ол барада эшиденде.

⁶ Таршыша гечиң, эй, адалылар, перят эдиң!

⁷ Аслы овалдан бәри болан, узак үлкелери юрт эдинен шагалаңлы шәхериңиз шумы?

⁸ Тәчлери берйән Сура гаршы бейле карар чыкаран ким? Суруң тәҗирлери шазадаларды, тәҗирлери дүнйәниң абрайлы адамларыды.

⁹ Бүтин шан-шөхратың гедемлигини ёк этмек үчин, дүнйәниң әхли абрайлы адамларыны биабрай этмек үчин, Хөкмүрован Реб шейле карар чыкарды.

¹⁰ Эй, Таршыш гызы, юрдуңдан Нил кимин геч; инди бөкденч болмаз.

¹¹ Реб деңиз үстүне элини узадып, патышалыклары титретди; ёк этмеги буюрды ол Кенган галаларыны.

¹² Ол дийди: «Эй, Сидоның эзилен бой гызы, сен инди шатланмарсың. Бар, Кипре гит, ол ерде-де саңа дынчлык болмаз».

¹³ Бабыллыларың юрдуна серед-ә, бу халк инди ёк! Вагшы хайванларың элине берди ашурлылар оны. Олар габав диңлерини дикдилер, галаларыны йыкып, хараба өвүрдилер оны.

¹⁴ Перят эдиң, эй, Таршыш гәмилери! Галаңыз вейран болды.

¹⁵ Шол гүнден башлап, Сур етмиш йыл – бир патышаның өмрүче унудылар. Етмиш йыл соң Суруң башына бир кемчин хакдакы айдымда айдыланлар гелер:

¹⁶ Эй, унудылан кемчин, шәхере айлан лира ал-да! Лира чал-да, көп айдымлар айт, сени ятларлар белки-де.

¹⁷ Етмиш йылдан соң, Реб Суры идәр. Сур сөвдасына доланып, ер йүзүндәки әхли патышалыклар билен зына эдер.

¹⁸ Онуң дүшевүнди, газанҗы Реббе багыш эдилер. Булар хазынада топланып сакланмаз, йөне ол газанчлар Реббиң хузурында яшаянлар үчин болелин азыга хем гөзел эшиклере харч эдилер.