Işaýa 22 - Мукаддес Китап

22‑нҗи бап Иерусалим барадакы пыгамберлик

¹ Гөрнүш җүлгеси барада пыгамберлик: Барыңыз үчеклере чыкар ялы, сизе нәме болды?

² Эй, шовхун-шагалаңлы, гох-галмагаллы, шадыян шәхер! Өлдүриленлериң гылычдан өлмеди, сөвешде-де өлмеди.

³ Әхли баштутанларың билеликде гачдылар; яйларыны уланмадылар, есир дүшдүлер, узаклара гачдылар, йөне тапыланларың бары эле дүшди.

⁴ Мунуң үчин мен: «Назарыңы менден сов, зар-зар аглайын» дийдим. Эзиз халкымың вейранчылыгы үчин теселли бермәң маңа.

⁵ Гөрнүш җүлгесинде Гудратыгүйчли-Хөкмүрован Реббиң ховсалалы, табын эдйән, алҗыраңңы гүни болар. Диварлар йыкылар бу гүн, даглара перят эдилер.

⁶ Эйлам сөвеш арабалары, атлылары билен сагдагыны галгадяр, Кир гошуны галканларыны сомлаяр.

⁷ Сөвеш арабаларындан хырын-дыкындыр гөзел җүлгелериң, атлылар дервезелерде нызама дурдулар.

⁸ Яхуданың өртгүси айрылды. Шол гүн җеңңелиң горханасына серетдиң.

⁹ Давут шәхериндәки көп җайрыклары гөрдүңиз, ашакы ховза сув топладыңыз.

¹⁰ Иерусалимиң өйлерини санадыңыз, дивары беркитмек үчин өйлери йыкдыңыз.

¹¹ Көне ховзуң сувлары үчин, ики диварың арасындан сув ховданыны газдыңыз. Йөне оны Ярадана серетмедиңиз, овалдан Тайынланы гөрмедиңиз.

¹² Шол гүн Гудратыгүйчли-Хөкмүрован Реб яс багламага чагырды сизи, сачларыңызы үтүп, җул гейинмәге чагырды.

¹³ Эмма сиз өкүз, гоюн өлдүрип, эт ийип, шерап ичип, шатланярсыңыз, бегенйәрсиңиз. «Гелиң, иелиң, ичелиң, эртир биз өлерис» диййәрсиңиз.

¹⁴ Хөкмүрован Реб гулагыма: «Элбетде, өлйәнчәңиз бу гүнәңизден сапланмарсыңыз» дийди. Муны Гудратыгүйчли-Хөкмүрован Реб диййәр.

Көшк эмелдары айыпланяр

¹⁵ Гудратыгүйчли-Хөкмүрован Реб шейле диййәр: «Гит-де, патышаның эмелдары, көшк хәкими Шебнаның янына бар-да, оңа шейле дий:

¹⁶ „Бу ерде нәме ишиң бар? Өзүңе габыр газар ялы кимиң бар? Өзүңе белентде габыр газярсың, гаяда өзүңе дынч ер эдинйәрсиң.

¹⁷ Эй, гүйчли киши, Реб сени гүйч билен тогалар. Ол сени ыкҗам тутуп,

¹⁸ айлап-айлап, топ кимин бир гиң юрда ташлар. Сен ол ерде өлерсиң. Аҗайып сөвеш арабаларың ол ерде галар. Өз җенабыңың өйүни биабрай эден сенсиң.

¹⁹ Сени орнуңдан коварын, везипәңден бошадыларсың.

²⁰ Шол гүн Мен гулум Хилкия оглы Элякымы чагырарын.

²¹ Сениң донуңы оңа гейдирип, гушагыңы онуң билине гушарын. Хәкимиетиңи оңа берерин; ол Иерусалимиң илатына ве Яхуда халкына ата болар.

²² Давудың өйүниң ачарыны онуң гершинден асарын. Онуң ачаныны хич ким япып билмез, япаныны хич ким ачып билмез.

²³ Оны ере газык кимин гайым какарын, ол өз несиллерине хормат тагты болар.

²⁴ Чадырың газыга багланышы ялы, онуң уругының чагаларының, агтыкларының абрайы-да оңа баглыдыр“».

²⁵ Хөкмүрован Реб: «Шол гүн ере гайым какылан газык еринден согрулар; ол чапылып йыкылар; оңа багланан чадыр-да ёк болар» диййәр. Муны Реб айдяндыр.