Işaýa 2 - Мукаддес Китап

2‑нҗи бап Реббиң дагы

¹ Амозың оглы Ишаяның Яхуда ве Иерусалим бабатда гөрен гөрнүшлери.

² Ахыркы гүнлерде шейле боляр: Реббиң өйи дагларың иң бейиги дей беркарар эдилер, депелерден белент болар ол, әхли миллетлер оңа тарап эңерлер.

³ Көп халклар гелип, шейле диерлер: «Гелиң, Реббиң дагына – Якубың Худайының өйүне чыкалың; ёдаларындан йөрәр ялы, Ол бизе Өз ёлларыны өвредер». Чүнки канун Сиондан, Реббиң сөзи Иерусалимден чыкар.

⁴ Реб миллетлер арасында казылык эдер, көп халкларың даваларыны чөзер; олар гылычларындан азал, найзаларындан орак ясарлар; миллет миллете гаршы гылыч галдырмаз, сөвешмеги өвренмезлер инди.

⁵ Эй, Якубың несиллери, гелиң, Реббиң нурунда йөрәлиң!

Реббиң гүни

⁶ Сен Өз халкыңы, ягны Якубың неслини терк этдиң. Олар гүндогарың палчыларындан, пилиштлилериңки ялы мүнечҗимлерден долы, кесеки халк билен эл беришйәрлер олар.

⁷ Оларың юрды алтын-күмүшден долы, хазыналары түкениксиздир, юрт атлардан долы, сөвеш арабалары сан-саҗаксыздыр.

⁸ Оларың юрды бутлардан долы, өз эллериниң ишине, бармакларының ясан задына сежде эдйәрлер.

⁹ Муңа гөрә ынсан кичелдилер, хер кес песелдилер, олары багышлама!

¹⁰ Реббиң ховпундан, Онуң шан-шөхратындан гаяларда букулың, топрак астында гизлениң.

¹¹ Халкың гедем бакышлары песелдилер, ынсан текепбирлиги эглер, шол гүн диңе Реб бейгелдилер.

¹² Хөкмүрован Реббиң бир гүни бар, шол гүн әхли текепбирлери, гедемлери, әхли бейгелдиленлери песелдер,

¹³ Ливаның әхли бейик ве белент башлы кедр агачларына, Башаның бар дубларына гаршыдыр,

¹⁴ Әхли белент даглара, бейик депелере гаршыдыр.

¹⁵ Хер бир бейик диңе, хер бир берк гала гаршыдыр.

¹⁶ Таршыш гәмилериниң барыны, овадан гайыкларың хеммесини ёк эдер.

¹⁷ Ынсан мен-менлиги, хем гедемлиги песелдилер, шол гүн диңе Реб бейгелдилер.

¹⁸ Бутлар бүтинлей ёк эдилер.

¹⁹ Реб ери лерзана салмага галканда, ынсанлар Онуң ховпундан, шан-шөхратындан, гаялардакы говаклара, ериң дешиклерине гирерлер.

²⁰ Шол гүн адамлар өзлериниң сежде этмек үчин ясан алтын-күмүш бутларыны көрсычанларың, ярганатларың өңүне окларлар.

²¹ Реб ери лерзана салмага галканда, ынсанлар Онуң шан-шөхратындан, ховпундан гаялардакы говаклара, керт гаялардакы җайрыклара гирерлер.

²² Соңы өлүмли ынсанлара бил багламаң. Ким болупмыш олар?