Işaýa 21 - Мукаддес Китап

21‑нҗи бап Бабылың, Эдомың ве Арабыстаның гаршысына пыгамберлик

¹ Деңиз янындакы чөл хакда пыгамберлик: Түвелейлериң гүнортадан гелши дей, басыбалыҗы-да горкунч юртдан, чөлден гелер.

² Бир горкунч гөрнүш аян болды, хайын хайынлык эдйәр, талаңчы талаяр. Хүҗүм эт, эй, Эйлам! Габа, эй, Мадай! Бабыл себәпли болан налышларың соңуна чыкарын.

³ Мунуң үчин санҗы тутды билимден, догурян аялың бургусы дек, бургулар тутды мени; эшидйәнлеримден яңа ики бүкүлдим, гөрйәнлеримден яңа горкы гаплады.

⁴ Йүрегим бикарардыр, саңңылдаян горкудан яңа; күйсән алагараңкылыгым вехиме салгар.

⁵ Иййәрлер, ичйәрлер, халылар дүшәп, сачак язып. Эй, серкерделер, туруң-да, галканлары яглаң!

⁶ Реб маңа шейле дийди: «Гит-де бир гөзегчи гой, гой, ол хабар берсин гөренини.

⁷ Ол сөвеш арабаларыны, җүбүт-җүбүт атлылары, эшеклилери, дүелилери гөренде, дыкгат берсин, үнс берсин».

⁸ Гөзегчи гыгырды: «Я Реб, гөзегчилик диңидир гүндизлерине орнум, нобатчылык чекйән бүтин гиҗеләп.

⁹ Җүбүт-җүбүт атлылар гелйәр, ине, өз сөвеш арабаларыны тиркәп. „Йыкылды, Бабыл йыкылды; онуң бут-худайлары ере язылды, оврадылды“» дийип җогап берди ол.

¹⁰ Эй, харманда дөвлен, еле соврулан халкым! Хөкмүрован Ребден, Ысрайылың Худайындан эшиденлеримдир, сизе аян эдйәним.

¹¹ Дума барадакы пыгамберлик: Сегирден чагыряр бири мени: «Эй, гөзегчи, даң атара нәче вагт бар? Нәче вагт бар даңың ягтылмагына?»

¹² «Даң атып баряр, йөне энтек гиҗе. Ене сораҗак болсаңыз сораң, соңра өврүлип гелиң» диййәр гөзегчи.

¹³ Арабыстан хакындакы пыгамберлик: Эй, деданлыларың кервенлери! Гиҗәни Арабыстан җеңңелинде гечирерсиңиз.

¹⁴ Эй, Тейма юрдуның халкы, сувсана сув, босгунлара чөрек бер.

¹⁵ Олар гылычдан гачдылар, сырылан гылычдан, чекилен яйдан, агыр сөвешден гачдылар.

¹⁶ Реб маңа шейле диййәр: «Хакына тутма ишчиниң мөхлети ялы бир йылың довамында Кедарың шан-шөхраты сөнер.

¹⁷ Кедар огулларының эдермен уршуҗылардан галан кеманчылары аз болар». Муны Ысрайыл Худайы Реб дийди.